Yieun qu'a grand'fain,
Peut vais d'bein lien.

N'faut pas tréjous dithe,
Chein qui va vos fait'rithe.

Monsieu dit mot,
Est un grand sot.

Y'y'en a tchi s'font fête,
De se cassé la tête.

Oh jamais! tchest étheai creu,
Une poule a ponnu un oeu,

Si ou vos assiévais dans l'bel,
Jamais ou n'mount'taies l'ètchelle,

Quatres sous et pas d'dettes,
A pleine pouchette.

Les taupes travaillent sans yieux.
Trebuquent le monde ov lus p'tits creux!

Tisons brulais,
Sont vite rallumais.

Les petites suothies ont bein d'l'avis ;
Quand ils entendent les cats, y n'sortent pas.

L'houmme le pus bête.
Pâle à tue tête,

Allais duoch'ment pour gangni la fin ;
L'sein qui tithe trop vite, perd san lapin.

L'Ane qui peut s'taithe,
Non n'lentend pas braithe.

L'orghi se crait tout, et tout l'monde n'en crait rein.

Buounne pathole au besoin,
Va souvent bein lyien.

Les southies qui s'gardent dans lus creux,
N'ont pas besoin d'avé peux.

L'houmme colèthe,
A tréjous de tchi faithe.

Les siens qui font de p'tits doux teurs,
N'sont pas tréjous de bounne humeur.

Quand madame est mârie, n'rêpondais pon,
Et l'feu s'éteindra, manque de tcherbon.

Quand un houmme a l's'ouetheilles graissies,
I paye la graisse à grand prix.

Quand madame veut,
Monsieu frume les yieux.

Oh man chier doux canard de souaie!
Fait monsieu dithe tout chain tchi pliaie.

Tchi poulotte sa femme trop,
Sethea bétôt, monsieu dit mot.

Tchi contre sa femme capuche sa tête,
Est une grande bénite bête.

Che n'est pas tous les messieux,
Tchi sont maitre sieux hieux.

Quand madame est prinse sus ses nerfs,
Ov mousieu tout va de travers.

Mousieu, pendais l'nais,
Madame l'a dit, chest assais.

Une paille bein souvent,
Montre le côtai du vent.

Trop d'liet, n'est pas fête,
Car nou s'en r'lève tout bête.

Les mains nettes, dehors et d'dans,
N'ont pas besoin de jaune gants.

Dîner hors du graît,
Veurt tout l'monde prêt.

Tchi mange sa crême, a toute heuthe,
Ne f'thea jamais grand beurre.

Beiu souvent l'malheur n'est rein,
Tchi pathais grand, quand il est lien.

Madame la sotte,
Chante à toute note.

Prenais garde au triste esprit,
M'efiious d'l'homme qui n'jamais rit.

Les cocqs grattent bein,
Les poules mangent le grain.

Si ou z'êtes dans la baue,
N'l'dites pas es oieziaux.

Esther Le Hardy