Les officièrs dé L'Assembliée d'Jèrriais 'taient bein contents d'vaie passant 280 personnes à l'Eglyise dé St. Ouën pour lé service annuel, dînmanche, l'30 dé Juîn. Il' avaient grand r'gret qu'i' n'y avait pon assez d'fielles auve les cantiques pour tous, mais il' asseuthent les gens qué chenn'chîn essa r'miédgi pour le préchain service.
Ch'tait eune occasion spéciale, quand tous qui voulaient pouvaient lus rêuni ensemblye pour servi et louangi l'Bouan Dgieu dans la vielle langue.
Lé Rév. E.J.A. Richardson, M. ès A., l'Recteu d'la pâraisse, condit l'service et fît les priéthes en Français, et duthant l'couothant du service fît la beinv'ue au Rév. L.F.M. Helleur, M. ès A.
Les leçons
La preunmiéthe leçon, lé 55ième chapitre dé la prophécie d'Esaie, fut liue par la Dlle. Ruth Amy, et la deuxième, lé 13ième chapitre dé la preunmiéthe êpitre aux Corinthiens, fut liue par le Président. Ches deux leçons avaient 'té traduites en Jèrriais par deux membres dé L'Assembliée.
Lé Rév. Helleur, qui prêchi san sermon en Jèrriais, dit qu'i' 'tait bein content d'vaie d's amîns d'partout l'île à partagi dans chu service dans la vielle langue Nouormande, et qué ch'tait eune bein bouanne idée d'L'Assembliée d'en aver iun, pour donner l'opportunité ès gens d'lu y rêuni au mains eune fais par an.
Moussieu Helleur prînt san texte dans ch;qu'i' dit 'tait l'pus merveilleux chapitre des êpitres, lé sien qu'avait 'té liu pour la deuxième leçon, les patholes dé St. Paul entouor les trais vertus. Et en compathaison i' dit qué les fonds d'l'Eglyise 'taient l'Trésor et la Charité; j'avions l'Trésor dé l'Evangile, et combein qu'i' nos valait? La Charité, comme j'la connaîssaîmes, 'tait pour aidgi ès pauvres, mais i' n'y avait pas un mot en Angliais ni en Français pour l'explyitchi, même en Grec. L'amour n'tait pon compliet, l'amiêtchi, la sympathie, la bonté n'taient pas assez car, comme l'Apôtre dîthait, sans la Charité l'homme n'est rein du tout.
La Charité est eune qualité qué l'Bouan Dgieu donne ès siens qui lî d'mandent. Lé monde d'à ch't heu' cherchent la paix, mais n'la trouvaient pas dans touos les pliaisièrs qui suivaient.
Un appel
Lé Rév. Helleur finit par un sîncéthe appel à tous: d'accepter la paix du Seigneur, qu'est là pour tous qui veulent l'accepter, et sus toutes choses dé n'arrêter pas trop tard dévant dithe oui à nout' Seigneur.
Duthant l'service, les cantiques - "Grand Dieu, nous te bénissons," "Tout mon coeur s'enflamme," "Il est un roc séculaire" et "Jamais Dieu ne délaisse," en Français, et "Ta Majesté, O Seigneur Dieu", eune adatation en Jèrriais par lé Sieur G. Le Feuvre d'un cantique Angliais, fudrent chantés dé bouan tchoeu par la congrégation et les membres du tchoeur, auve lé Sieur D. Hacquoil, l'organiste dé l'Eglyise, à jouer la nouvelle orgue.
Viyiz étout: