Le Ménage ès Feuvres,
St. Ouën.
Lé 10 d'juin 1967.
Moussieu l'Rédacteu,
À ch't heu qu'm'èrvéla à St. Ouën, j'peux marchi par les c'mîns et r'vaie les pliaiches fanmiliéthes quand j'tais mousse. À L'Êta, y'a la p'tite forge à côté d'la carriéthe au bas du Mont Hueûlin où-est qu'man papa r'griyait et trempait l's ôtis pour les cârrieurs tchi travaillaient pour Mait' Ph'lippe Gallichan tchi la louait d'la pâraisse. J'y'allais auve papa au sanm'di, dans la p'tite forge. Tout l'monde travaillait siex jours la s'maine dans chu temps-là.
Francis Le Breton, fis Edouard (sa m'mèe, Eliza Ann Le Feuvre, 1851-1929, 'tait nouot' couôthinne dé liain), d'meuthait d'l'aut' côté d'la route dé la p'tite forge, et jé jouais auve li. Y'avait un p'tit canné l'long d'la muthâle du côté d'la forge. Nou l'clièrgissait bein et nou m'ttait des p'tits buts d'bouais d'dans au haut. Nou l's app'lait des p'tits batchieaux, et pis nou les suivait comme i' d'valaient l'canné. Quand i' v'naient au bas du mont nou s'disait tch'il' 'taient dans la cauchie. L'pouorre Françot L'Breton mouothit janne. I' m'sembl'ye aver ouï qué ch'tait la conseunmtion tchi l'emportit. Y'en avait un tas tch'en souffraient quand j'tais mousse.
Dans la forge, papa r'griyait et trempait un tas d'chantepèrches qu'les cârrieurs faithaient sèrvi pour faithe les creux dans la pièrre pour y fouôrrer la dynnamite ou la poudre. Dans chu temps-là - y'a septante ans - il' appelaient dêjà ches chantepèrches-là des dganm'peurs (d'l'Angliais Jumper). I' fallait tréjous s'mett' à l'abri quand i' faîthaient sauter les minnes dans la carriéthe pour qué les pièrres tch'étaient soûffliées en l'air par l'explosion né vouos tchîssent pon sus la tête!
Mait' Ph'lippe Gallichan, tchi faithait valer la carriéthe, 'tait prédicateur Wesleyen. Ch'tait li tch'avait l'contrat d's Êtats pour bâti et machonner les talustres dans la Baie d'St. Ouën, et i' d'meuthait au Champ Donné, auprés d'La Chapelle Wesleyenne. En politique il 'tait Rôsyi, et il offensit papa hardi eune fais quand i' li ouffrit des sou pour voter pour les Rôsièrs. Ou' pâlez tch'il 'tait mârri, l'pouorre vièr papa, li tch'était ordinnaithement doux d'caractéthe! Quand i' r'vînt siez nous chutte séthée-là, i' dit à manman: Penses, don, Ann, qué l'Sieur Gallichan voulait faithe un vieau d'mé! Et li tch'est prédicateur! Mé, tch'est ieune des vielles réchinnes du Louothi! Lé Sieur Gallichan pèrdit l'respé d'papa chutte fais-là!
J'en ai-t-i' fait, des p'tits pas, à d'valer et ramonter l'Mont Hueûlin dans mes p'tits jours! Et pus tard, La Route des Mielles. Quand papa 'tait sus san liet d'mort en 1903, et qué j'm'en allis d'meuther à La Mouaie à St. Brélade, y'avait acouo trais mais à faithe pour finni l'année d'Êcole du Dînmanche à St. George, et j'marchais d'La Mouaie ès Landes touos les sanm'di arlévées pour aller à St. George lé Dînmanche matin, et j'm'en r'allais à pid à La Mouaie l'Dinmanche l'arlévée. I' m'sembliait qué j'n'arriv'thais janmais au but d'chutte Route des Mielles! Et tchiquesfais jé n'rencontrais pèrsonne - ni autcheune vouaituthe - sus toute sa londgeu! Au jour d'aniet ch'est quâsi au risque d'sa vie qu'nou-s-y marche, atout touos les motos tch'y sont jour et niet!
Oulle en a veu, La Route des Mielles. J'liêsais dans un vièr almonnas qu'en l'année 1356 la mé englioutit eune assez riche êtendue d'tèrrain à St. Ouën, et qu'La Forêt d'la Brecquette fut renvèrsée par un affreux ouragan. Ch'en est p't êt' eune réchinne d'un bouais d'chutte forêt-là qu'j'eux la chance dé ramâsser dans la grève y'a deux-s'trais ans quand ou' fut dêgradée par la grand' mathée. I' pathaît tch'i' y'en avait un tas qu'nou pouvait vaie justément d'vant m'n arrivée en Jèrri à ches drein.
I' pathaît, étout, d'aprés ch't almonnas-là, qué ch'tait dans l'année 687 qué la p'tite île sus tchi l'Châté Élizabeth fut bâti, fut s'pathée d'la tèrre fèrme à St. Hélyi.
Lé mème almonnas nouos dit qu'en l'année 1495 un grand banc d'sablion fut env'yé au pliein d'la mé par eune tèrribl'ye tempête, et qu'eune grand mé montit et ensev'lit la longue êtendue d'tèrre au ouest d'l'île, et qu'les grands vents d'ouest souffl'yîdrent lé banc d'sablion sus la tèrre et en fîdrent un d'sèrt. Né v'la les mielles et les Blianches Banques que j'viyons au jour d'aniet!
Y'a eune histouaithe întérêssante mentionnée étout. Ch'est qu'la maîson d'un Moussieu des Saints Gèrmains fut ensev'lie par lé sablion, et tch'i' fit m'suther l'île en londgeu et en laize, et pis i' bâtit eune neuve maison au mitan - tchi s'trouvit dans la pâraisse dé St. Louothains. I' pathaît qu'la maîson des Saints Gèrmains d'à ch't heu est bâtie sus l'empliaichement d'chette-là. S'n histouaithe est mentionnée en dêtail par Madanme Joan Stevens dans san mangnifique livre sus les vielles maîsons d'Jèrri.
Quand nou pense qué La Forêt d'La Brecquette n'était qu'eune partie d'La Forêt d'Cissy tch'allait jusqu'au Mont St. Miché en Nouormandie, fallait-i' qu'y en eûsse eune belle forêt dans ches vièrs temps-là où-est qu'la mé est à ch't heu!
George d'La Forge
Viyiz étout: