Duthant les dernié treis s'maines, je n'avons pas quâsi fait aut'e chose, notre jeune fille et mé, que d'vendre des formes pour des affidâvits par sus l'conteux.
J'en fit la r'merque à un moussieu qu'est versé dans l's affaithes de taxation, et j'li d'mandi comment qu'chenna s'faisait qu'à chute saison ichin touos l's ans, i' y avait une telle demande pour ches dotchûments-là. Est che que les Comités en font un jeu, et lus amusent à taxer les gens mal-à-propos pour aver l'fanne de les vaie v'nin lus pliaindre?
"Oh!" qu'i' m'raîponni, "i'y a p't-être bain un p'tit mio de ch'la, mais man pouore Caouain, i' n'faut pas qu'tu penses que touos les affidâvits qui sont accatés ichin sont enviés ès Connaîtablyes! I' n'y en a pas seulement la maintchi! Tu vai, ch'est bain aîsi pour un homme de s'en v'nin ichin dans vot'e bureau faithe la pliaîgnole, et blaguerder les membres du Comité, accater un affidâvit, et s'vanter comment qu'i' s'en va vos arrangi l'Connaîtablye et touos l's individus qu'ont complioté ensemblye pour le hauchi d'une tchinzaine de quartchers. Mais quand i' s'agit d'aller s'plianter d'vant un Juge, et l'ver la main drouaite en juthant solennellement que nou n'possède qu'un certain montant d'mobilyi, ch'est une difféthente affaithe.
"I'faut être bain seux que nous est à affirmer la véthité, ou bain avèr assez d'apliomb pour en ristchi les conséquences, si ch'est autrement, car tu vai, un homme qui juthethait un faux affidâvit pouorrait bain aver à passer d'vant l's Assises et p't'être attraper uncouplye d'années d'prison."
I'n'y avait pas djaix minutes que chu moussieu-là était sorti que Maît'e Cliément d'Caen vint nouos prouver la véthité de tout ch'qu'i v'nait d'nos dithe.
"Bonjour Mess de Caen."
"Bonjour! J'sis v'nu cherchi un affidâvit!"
Notre demouâiselle li en passi iun et l'bouonhomme la payi.
"Le Chef est-i' la?" s'fit Maît'e Cliém.
"Oui dja! Il est à êcrithe dans sa p'tite office."
Le bouonhomme ne s'fit pas inviter mais entri tout grand, sans tapper, une chose que l'Chef ne peut pas souffri sus autchun compte. Je pensais qu'i s'en allait y aver du brit, mais nouffait, le Boss le r'chu assez amicalement.
Mé, je m'en fus coller m'n ouotheille au creux d'la cliè et v'chin la conversation que j'entendi.
Le Chef. – "Eh bain, Maîte Cliém, tch'est qu'i' y a qui n'va pas bain?"
"I'y a que j'sis v'nu cherchi un affidâvit! Savous-bain que ches peûles-lâ de d'sus l'Comité de Taxation veinnent de m'hauchi de tchinze quartchers! Chute feis je m'en vais d'vant un Juge, par exemplye! Je m'en vais montrer au Counaîtablye et à ches ouaîsiaux-là si ch'est qu'nou peut s'fichi de Cliément d'Caen d'la maniéthe!"
"Ous êtes tout-à-fait libre de l'faithe, sans doute, mais avous bain réfléchi à chein qu'ous allez faithe?"
"I' n'est pas qu'faithe de réflexions!" s'êcryi l'bouonhomme, "je paie dêjà trente quartchers de mobilyi, qu'est de la maintchi trop, et i' veulent me tapper à quarante chinq! Ah! du bé – daimme si j'paie un quartchi d'pus que je n'fais achteu!"
"Ne vos excitez pas, Mess de Caen," se fit l'Chef, "mais examinons don la chose un mio."
Et i' prins san crayon et un morcé d'papi.
"Combain qu'ou gardez de ch'vaux?"
"J'n'ai qu'là Cocotte, et ou n'est pas jeune acheteu, y a bêtôt vingt ans que j'l'ai."
"Bon, pas grand valeur alors, une tchinzaine de louis?"
"Oh! wait a bit, dja! Je n'la vendrais pour quarante!"
Le Chef mins bas un chiffre sus san papi.
"Des bêtes-à-cornes, ous en avez sans doute?"
"Vaithe, chinq vaques et deux g'niches."
"Des bricoles, probablye, ch'est-à-dithe des vaques à lait ordinaithes."
"Que tchi? I'sont toutes du "Gamboge," gâsdéouelle! J'en ai r'fusé chent louis la pièche!"
Le Chef souôrit un mio et fit une autre merque sus l'papi "Combain d'cassées d'patates?"
"Vingt-six chents, mais ch'n'est pas du mobilyi chenna, ch'est pour mettre â pouorri dans la terre!"
Le Boss raîponni, "Le Comité ne s'otchupe pas de tch'est qu'ous allez en faithe, ou'l' avez siez-vous n'estche pas?"
"Vaithe, mais... "
"Faut les mettre à un êtchu la casse."
"Ecoutez Moussieu, je n'sais pas pourtchi qu'ous êtes à abafouer man fait comme chenna. D'la pliante comme la meinne vaut treis chelins!"
"Exactement," s'fit l'Chef, "mais au point d'veue de Taxation, you know."
"Ah vaithe, ch'est vrai, i'n'faut pas crier trop haut."
Le Boss, sans que l'vi s'en aperchusse, le fit êvaluer van, hernais, tchéthues, enfin tous san montage de ferme, jusqu'à treis tonniaux d'guaîno qui sont souos l'shed.
Opprès aver mins tout bas, i'li dit comme chenna!
Et des valeurs, Maîte Cliém! Ou n'êtes pas sans aver des sous d'pliaichis d'une carre et d'l'autre. Tout l'monde sait bain qu'ous avez des shares dans l'Gaz.
Vaithe, j'vos les vendrai s'ou voulez!
Peut-être bain, mais ne nos êcartons pas d'la tchestion. Ous avez éttou un certain montant à la Banque.
Sans doute, mais j'ai oquo à apprendre que chenna concerne mes vaisins!
Du tout, mais ou viyiz, si l'Comité n'est pas informé, i'faut qu'i' d'vine. Et pis, chennechin est entre nous, je vos vi l'autre jour dans la Banque Massiot, et je m'douti bain qu'ous étiez à faithe tchique bouanne transaction.
Je n'me trompais pas j'sis seux.
Nan, comme i' s'adonne: Avec l'êchange au taux qu'il est j'en profiti pour mettre un couplye d'chents louis dans l'Crédit National.
Magnifique! Et je suppose qu'un rusé vier financier comme vous n'a pas laissi le "Cinéma West" se présenter sans y aver souscrit libéralement?
"Oh, là, j'y ai prins treis chents actions ordinaithes, et je m'attends qu'i' s'en vont payi bain cheuses-là. Tch'est qu'ous en criyez, vous?"
Le chef raîponni qu'il 'tait de ch'tte opinion-là ettou, et opprès aver fait un rapide calchul i' dit à Maît'e Cliém, "Mess de Caen, inutile de vos asseuther que je respecte les confidences qu'ou v'nez de m'faithe, et i' n' y a pas d'dangi que j'pâle à tchi qu'che sait de votre situation financière, mais faites mé l'pliaisi d'étudier pour un moment chute liste ichin. Ous allez vaie que si votre Comité vos avait mins à quatre vingt quartchers, à la pliaiche de quarante chinq, ous en r'pathéthiez oquo à raide bouan marchi"
Je n'resti pas à en êcouter pus long, mais i'restithent oquo un p'tit quart d'heuthe à pâler ensemblye, et bétôt v'là la porte qu'ouvre et Maît'e Cliém qui sort. I dit à Miss Chose en li s'offrant s'n affidâvis: "Je trouve qu'opprès tout, je n'aithai pas besoin d'chu papi ichin, donnez-mé en cas, un patchèt d'enveloppes à la pliaiche."
Caouain
17/2/1923
Viyiz étout: