Chest assessé que nous s'assied les veilles,
J'érons du fun siès l'vaisin Jean Machon;
J'érons du punch, d'la gâsche et des merveilles,
Des paids grillis, du lard et du lanchon.
Un coup d'all four, en qu'menchant la séraie,
Nos pliaira bain, car j'aimmons à gambler;
J'ai man pid d'cauche, ô ma bourse sacraie!
J'y mets mes sous, n'ou n'peut m'les y voler.

Jenny Filleul a fait sa belle robe,
Ses fins saulairs et un tas d'spenceurs;
Oul en a pliain le tireux d'san wardrobe;
Oh, qu'ou s'ra belle et couverte de flieurs!
Ou brillera comme unne belle ételle;
Tous ses flianflins, ses bagues, ses guiamants,
F'ront dire à tous: Oh, la belle hardelle!
Admirons la pour ses biaux ornements.

Suson Bertram nos jouëra d'la musique,
Et Charles Leigh vaindra zov san violon,
Nicolas Vicq f'ra vignonner sa v'licque,
Je danssons tous un fammeux rigodon.
J'érons la bant du régiment d'Saint-Pierre,
Qui jouëra bain en r'venant d'larsena;
L'coësin Coudray lus a promins d'la bière,
Y jouëront tous, et la veille s'assiera.

Ne v'lo la bant, - qui musique admirable!
Dansons, chantons et siyons touos joyeux
Au cliai d'la lunne; oh qu'il est agréable
De s'amuser et d'être touos heureux!
Escoute! Oué-tu? - "Mouorir pour la patrie!"
Qu'il air divin! - "C'hest le sort le plus doux..."
"God sav' the Queen!" - Oh, douoche mélodie!
Pour Victoria chantons, oh prions tous!

Qui biau concert! Y ya fête au village,
Jennes et viers ont le coeu resjoui;
Quand le tambour fait tremblier le fiellage,
Tout est bonheu, tout a l'air d'en jouir.
Assais, entrons, allons cherchi les filles;
Chantons, dansons et levons le guéret;
A la polka, za la valse, es quadrilles,
Croisais, chassais, suivez George Marett.

Les viers chanttont et riront sus les vielles,
Car y sont tous comme un pagni d'souéris;
Quand yssont gris, ymange'ont des merveilles,
Des p'tits pâstés, des v'licots et du ris.
V'là nos momans et nos vieilles grand-mères
A lus pid d'cauche; oh, viyis les ouvrer!
Y font l'amour à nos biaux viers grand-pères,
Ergardez-les et les ouéyis gnoller.

Viyis les viers comme y passent la mogue!
Lus coup d'sno, zet lus pipes et lus p'tun
Les rajeunit; oh, qui bonheur, by Jogue!
Y sont gaillards comme lus gieu Neptun.
Il est mingniet, il oublient la maraie
Et lus dranet, lus ains et lus grapins.
Chantons, dansons, finissons la seraie,
Faisons sonner la pesle et les bachins.

Tout est bonheu, simplicitai zet glouëre;
Tanbours, bachins, trépid, fliûte et violon,
Tout est en jeu, ov le cidre et la bière,
La veille est bas, dansons un rigodon.
Chacun à tou, touos les siers en familles
J'er quemench'rons nos jeux et nos amours;
Jennes et viers, mes garçons et mes filles,
J'nos amusons dans nos humbles séjours.
 

Oméga