|
"Maître Elie" avous veu autchune chose du l'Caouain? Me d'mandi notre' Prote hier matin. J'attendions sa "copie" et j'n'avons pas yeu rain, Et i' s'sait temps d'imprimer san gniolin! Je ramonti bein vite dans sa mansarde à haut J'entri tout d'un embront, grounnant, Mais l'Caouain n'y était pas; je r'gardi coumme i' faut: L'ouaisé avait fichi san camp! Où'est qu'v'la qui r'est à couorre à la plièche d'être ichin A soigni d'san travas? je m'dis... Nos v'là don à dghêper, et nou n'le vait pas v'nin. Et l's'imprimeux qu'en sont marris!! A galoper les c'mins à s'n'âge et en plien jour, Justément quand nou veurt le vais! Je l'enviethons s'proum'ner s'i' nos joue d'itèts tours... Je m'disais en d'vallant les d'grais * * * Mais qu'i' reste, s'i' veurt, là you' qu'i' s'n'est allè, J'avons d'autre chose qui f'tha pliaîsi! I' y'a du s'no de d'siez les Messieux Simonet Pour nos lecteurs qu'aiment à s'notchi! Vaithe, une belle boête, toute neuve, est là sus not' compteux La vielle est remplièchie ach'teu! L'Caouain a dispathu mais nos lecteurs, ch'est seux, S'consol'lont ove de tchi miyeu! Elie Les Chroniques de Jersey 6/10/1917 |
Viyiz étout: