Le Viage du Caouain à Sercq

Je d'mande mille exchuses à touos les lecteurs qui futhent d'sappointés Samedi passé de n'vaie pas l'Caouain dans la gâzette comme d'habitude. Il est vrai qu'Elie fît d'san mus pour “combler la lacune” en infligeant sus vous un êchantillon d'sa “poësie” dans tchi qu'il eut l'audace de suggéther qu'une pinchie d'sno de dans sa neuve bouaîte valait mus qu'un articly'e du Caouain. I' m'sembl'ye à mé que ch'tait cherchi à faithe insulte à votre intelligence, et je sis bain certain que des versets comme chenna ne pouvaient jamais les faufiler dans nos colonnes, sinon dans un moment que Mess Bisson avait l'dos touâné.

Eh bain, garçons, la raison pourtchi que je n'êcrivi pas la s'maine passèe est que j'tais hors l'île. Pas bain liain, il est vrai, mais liain assez pour empêchi toute correspondance.

J'étais en Sercq!

Et l'Administration des Chroniques n'en savait rain! Ne pensez pas pour un moment que je m'en étais allé de man chef, sans d'mander permission au “boss.” Je n'voudrais pas faithe patheille chose. Mais criyiz mé s'ou voulez, je fus “kidnappé!”

V'chin comme l'affaithe se fit.

Le bouanhomme Joe, le jeune Joe, Winneteur de Cleveland, Paul Le Grand (surnomme "Poli") Sydney d'Longueville, Jack d'Anneville et Douard de St.-Clément, avaient frètté l'baté à Cap'tainne Mathèt pour aller en Sercq à la pêque. Iun d'ieux avait dit comme chenna: “Le 'crew' ne 'sait pas complièt sans l'Caouain d'la Chronique. Est-che qu'i' n'y aithait pas moyen de l'emmener avec nous?”

“Je n'crai pas qu'il li sait permis de sorti de Jêrri en temps d'dgerre,” l'autre li raîponni:

“Bah! faut l'kidnapper!”

Et tel en fut.

Ch'tait l'bouanhomme Joe qui s'chergi d'faithe la job.

Le sé de d'vant s'embertchi, i' m'inviti à aller l'trouver à l'Hôtel de l'Europe et opprès que j'eûmes 'té là un p'tit brin, i' m'dit qu'i' s'en allait me r'condithe siez-nous.

Je n'sais pas comment qu'chenna s'fit, mais quand je m'rêvillyi, j'étais emprisonné dans l'fond d'san grand pannyi pêtcheux parmi toutes sortes d'ramas'sies, et par le mouvement et l'odeur de pétrole je réalisi que j'tais à bord de tchique baté. Ouiyant du rêmouage pas bain liain d'mé je dis comme chenna, “Ouest que j'sis, si vos pliaît?”

Et nou m'raîponni “Shut up.”

Je r'connu la vouaix à Arty! “Ah! j'pensi,” je sis à bord de la Valentine! Mais de tch'est qu'i' s'agit, mon doux? S'en vont-i' n'emmener au large de l'île pour me nier?”

Je fus prins d'peux et j'dis à Arty, “Met-mé abannon, comme un bouan garçon!”

“Rats!” i' m' raîponni. Et je n'pus pas li airaichi une aut'e pathole.

Réalisant que man séjour sus chute triste terre ichin était sus l'point d'être terminé je m'abandonni à de bain ludgubres réflexions. Toute ma vie passée se dêrouli d'vant mé commes les portraits au cinéma. Je vis passer touos les siens que j'avais attatchi avec ma pliume et i' m'sembliait qu'i' ritonnaient avec satisfaction de vaie qu'à la fin i' s'en allaient être dêbarrassés, une feis pour toutes, du maudit Cauoain. Et pis i' m'vint des visions de la malheutheuse Marie Hibou, que tout probabl'yement je ne r'verrais jamais. Je crai que je m'mins à plieuther. Je senti les pus affreux ermords de conscienche en pensant que je n'l'avais pas tréjours traitée comme i' faut, et je fis, “séance tenante,” la résolution que si, par tchique mithacl'ye, je me r'trouvais en liberté, je li f'thais pliaine et entchète erpathâtion.

Quand vint un temps je ouï le brit d'avithons et un baté qui frappi le long du bord. Cap'tainne Mathèt criyi “Come on Arty, give us a hand.”

Dans un clyin d'yi sept ou huit hommes sautithent à bord, avec des poutchies d'habits, des pan'nées de provisions et des cassées de - limonade.

Joe s'en vint tâtonner dans l'pannyi qui m'servait d'prîson et pis i' dit, “Ch'est all-right garçons, rain n'a bouogi.” Poli dêpôsi une satchie d'oignins souos l'banc tout près d'mé, Cap'taine Mathèt, mins san môteur en marche et cache nos v'là aller.

Le baté s'mins à roûler un mio quand j'vinmes en d'hors et je c'menchi à m'senti malade.

Le jeune Joe dit à san pépée, “si du n'sors pas ch't ouaîse-là de dans l'pannyi, i' s'en va nos saloper nos provisions, je n'aime pas l'brit qu'il est à faithe!”

Joe raîponni, “P't'être bain qu'vaithe, don! Je n'y pensais pas!”

Et i' s'mins à hallet une partie des affaithes que m'êcrassient et me prenant par la pé du co, i' m'halli au grand air et m'jutchi sus la barre du gouvernas à côté du cap'taine.

Touos les passagiers, que j'ai nommé pus haut, se minrent à faithe des riselées et cherchaient à s'fichi d'mé, mais je lus dis, “Messieux, de tch'est qu'i' s'agit? Je veurs saver tch'est qu'ou proposez de faithe avec mé? Tch'est que j'vos ai fait pour être traité d'la sorte?”

Là-d'sus Winneteur dit: “Tu n'as pas besoin d'aver peux, man vi. Je nos n'allons en Sercq et j'voulons qu'tu vainje avec nous. Je t'avons smogglé comme chenna car autrement le Chant'nyi Luxon ne t'aithait pas laissi t'embertchi.”

Les explications à Winneteur me rasseuthirent un mio, et quand je vins à contemplier les physiognomies des autres passagiers et que je r'connus des anmins et sustout de lecteurs du Caouain, je pensi que, à part du ma d'la mé, la viage pouorrait p't'être m'être bain agréablye.

I'y avait un homme à bord qui servait de maniethe de dguide et que ses anmins avaient surnommé “le pilote,” à cause de sa grande expérience et sa connaissance aprofondie des ieaux locales. I' m'pathaissait n'aver qu'becque duthant tout le viage et prétendait connaître le nom de touos les rotchers attouo des côtes.

A l'ouï pâler, nous aithait dit que ch'tait un navigant de prumié classe, et pour de mé, je le r'gardais avec une certaine admithation, mais quand, en nos en r'venant, que Cap'taine Mathet li donni la barre pour deustrais minutes, qu'i' perdi la course tout-à-fait et faille d'enfiler l'Alberta qui s'en allait en Dgernesi, je vîmes tous bain que d'vant que d's'embertchi avec un patheil pilote che s'sait une bouanne précaution de s'asseuther la vie!

Avec l'aide du môteur et avec une bouanne brise de vent d'quartchi, je fîmes la course dans treis heuthes de temps et j'arrivîmes au Havre des Creux à chinq heuthes et d'mie. Not'e reception en Sercq ne fut pas pus imposante ni pus démonstrative que n'l'avait 'té not'e sortie d'Jêrri. Pas d'fanfare, pas d'adresse de la part du Seigneur, pas de délégués d'la municipalité, enfin pas une seule âme sus la cauchie. J'atterrîmes justement comme une bande de fraudeurs. Opprès aver amathé l'baté je décidîmes de pénétrer pus dans l'intérieur afin d'nos asseuther si ch'est qu'l'île était habitée, mais je n'avions pas fait djaix pas que tchiqu'un criyi, “V'chin du monde qui veinnent!” Et de fait! Un homme en uniforme s'en v'nait couothant avaut la route. Ch'tait un offici angliais, et malgré qu'il 'tait tout seu dévant autant d'pirates, i' n'pathaissait pas aver du tout d'peux, mais s'en vint tout dret à nous et nos d'mandi tch'est qu'j'étions, de ouest qu'j'étions et si nos passeports étaient en réglye. Cap'taine Mathet li raîponni que j'taîmes des gens pus ou mains comme i' faut, tout-à-fait paisibles, et que j'étions v'nus en Sercq tâchi d'attraper un mio d'paisson.

“Ch'est bain,” i' dit, “suivez-mé, car i' faut montrer vos papiers à m'n offici supérieur.”

Quand j'vinmes au haut du mont je trouvîmes deustrais autres officiers qu'étaient à nos attendre et i' falli que nos garçons dêhallissent lus passe-ports et qu'i' touânissent lus fache du bord de la lune pour que l'offici les compathisse avec lus photographies. Mé qui ouait cliai, j'en ouï un dithe que jamais n'on avait veu une patheille collection en d'hors de l'êtablissement à Madame Tussaud. Quand touos l's autres avaient 'té bain examinés l'offici se touâni à me r'garder et i' dit comme chenna au bouanhomme Joe “what's this?”.

“Oh! ch'est l'Caouain d'la Chronique,” s'fit Joe, “mais i' n'a pas d'passe-port!”

“Bah! i' n'en a pas qu'faithe, un ouaîsé avec sa réputation dait pouver viagi partout le monde sans être assujetti à autchuns régliyiements et sans subi le moindre inconvénient.” Et avec un “Pleased to make your acquaintance!” i' m'châtchi la patte comme si ch'est qu'i' s'en allait l'êraichi.

Arrivés à l'Hôtel Bel Air, nos garçons s'en furent chouaisi lus chambres. La maîtresse de l'Hôtel ne voulit jamais me laissi entrer avec les autres. Le Gouverneux d'Dgernesi et une djaingue d'Officiers étaient parmi ses pensionnaithes et ou n's'en allait pas vaie s'n Hôtel viédgi pour l'amour d'un ouaisé comme chenna!

Poli li d'mandi, “Tch'est qu'j'allons en faithe don?”

“Ah dame! faites-en ch'qu'ou voudrez, mais i' n'entretha pas ichin!”

Dans l'entretemps le jeune Joe avait trouvé un cliavé à homards dans la carre du shed driéthe l'Hôtel et ch'tait la d'dans qu'i' m'fouorrithent pour passer la nièt. En était-che là une humiliation pour mé?

Quant ès hommes, i' d'vallidrent, dans la grande salle pour dîner. Nou lus avait dit en Jêrri qu'i' n'trouv'thaient pas rain à mangi en Sercq car tout l'monde était sus des “War Rations” mais tout chenna était du gniollin, nou lus servi un dîner comme pour des princes. J'en eus ma châre ettou mé, car Sidney et Poli en fourrithent un p'tit d'chaque sorte dans lus pouchettes et vinrent me soigni dès furent finis d'lus r'pas.

Dans la séthée le “pilote” tchitti sus compagnons en lus disant qu'i' s'en allait de l'aut'e but d'l'île vaie une veuve de sa connaissance et pour tchi qu'il avait un message. Les autres, bain contents de s'dêfaithe de li, furent, en lus promenant, jusqu'au havre pour vaie si l'baté était allright et à onze heuthes et d'mie i' r'vinrent à l'Hôtel et ramontithent à lus couochi.

Quand j'vinmes à ramonter l'êtchelle en fé qu'est fixée dans l'bas d'la falaise, je la trouvîmes bain pus facile qu'ou n'en avait d'abord la mîne, mais j'étions tous pus ou mains êssouffliés opprès que j'eûmes grapiné jusqu'au Monument. En r'prenant notre haleine, j'êprouvîmes à en dêchiffrer l'inscription, mais la nièt s'faisait et ch'tait raique à forche d'satchi des allumettes que nou pu en c'menchions à être un mio à court d'allumettes, étant tous de grands fumeurs, je r'mîmes l'affaithe au lendemain matin et j'prinmes la route pour l'hôtel.

Quand vint un temps je nos aperchûmes que Douard de St.-Cliément et l'Pilote mantchaient. Ils avaient traîné driéthe et s'en étaient allés avau un p'tit c'min d'travers, soidisant pour cherchi l'passeport au Pilote, qu'il avait laissi l'sé de d'vant sus la tablye à la dame qu'i' connaissait. J'arrêtîmes pour ieux un p'tit brin et pis j'envyîmes un des garçons à les cherchi, car sans chenna ils y s'saient oquo, et pis d'ailleurs, j'avions peux d'être en r'tard pour dîner.

J'arrivîmes à l'hôtel justement en temps pour nos mettre à tablye et je trouvîmes la salle à mangi pliaine de gens, des pus aristocratiques. I'y avait le Gouverneur d'Dgernesi et une demie-douzaine d'Officiers, chinq ou siex dames, un Docteu bain connu en Jêrri, qui n'fit pas la mîne de nos r'connaître, et pis i'y avait ettou le Révérend S. qui d'meuthe en Sercq acheteu mais qu'avait 'té Vitchaithe de iune de nos églyses ichin, i'y a bain d's années. I' fut bain charmant avec nous, li, et dès qu'i' fut fini d'dîner, i' s'en vint nos d'mander des nouvelles de Jêrri et de toutes ses vieilles connaissances. Quand i' fut tchestion d'aller s'couochi, le Pilote envyi pour la maîtresse de l'hôtel et li dit, “Madame, j'avons 'té charmés de not'e petit séjour dans votre êtablissement et ch'est avec le pus grand r'gret que j'avons à vos tchitter. Je partons d'vant l'jour demain au matin et pour ne dêrangi pas personne je voudrethions réglier not'e compte dévant nos couochi.”

Ou raîponni que v'là tchi n'prendrait pas bain des minutes, et dans p'tit d'temps le ouaîteur s'en vint présenter la note sus un serreveur. Il a la mîne ludgubre, chu ouaîteur-là, et il 'tait bain facile de vaie, par l'expression d'sa physiognomie, quand i' rapporti le r'chu, qu'i' n's'attendait pas à un grand sorte de “tip” de la part de ches aventuriers-là, mais quand l'Pilote prins le r'chu de d'sus l'serreveur et r'fusi de touchi à un sou d'change, notre ouaîteur réalisi tout d'suite qu'i' n'fallait pas tréjous jugi par les appathences, et il est probablye que, malgré l's oignons, i' voudrait vaie nos garçons aller en Sercq pus souvent.

En sortant de d'dans la salle à mangi, nos garçons avisirent le biau chapé militaithe au Gouverneux de Dgernesi, qu'était perdu sus l' “Hat Stand” et l'Pilote dit au bouonhomme Joe “Je sais comment que je pathaîtrethions avec une castchette comme chenna sus la tête!” Joe dit, “Je n'sais pas, mais nou peut y êprouver!” Et i' êprouvithent touos les deux. Et savous bain qu'i' faut vaie Joe dans une castchette de Général, pour vaie réellement tchi biau garçon qu'il est!

Quand i'ramontithent pour lus couochi i'trouvithent Jack d'Anneville qu'était à s'promener de long en large dans les corridors à r'garder les numéthos sus les difféthentes portes d'chambre et i' li d'mandirent, “Tchest qu'tu cherches don Jack?”

Et i' raîponni, “Le djâblye m'en veurt, je n'peux pas trouver ma boustre d'chambre, je sais bain que ch'est Numétho Tchinze, mais ouest qu'oulle est?”

Nou li Montri par iou aller, et dans p'tit d'temps i'dormaient touos comme des bainheutheurs.

A chinq heuthes du matin le Pilote était à rôder partout l'Hôtel à rêvilli les autres garçons, car ils avaient promins au Capt. Mathèt d'être au Havre Gosselin à siez heuthes. I' n'furent pas longtemps à lus l'ver, à l'exception du Jack d'Anneville, qui, malgré qu'sa chandelle était allumée, se touâni d'bord sans l'moindre souci et se rendormi bain trantchillement.

Iun des garçons en sortant d'sa chambre trouvi un compagnon dans l'corridor à cotemplier une pathe de biau p'tits souliers qu'étaient à côté d'une grand'pathe de bottes en d'hors d'la chambre d'un offici.

“Tchest qu'tu ès r'garder ilo?” i' li d'mandi?

“Ches p'tits souliers-là, man vi!”

“Pourtchi chenna?”

“Eh bain, j'étais à penser que si i'y avait une pathe de p'tits souliers comme chenna en d'hors de ma porte, je n'îthais pas avec vous à la pêche annièt!”

“Eh! Fiches-mé la paix, espèce d'imbécile, et vaint-en, il est baintôt siez heuthes!”

Dans la route i' s'aperchurent qu'il en mantchait iun d'la djaingue. Ch'tait Jack d'Anneville! Le Pilote s'en fu l'trouver et l'châtchi oquo une feis, le fit se l'ver en li disant que touos l's autres étaient à l'attendre. Comme il avait ieu l'temps de s'habillyi djaix feis et qu'nou n'en viyait oquo rain, nou dit:

“Voulons gagi qu'i' s'est oquo erperdu, et qu'i' n'peut pas trouver le c'min à r'sorti d'l'Hôtel?”

Et de fait! Nou l'trouvi enfrumé dans iune des salles en bas à châtchi les f'nêtres et à êprouver à sorti par-là. Ch'tait justement comme un cat qui s'trouve emprisonné dans un poulaillyi. I' s'trouvi d'hors à la fin et les v'là tous en route pour le baté.

Malgré touos les d'lais i' n'taient pas oquo fort opprès l'heuthe, et dès qu'ils eurent dêjeuné, Captaine mins san môteur en marche, dêhalli les lignes à maquethé et i' s'minrent à pêtchi.

Le jour se passi sans incident. A mains que nou n'compte comme “incident” le fait que Jack d'Anneville et l'Pilote faillithent de perdre lus tchullyi dans l'Gouliot au Nord de l'île.

Ch'tait comme chennechin que l'affaithe s'arrivi. Nos deux garçons étaient à la r'morque dans le p'tit baté et travaillaient lus ligne de là pour être hors de la vaie des lignes du grand baté. En passant à travers du Gouliot ouest qu'i' y avait un assez fort couothant i' passi un malheutheux ouaisé d'mé, qu'i' disaient être un oyster-catcher mais que nous appelle ichin en Jêrri une “pie-mathane”. Le bouonhomme Joe qu'avait s'n arme à bord, tithi d'sus et l'abatti. L'ouaisé, sans doute, tchi à l'ieau, et au même instant les siens d'à bord de la Valentine, lâtchithent l'amathe qui t'nait le p'tit baté et l'envyithent à la d'rive en criyant à Jack et au Pilote d'aller glienner l'ouaisé.

Ils l'ramassithent du mus qu'i' purent mais quand le grand baté ervint l'long d'ieux, le couothant le touani en travers et lus fiche une secousse qui faille d'êcraser l'Pilote et qu'envyi Jack d'Anneville les fours en haut dans l'fond du canot. I'y en avait qui diraient que ch'tait la faute au Pilote, qu'aithait deu aver êcarté un mio. D'autres diraient que Jack avait mal gouverné avec s'n avithon. Enfin tréjous i' n'y eut pas d'ma d'fait et tout l'monde fut bain amusé.

Dans l'arlevée le temps vouli c'menchi à s'êpaîssi, ch'est pourtchi nou pointi pour Jêrri, afin d'arriver d'jour si i' y avait moyen.

Arty s'mins à fricachi du maquethé mais justement comme il 'tait prêt, Sidney, le jeune Joe, et même le Pilote, qui s'étaient comportés assez bain jusque là c'menchirent à lus pliaindre du ma d'la mé, mais ch'la n'duthi pas longtemps et l'maquethé fricachi les r'mins bain vite.

J'avais mentionné d'vant, que l'Pilote avait prins la barre. Eh bain, il avait ieu l's instructions de pointer tout l'temps sus la Corbiéthe, mais que ch'fusse par manque d'attention ou par achocrise, i' perdi sa course et êprouvi à enfiler l'Alberta et par le temps que nou li halli la barre des main il 'tait pointé pour les Ecréhos.

J'entrîmes dans la cauchie à chinq heuthes et d'mie opprès une des pus agréables exchursions que nou piaisse s'imaginer. La paisson fut tout sparti êgalement, une share entchiéthe étant donnée au Caouain, avec une belle sole pour Marie Hibou, pardessus l'marchi.

Nos garçons ont bouanne idée d'y raller l'année tchi veint, et j'espéthe bain sincéthement qu'ils y r'emmen'nont le Caouain.