Les Pages Jèrriaises

AU TEMPS PASSÉ

J'm'en vais vos dithe comment qu' les gens
Vivaient fort bein, y'a si longtemps,
Quant quâsi tous pâlaient l'Jèrriais
Et pas l'galimatchias Angliais.

Les dames avaient des cauches de laine
Et 'taient pinchies d'corsets d'baleine ;
Lus robes dans la poussiéthe traînaient
Et bannète d'indgienne i' portaient.

Vaisîns allaient ès enterrements
Avec des tappeurs et des gants ;
Et pis, en sortant du chinm'tchiéthe,
Nou lus donnait eune fais à béthe.

Les hommes pouvaient sé d'shabilyi
Dans des machinnes d'vant lus bangni,
Mais n'y'avait pas d'femmes êtendues
Là sus l'sablion - et presque nues .

Pour être Connêtabl'yes ou Chent'nièrs,
I' fallait être Rose ou Louothièrs* ;
Mais ch'tait ès hommes d'être candidats -
Les femmes de ch'la ne s'mélaient pas.

Les grand'tchéthues 'taient en Janvi
(Quand i' fallait bein travailli):
Et pis quand v'nait sept heuthes du sé
L'fermi donnait un bouon souper.

En la Terre-Neuve Robin-Collas
Avaient tchiques chents Jèrriais là-bas ;
I' fallaît rester là chinq ans
Pour être payî rein que mille francs.

Auprès l'églyise les vièrs criaient
Qu'au cliai d'la leune nou pouvait vaie
Tchiquefais des morts d'la terre sortis,
Dans lus lincheurs sembliant en vie.

A Noué toutes les clioches nou sonnait
Et à Pâques des fliottes nou mangeait,
Mardi Gras donnait des crêpes pour "lunch",
A la St. Jean ch'tait "milk-o-punch".

Toutes les bouonnefemmes du sno prenaient,
D'la Verte Porte de Simonnet* ;
Et touos les hommes, ou jeunes ou vièrs,
D'aver braies à pliatchet 'taient fièrs.

Ch'est seux qu' y'a ieu bein des changements
Ichîn en Jèrri dans chent ans :
Maîs pour ma part j'sis satisfait
De vivre pûtôt au jour d'aniet .

 

P. W. Luce

* Partis politiques d'aut'fais.

* Marchand dé p'tun, à La Verte Porte, La Grand' Rue, St. Hélyi.

 

Viyiz étout:

 

Les Pages Jèrriaises