Un jour coumme j'étais à la barre - ch'tait unne reue tout d'même, mais nou dit tréjous à la barre; ch'tait à bord de la "Canne-à-puche" (Canopus) et y yien avait assais de puches dans l'châté; j'nos en allaiêmes à la côte; la vieille barque était à sa chentième fais à croiêzi, mé ch'tait ma trente-neuvième fais; la vieille Canne-à-puches connaissait san qu'min mus qu'mé; en sortant Jerri nou pouvait li lachi ;a barre, et la laissi s'en allé toute seule; ch'nest pas êtonnant après avait fait le viage tant d'fais.
Eh bein mé et l'Cap'taine, j'taîmes à paûlé dé not jeunne temps; j'avaîmes 'tai vais les filles ensemble; - dans la "Canne‑ à-puche le Captaine peut bein paûlé à l'houmme à la barre; ch'nest pas coumme dans les "steam," ouest que nou zi vait "don't talk to de man at de wheel;" eh bein j'taîmes à paûlé coumme je dit, quand le mousse arrive, y l'appelaient "Niggar," et j'en 'tait yieun, un nigger, il 'tait pus né qu'un nègre, haut coumme un pot d'cidre, et d'unne vingtaine d'annaies; y venait du fond d'L'êta à Saint-Ou. Ses prumièthes annaies avaient 'tait passais à brûlé du vraicq pour faithe de la chendre et il en avait la couainne toute jaune, coumme le ventre d'un macqthé après qu'il a 'tait fumai; la caleu du feu de vraicq yiavait arrêtai sa crututhe, à chain que nou dizait, car san peupaie et sa meumaie 'taient haut coumme des p'tits boies, et s'pendant l'pèthe s'app'lait un Mess Le Bas. Y venait de qu'zi du tcherbon dans l'fore peak, et il 'tait tellement né, que d'la sie n'l'étheait pon gnerchi; il avait suai et y r'lîzait coumme unne pieumme de paen; j'vos asseuthe qu'il étheait fait un drôle de portrait, sa meumaie n'l'étheait pon ercounnu, ah nan dghia, il avait l'air tout paîneux, y s'appréchi du Captaine, mais pas de trop près, et pis y l'y dît: Cap'taine, quand nou sait ouest qu'unne chose est, est alle perdue? Eh nennin se fît l'Cap'taine, bachouard que tu es; quand nou sait ouêst qu'une chose est, et que nou zen a besoin, eh bein nou va la qu'zi là. Eh bein se fît "Niggar," le bouquet est hors le bord! (y'l'avait perdu en halant d'liau pour se lavé) et pis y filit, y n'restit pas deux pids dans un soulié; ah si l'Cap'taine avait peu mettre la main d'sus, y yien étheai dounnait du bouquet hors le bord; mais j'étheai 'tai sus san dos, ou p't'être bein un p'tit pus bas; je crai qu'ses braies en étheaient 'tai d'pièthe; mais heutheus'ment pour li, il 'tait si maniga, qu'il en êcapit. Une tête viède.
Viyiz étout: