|
Le temps pâssait y'n fallait pon vaies, Les jeunes filles avec des braies; Il' avez un cour cotilyion De gris bailinge ou de bieut molton, Avec un p'tit bed-gown d'indienne. Ils en mettez un net la semaine, Avec une coiffe ben poffets, Qui n'était pon souvent férets; Y la poffée avec du gui, Et toute suite la qu'était fini. Y voulez tréjous être ben coiffie, Car y n'voulez pon être êcrégnie. Il allez en ville eunne fais par an, Mais tréjous avec lus mamman; Y n'alez pon sus des byciclette, Mais tchique fais dans lus bouanne cherette; Pour lus "hollidays" en êtait, Il allais ben souvent au vrait. Et quand n'ou v'nait es longues serrais, Y faisez ben vite une bouanne touannais, Pour ramassé des fieurs et d'la fêugieth, Pour décoré lus vieille jonthierth; Cêtait pour être desus au sé, Pour être touos ensemble à ouvré. Y faisaits des mellettes en jonchet, Pour y pendre lus bouan vier crâsait; Y n'avez pon besoin de piano, Y savez tous lé chant de Malbro. Et ben, y passêts ben lus temps, Et trouvaient tréjous des gallants; Pour être ben seuts d'être engagi, Le garçon donnait piat ou pangni; Y faisez tréjous lu neuches en cachette, Yun allait par la route et l'autre par les ruettes. Quand il était seut nou z'allait tithé, Et chetait assets pour les êffrité. Mais, hélas! que tout a changi, Dans notre chier p'tit Jêrri. N'en v'là assets du temps passait, A la préchaine, il est mingniet. Livonia |
Vèrsion modèrnîsée:
|
Lé temps pâssé i' n'fallait pon vaie, les jannes fil'yes auvec des braies; il' avaient un court cotillon dé gris bêlînge ou d'bliu molton, auvec un p'tit béngône d'îndgienne. Il' en m'ttaient un net la s'maine, auvec eune coêffe bein poffé, tchi n'tait pon souvent féthé; i' la poffaient auvec du dgi, et toute suite là tch'était finni. I' voulaient tréjous êt' bein coêffies, car i' n'voulaient pon être êcrîngnies. Il' allaient en ville eune fais par an, mais tréjous auvec lus manman; i' n'allaient pon sus des bicyclettes, mais tchiquefais dans lus bouonne tchéthette; pouor lus "holidays" en Êté, il' allaient bein souvent au vrai. Et quand nou v'nait ès longues séthées, i' faîthaient bein vite eune bouonne touannée, pouor ramâsser des flieurs et d'la fêugiéthe, pouor décorer lus vielle jontchiéthe; ch'tait pour êt' dessus au sé, pouor êt' touos ensembl'ye à ouvrer. I' faîthaient des mellettes en jontchet, pouor y pendre lus bouôn vièr crâsset; i' n'avaient pon bésouain d'piano, i' savaient tous lé chant d'Malbro. Eh bein, i' pâssaient bein lus temps, et trouvaient tréjous des galants; pouor êt' ben seux d'êt' engagie, l'garçon donnait pliat ou pangni; i' faîthait tréjous lus neuches en cachette, iun allait par la route et l'aut' par les ruettes. Quand i' 'tait seux nou-s'allait tither, et ch'tait assez pour l's êffriter. Mais, hélas! qu'tout a changi, dans not' chièr p'tit Jèrri. N'en v'là assez du temps pâssé, à la préchaine, il est mînniet. Livonia |
Viyiz étout: