Le passaï n'est pus!
Frumons l'hus;
Oublions ses d'fauts,
Il a ieü ses maux:
Ch'est bein le mus
De l'aissi en r'pos.

II

Pourqui resvilli
L'endormi?
Qui dorme et s'r'pose
Sus son liet de rose;
I vaut mus l'laissi
En paix pour un' pose.

III

Le présent pour nous!
Car pour tous
I'y a d'qui s'oqupé;
Nul ne vit pour sé,
Ses pliaisirs, ses goûts;
Le bein nou s'ent'deit.

IV

Pensons à l'Av'ni,
Si cachi
A nos faibles yeux
Dans ches sombres lieux
Où tout deit fini;
Regordons es cieux.

V

I' n'iera pus d'plieurs,
Ni douleurs,
Pour cheux qu'y seront;
Trejous y vivront
Ouestqu' jamais les flieurs
Ne s'esmortiront.

A.A.L.G.

Aland-dale, Beaumont.
1865, Février 16.