Trenton,
Michigan, U.S.A.
Lé 2 d'mai, 1981.
Moussieu l'Rédacteu,
D'après les délibéthâtions d's Êtats dans la gâzette dé Jèrri du chînq dé mar, qué j'veins d'èrchéver, Jèrri veint d'en êcapper d'eune belle, man bouanhomme! Êcappé du mange-sou qué la louai pour rêcompenser les cheins tchi sont hors dé travas éthait couôté à l'Île. J'avons eune louai d'même en Améthique, et l'abus qué ch'la engendre, partout l'pays, est ieune des choses qué nouot' nouvieau Président Reagan a promîns d'rectifier, car les membres du Congrès à Washington ont peux dé l'faithe ieux-mêmes. Il' ont peux d'pèrdre les vouaix d'lus constituants tchi sont membres des unions.
Lé mal en est qué l'ouvriyi peut généralement gabather sus chein tch'i' r'chait comme rêcompense pour san manque dé travas, et i' n'êprouve pon à r'trouver d'l'empliai quandi qu' les sou lî veinnent sans travailli. Ichîn en Améthique les unions - armées auve lé drouait dé s'mett' en grève pour la maindre des choses - ont graduellement forchi l'agrandissement du montant payabl'ye par sémaine pour lé manque de travas à eune somme tchi r'présente dans les nénante pour chent d'lus gages. Et auve lé manque dé prîncipe tch'est l'ordre du jour à ch't heu, i' s'en arrive qué ch'n'est pon la peine dé travailli si nou peut vivre sus lé dole.
Il est grand temps dé r'vénîn à la sagesse, l'îndustrie et l'honnêt'té d'nouos anciens tchi mênageaient à mett' deux-s'trais sou d'côté d'lus gages dé dgiex-huit ch'lîns ou un louis au grand pus la s'maine pour souangni d'la probabilité d'manque dé travas ou d'maladie, et qué ch'tait considéthé eune honte d'êt' sus la pâraisse. Sans doute i' y'avait d's aubèrges tchi mangeaient un mio des gages des gens, mais y'a huiptante ans et pus ch'tait eune pétite minnorité tchi les hântaient. Heutheusement i' n'y avait pon d' discothèques ni d'louai tchi pèrmettait d'jouer ès sou (gamble en Angliais) comme dé nouos jours. Et ch'est d's êtrangiers tch'ont întroduit chutte niaîsance dé discothèques en Jèrri, et tch'en profitent. Si l'ouvriyi m'ttait eune pétite partie d'ses gages dé côté à la pliaiche dé les fliaûner dans des pliaiches dé même, i' n'éthait pon bésoin dé s'fier sus la pâraisse ou l'bein du publ'yi pour souangni d'li quand l'travas manque.
En liêsant l'articl'ye dans la gâzette tchi nouos dit qué l's autorités sont en train d'embelli La Route du Mathais à St. Ouën, j'ai 'té surprîns d'liéthe qué chutte route et mus connue comme Hydrangea Avenue. Tchi niolîn! Ch'n'est danme pon des Jèrriais, tchi la connaîssent mus par chu mênom-là. J'ai quasi nénante ans, et j'l'ai tréjous connue par san vrai nom, La Route du Mathais. Et ch'est seux qu' les Jèrriais St. Ouënnais la connaîssent dé même étout. Ch'est honteux d'constater tch'i' y'a d's êtrangièrs tch'êprouvent tréjous à mênommer les routes et contrées. Un exempl'ye est l'mênom Dumarais donné à la boutique au Haut du Mathais. Lé carrefour finnitha par êt' connu d'même étout.
J'tais content d'vaie les portraits des Mielles dans la gâzette. Mais j'tais êtonné d'y vaie du geon. Est-ch' dans Les Blianches Banques? Jé n'mé r'souveins pon d'aver janmais veu du geon dans Les Mielles.
Lé portrait m'ramémouaithe qué j'ai marchi la londgieu d'La Route des Mielles bein des fais dans ma vie. En septembre mil neu chent trais, Papa L'Feuvre (1836-1903) 'tait malade. Il avait eune teunmeur sus l'chèrvé et n'y'avait pon d'espéthance tchi s'èrfîsse. I' fut décidé qué j'îthais d'meuther siez Parrain et Marraine, Maît' Fraînque d'Aubert et sa femme, née Ann Georgina L'Feuvre (1865-1957), à La Mouaie à St. Brélade. J'allais à l'Êcole du Dînmanche à l'Églyise dé St. Georges, et ayant fait neuf mais d'l'année dans ma clâsse, i' fut décidé qué j'èrveindrais d'La Mouaie siez Papa à La Forge toutes les s'maines au sanm'di pour finni m'n année à St. Georges et gângni man prix d'Êcole du Dînmanche. Lé prix 'tait considéthé d'conséquenche dans chu temps-là viyant qu' un mousse né possédait pon grand chose autrément qu' ses habits. Ch'est en tchi, pour trais mais d'temps j'marchis d'La Mouaie à St. Brélade à La Forge ès Landes touos les sanm'di l'arlévée. J'pâssais la niet siez Papa, j'allais à St. Georges lé Dînmanche matîn et pis jé r'marchais à La Mouaie l'Dînmanche l'arlévée tréjous par La Route des Mielles, sans doute. Y'avait bein chîn milles dé La Forge à La Mouaie.
J'm'èrsouviens qué j'trouvais la route longue et enniente. Ch'tait rare qué j'viyais pèrsonne en c'mîn. Papa mouothit dans les temps d'Noué, 1903, et au c'menchement d' 1904 j'allis à l'Êcole du Dînmanche à l'Églyise dé St. Brélade. Ch'tait Moussieu John Èrtu Balleine tch'était l'Recteu dans chu temps-là, un raide bouan vièr Jèrriais dans l'âme. Honneu à sa mémouaithe.
George d'La Forge
Viyiz étout: