A la table coum' au clios,
Du travas, mais bein p'tit d'mots.

Le sien qui veurs sa terre bein tuounnaie, faut
T'nin la tchétchue ou bein cachi les gh'vaux.

Pour vivre sus la ferme, et la payi,
Faut du soin, du travas, et pas trop d'piaisi.

Qui bait l'lait à toute heure,
Ne fera jamais grand beurre.

Faudrait qué l'fain s'ceat fait,
Quand y fait du solai.

Y faut faithe le fain,
Quand le solai lîs bein.

Le fermi, y faut qui se lève,
De buouanne heuthe à traithe;
Tandis qué l'villais reste au liet,
Pour qué l'lait li s'ceait apportai.

Du buouan maînage, et pon trop
De fricach'ie, font buoilli l'pot.

Le gh'va est trop rempli d'ordghi
Qui n'veurs pon porté san manghi.

Ch'est à la femme à soiengni,
D'aver du pain sus le râcliei,
Et à l'houmme à soiengni bein,
D'aver du grain pour faith' le pain;
Et y verra, s'il est malin,
Qu'la fiieu, sceait venue du moulin;
Et pis oquo, chn'est pas là tout,
Y faut du geon pour cauffé l'fou,
(Le pain est si bouan,
Chuit avec du geon,
Pustôt qu'du tcherbon.)
Le pain qu'nou fouanne, est miyieu,
Qué l'sien qu'nou's'acate ach'teu;
Et dites, qué chest mé qui l'dit!
Il est à bein miyieu marchi,
Et bein rassis, y va pus lien,
Qué du tout frais et nouviau pain,
Les poules en Egypte, n'ont pus l'art de coué,
Les femmes de Jerri, le sien de fouanné!!
Ch'est le piano, qu'à remplièchi,
Le tro, qui servait à pêtri.

A. M.