A bein près 200 personnes, membres et autres dé partout l'Île, lus rêunîtent à la Chapelle dé Wesley-Grove lé 26 d'juin pour lé service annuel. Au c'mench'ment du service, lé Rév. Ernest Harrop fit la beinv'nue à tous d'la part des sétchestres dé la chapelle, et auprès, annoncit les cantiques et fit les priéthes en Français.
Les leçons
La preumiéthe, lé chent-douzième psaume, fut liue par Mme. Alice Blampied; la deuxième, partie du chînquième chapitre dé la deuxième êpitre au Corinthiens, fut liue par lé Président, lé Député A. C. Quérée. Ches leçons ayant 'té traduites en Jèrriais par deux membres dé L'Assembliée.
Lé sermon
Lé Sieur Ed. de Gruchy, iun des prédicateurs locaux d'la Chapelle Méthodiste, en bouan Jèrriais, nos paslit sus l'texte qu'il avait chouaisi - "Jé sommes des embassadeurs dé Christ". Auprès aver explyitchi comment qu'des embassadeurs erpresentés, dans bein des cas, lus gouvèrnément, et en donnaient les voeux dans l'pays où'est qu'ils 'taient env'yés, lé Sieur de Gruchy racontit entouor deux jannes êtudiants Français qui 'taient v'nus en Jèrri pour la preumié fais et n'rencontrîtent en pus qué des gens qui paslaient l'Angliais, et en r'vénant siez ieux dîtent à lus pathents qui n'y avait pus d'Jèrriais ichîn, mais auprès aver fait des dêmarches pour rester dans la campagne la deuxième fais, en r'venant siez ieux, 'taient si rêjouis d'aver pasler en Jèrriais tout l'temps. Tchi difféthence dé portrait!
Ch'est l même chose avec les personnes qui r'présantent la vie chrêtienne et spirituelle - ch'est si facile dé donner un mauvais portrait.
"Jé sommes tous eune famille," dit lé Sieur de Gruchy, "j'avons tous bésoin iun d'l'autre, faut aver d'l'amiêtchi parmi les peuplyes, et entre des gens qui s'entre connaîssent pas."Comme exemplye, L'Assembliée ayant 'té en France et en Dgèrnésy, et rencontrer des gens et faithe dé bouannes connaissances avec bein du monde.
Ayant 'té à Londres i'y a tchiques sémaines, lé prédicateur avait rencontrer eune janne fille qui 'tait aveugle et qui s'en va en Afrique aidgi ès siens qui n'sont pas si bein comme lyi - eune embassadrisse pour Christ sans doute.
Comme embassadeurs, faut qu'les gens s'èrconcillent avec Christ, et lus soumettent à chein qu'I' veurt qui faiche, pas chein qu'les gens chouaissisent pour ieux-mêmes. i' faut d's embassadeurs dé la paix dans l'monde, et par nos actions ch'est possiblye dé faithe un monde pus aimablye, comme un certain Jèrriais, qu'avait 'té Chent'nyi et qui 'tait seux qué ch'tait sa fouai en christ, et l'influence dé Christ dans sa vie, qui li avait aidgi à ram'ner tant de monde ensemblye.
Un aut' exemplye fut l'histouaithe d'un janne homme qui travaillait dans l'office d'eune gazette, et l's affaithe allaient tréjous bein quand i' 'tait là, et pas autrément; san secret étant qu'auprès, par priéthe, avait êprouver la réligion pour un jour, trouvit tant d'difféthence, i' 'tait si paisiblye et satisfé qu'i' voulit continuer d'même, Christ tréjous dans sa vie. En finissant, lé Sieur de Gruchy dit qu'i' voulait qué ch'feusse là l'experience dé tous, dé r'vénîn au Sauveur, et d'être erconcillis à Christ et d'vîn ses embassadeurs.
Viyiz étout: