Bonjour Mousieu, excusez ma hardèche,
Mais j'sis marrie de m'ouir appler des noms
Par des bachouards, qui s'ils taient à ma pllèche
N'airaient pas pus d'esprit qu'des cornichons.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

Ous prétendez que j'sis une Kédole,
Bein llain s'en faut, nou peut s'en asseurer;
S'ous avez 'té pus longtemps à l'êcole,
Avous raison pour chouna d'minsulter.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

Jusqu'au cat-huant qu'en baill' de sa varvette;
I' frait bein mux de se tnin à Grosnez
A y pliumer et chasser à l'alouette,
Pustôt qu'de vnin siez nous fouorrer son nez.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

I' vouos dirais bein qu'est qu'chest qui les catouille;
Sans me vanter j'ai étou du savé:
Pour coronel veut-on une citrouille,
Pour agitant voudrait-on un avé?

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

Et pour mâjeur, il faut que je le dize,
Voudrait-on yun quès tréjous à grigni?
Quand j'vai chouna le pé d'la coue m'en freze,
Car ov d'ité je n'ai rein à gangni.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

Mais d'pis qu'i faut que j'faiche men service,
Je voudrais bein porter captaine Piné;
I'n'pèze pon fort et connait l'exercice;
Qui belle pare je ferions li et mé.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

Captaine Dallain n'a pas la bédaine grosse;
Mais l'piere en est ch'est qu'i cache bein trop;
Je l'vai quiqufais passer dans sa carosse,
Et la maintqui du temps ch'est au galop.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

Pour le restant j'n'en bâdrais pas grand chose;
Je n'les connais rein qu'un mio en passant;
Ch'en est des jeunes qui se craient sus des roses,
Quand i'drallent la muel' tambour battant.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.

Bonsouair Mousieu, ch'est jusqu'à la préchaine,
Et j'vouos rmercie de m'aver êcoutée;
I'faut que j'quitt' pour bère à la fontaine,
Et pis auprès j'crai à la terreé.

Nan, nan, je n'veur pas
Que nou m'appelle Kédole;
Nan, nan, je n'veur pas
Je n'le mérite pas.