Quand veint l'êtè et qu'nou sue tant
Faut changi d'cauches de temps en temps,
Ch'n'est pon qu'mes pi'ds - ou comprenèz...
Mais nou-z'est mus s'i' sont bein nèts!

De même, j'men fu', coumme je disais,
A man tout seu' hors de la vaie;
J'm'assiévi sus un gros rotchi,
En prenant soin de n'pas m'drotchi.

Et mes cauches hortes, mes pi'ds touos nus
Dans une grand' mathe je fis d'man mus
Pour rafraîchi mes pi'ds brûlants,
Mangeant tchic bênits en même temps!

Je v'nais d'en êcaller un bé
Quand, tout d'un coup, - bon! Tch'est que j'vai'
S'en v'nin marchant, le nez en haut
En néthe casaque, tout coumme i' faut?

Je r'counnu' tout d'suite le moussieu
Que j'viyais v'nin à san tout seu
R'gardant e'tou' d'li et respithant
A pliens poumons, en se r'dréchant.

La pannèe d's casaque au vent,
I' marchait bouan rond sus l'chiment;
Et viyait tout alentou' d'li
Le ciel, la terre, la mer, l'rotchi!

Ch'tait, l'craithait-'on? Ch'tait Mess Bisson!
S'en veint-i', je m'dis, au paisson?
Et mais, pas dans ches habits-là,
Il y gât'tait san bieau nièr fa!

Tch'est don' qui s'en veint faithe ichin
A san tout seu' 'not' vier ammin,
Ov san chapé d'paille à sa main?
- Pour de me, j'n'y comprenais rein.

J'le r'mèrtchais s'n'aller à bouans pas
Coumme un houmme content d'san travas,
Je l'vi' s'assiéthe, au but d'un temps,
En d'sous d'la banque sus un p'tit banc!

Si che n'tait pon là Mess Bisson,
Qu'je m'dis, - j'éthais p't'être un soupçon:
Assis sus les bancs d'par ichin
Y'où qu'les coupl'yes ont amor de v'nin!!

App'yè sus l'bord de man rotchi
J'le r'gardais d'même, - d'la carre de m'n'yi,
Et essuyant mes pi'ds, j'disais:
Il a l'air content y'où qu'il est!

J'ne r'pensi pus à Mess Bisson,
J'm'en r'fu' tout drait à la maison,
Mais Samedi, dans la gazette,
J'comprins, san tou' par la Collette!

Pour que sa gazette fusse rempl'yie!
I' y'avait 'tè pour d'la "copie"! -
Mais chein qui m'fait l'pus d'mal au tchoeu
I' n'dit même pas si' m'avait veu!

Elie
1913