Aniét l'12 de Juin 2010, et couomme normale ch'est auve pliaisi que me r'vella, Clifford Laisney a vos presenter tchique histouaithes dans m'n'ancienne langue jerriaise.
Une matinée la s'm'naine passée j'tais a m'n'aise alouangnyi dans l'bain reflétchons sus mes pensées, quand m'idée toun'nit sus la tchestchion d'la lettre jerriaise que Brian Gilbert m'avait invité d'presenter pour aniet. Ch'n'ést pas trejous éasyi d'choisi un sujet convenablye suppliant a une audience variant en age d'ecoliet a adulte. Etout ayant presenter la lettre depis 1987, nou c'mmenche a s'gratter la tête pour un sujet apropos.
Enfin, aniet j'm'envais vos raconter trais p'tites scenes de ma jeunesse, des examplyes d'inéxpérience. J'em rapelle de iune des premié occasions que j'monti sus une bike. Ch'tait une bike tch'appértchennait a iune de mes soeurs. Y'avait une pente dans l'bel d'la ferme ouaiq'je d'meuthaimes a St Jean. Y'avait des batisses tout l'tou du bel et j'arrivit à la muthaille des établyes pus vite que j'en pouvez trouver l'frein, le resûltat etant que j'perdit mes dents de d'vant au meme temps fendant l'nez, nécéssitants une visite siez l'docteu.
Suivant la d'gerre, en 1946 la majorité d'jeune ganmins de m'n'age accatites une moto-bike. La mêne 'tait une Royal Enfield, une mota tch'avait fait service dans l'armée angliaise. J'crai q'j'en payi £75 louis. J' t'aimes si ordgilleux d'avait not Moto-bike, car ch'tait une attraction es hardelles. Une jeune fille se pliaisait mus sus l'cossinet d'une moto-bike que d'marchi a coté d'son galant poussant sa bike. Bein seux fallait passer un examen, un 'test' devant gagnyi sa licence. J'em r'appelle si bein le jour de mon test. Ch'tait d'vant touos les changements d'l'esplanade et l'waterfront. Arrivé au but d'la cauchie Albert, au coté des abbatoirs, accompagnyi d'mon frèthe, le Sieur Harold Miche m'attendait. I'm donnit mes instructions de suivre la route j'usqua l'esplanade, touonnant a drouaite jusqu'a la Pomme D'or et pis ervener sus la route au d'vant d's abbatoirs. Ayant prins toutes précautions d'vant l'depart, car j'avaits bein lieu le Highway Code, me v'la en route. Les pus anciens d'vous lus rappel'thons qu'avait une petite ile tchi faisait un trais carre au but d'la cauchie en arrivant sus l'esplanade. Y'avait un signe disant 'Keep Left' (Garde a Gauche). Probabliement cause de nerfs, j'ignori le signe et gardi a ma drouaite. En r'touannant au point d'mon depart, le Sieur Miché m'arréti et m'dis qu'j'avaits fait un erreur sus ma course, mais tchi m'donn'thait une deuxieme chance. Je le r'mérci, et acquo une fais, main a la drouaite signallons m'n'intention d'prende la route, me v'la hors. Arrivant au trais carre, 'Garde a Gauche', mais nannin, acquo une fais j'fis la meme meprinse. Bein seux, quand j'arrivit au point d'mon depart, l'inspecteu m'dit qu'j'avaits failli m'n'examen et m'donnit la raison pour. J'en pouvaits pas craithe ma bétisse. J'vos garantis que quand j'prins mon test pour la deuxieme fais j'tais bein assuther d'ma drouaite de ma gauche.
Devant que'je c'mmenchi mon fermage, pour trais ans, de 1955-1958 j'tais contre-maitre a la Ferme d's'Etats. Dans chais temps la ch'tait une ferme d'experimentation. J'craissaimes au meme 15 a vingt varietees d'patates heuthive et tardive. Tout l'progrés, d'pis pliantage au defouissage tait r'corder et les resultats utilisées a l'avantage, j'espethe des tchuitivateurs de patates.
J'm'en vais vos raconter une occasion d'experimentation concernant une recoite de broc'llis, une recoite tchi d'vint hardi d'valeu comme export. Le Directeu du jour etait un Moussieu Johnston, un charmant homme auve tchi qu'j'avaits un bouon rapport. Y fut décidérque j'pliantaimes trais vregis d'broc'llis, du Nov/Dec. Un coup etablyis, couomme experiment y fût décider d'applitchi une pinchie D'Nitro-Chalk (du Pousse Chu) a chaque pliante. J'em fimes autant, mais auprés tchique jour, j'mapperchu qu'les pliantes avaits l'air malade, et iun par iun y s'etrav'lées comme des soudards bliéssés. Le Nitro que j'avaimes semé avait fait contacte auve le tigot, resultant dans la brulation d'ia pliante. J'tais malade de penser que j'avaimes perdu trais vregis d'broc'llis, mais Moussieu Johnston m'r'assuthit en m'disant. 'N'te fait pas la bille, ch'est un experiment, j'avons preuvé que contacte du nitro et l'tigot n's'accorde pas.'
J'pense bein que la seule manniethe d'apprenre est par ses bétises.
Ayiz tous une bouonne semaine
A la prechaine.
Clifford Laisney
Viyiz étout: