|
Pouorr' Bram! Est-i' bein vrai qu'tu'es hors? Qu'à t'n'hus est v'nue taper... la Mort? Qu'i' t'a fallu rêpondre et t'en aller, Nos laissant tous ichin à te r'gretter. Surprins de t'vaie dêjà d'l'autr' bord? Tu'avais un don, châtchun l'savait, Et pas muchi souos un bouossai'! Pour trente ans d'temps tu fis tréjous d'tan mus Pour faithe les gens s'amuser un p'tit pus Qui n'éthaient peu, sinon pour tai! Tu n'prêchais pon de longs sermons, Tu n'pâlais pon dans l's'êlections; Mais la gazette te servant d'tchaithe et d'strade, Tu faisais rithe touos les esprits malades Ov' tes êcrits sus tant d'tchestchons! Ta mission, ch'tait d'nos faithe du bain, D'cachi les nèthes idées bein lliain, D'nos faithe oublier les minzéthes d'ach'teu' En riant le sai', assis aupi du feu, Ov' y'un d'tes êcrits à la main! Tu'as fait d'tan mus, en êcrivant, Pour faithe rajeuni les vielles gens, Et pour faithe arrondi toutes les longues faches Oubliant peines, plieurs, chitchettes et triaches, Quand nou s'abusait en t'liêsant! Tu'as fait ervivre l'vièr Jerriais, Tu'êcrivais dans l'langage d'autr' fais, Et tout Jerry t'en a 'tè r'connaissant! Pouorr' Bram Bilo, qu'les Jerriais aimaient tant, Je n'verrons pus tes êcrits en patouais!
|
Viyiz étout: