Chutte fais, nous, l's étudgiants, j'sommes à not' tou seu pour vaie chein tchi s'trouve dans l'fanmeux pagas. Pouor vos dithe la vethité, ch'n'est pon trop souvent qué j'avons l'opporteunité de nos fouorer l'nez par la dgeule de chu pagas, car Joan Tapley lé garde comme s'i' cont'nait la couronne d'la reine! Mais j'savons tous qué, quand l'cat dort, les souothis ethont du ji!
Vos rapell'ous qué, i'y a deux-trais mais, j'vos avons raconté l'histouaithe de not' visite à La Fontaine des Mittes? Ilo iun d's étudgiants nos dit l'histouaithe des deux faitchieaux qui 'taient supposé d'y aver vetchus, et j'avons bu d'l'ieau d'la fontaine. Achteu qué j'viyons bein cliais, j'sommes a faithe des prepathatis pour eune aut' expédition, pour raconté d'aut's sornettes du temps passé.
Ieune des etudgiantes, bein savante, nos trouvit dans un vieir almonnas, la légende de la Cri des Tombelènes, quand, dans l'tchînzième siécl'ye, un jeune homme, Raulin, et sa douoche Jeanne, deux bouons jèrriaises, fut tués par les Moutonniers. Ches-là 'taient des brigands et soudards de forteune payi par les françaises, tch'avaient accaté l'île d'la reine Merdgitte, femme du rouai Henri VI d'Anglièterre. La légende eut lieu dans l's alentours de Bouolay - peut-êtr' j'pouvons vos en raconté à l'av'nîn, quand j'y sommes v'nus - mais j'n'avons pas assez d'run ichîn.
Lé c'menchement de l'histouaithe nos dit qué Raulin et Jeanne célébritent lus fianchailles à "L'Assise de Veille," et parmi nous, personne n'en a connu grand'chose. I'nos fallait fourgonné dans nos grands Dictionnaithes pour trouvé des détails de chein tchi s'passit. Là j'trouvimes qu'les "veilles" de l'hivé 'taient des sethées eyou qu'tout l'monde d'eune vaisinage s'rencontrit pour ouvrer des cauches ou des bliantchets - ch'tait le commèrce l'pus important de chu temps-là - et qu'la Longue Veille 'tait lé 23 dézembre, quand tout 'taient prêt pour aller au marchi l'lendemain; ch'tait eune sethée de fête, viyant qu'ils avaient fini lus travas pour l'année.
En 1462, s'lon l'histouaithe dans not' almonnas, la preunmyièthe sethée du stembre, L'Assise de Veille 'tait célébré siez l'vier Raulin de l'Ecluse, l'péthe à Raulin, et l'homme l'pus riche d'chutte contrée-là. I'y avait "un bouân fricot"; les vieux s'cauffaient à la "fouèe de vraic", bevant lus "pintonnèes d'cidre." Tandis qu'les "momans ouvraient à lus caoûches ou à lus bianchets", les jeunes s'amusaient à jouer la bague-bergère, eyou qu'eune bague 'tait drissé sus eune ficelle d'un joueur à un autre, tandis qu'l'sien dans l'mitan soulait d'vinner létchet la t'nait. Pus tard, i'c'menchitent à danser des contrédanses au chant de :
"Mergoton, mon tcheur, Mergotton, ma mie,
I'nos faoût un' bouan' rôtie,
Pour nos mettre en appètie".
Pis chatchun chantait san chanson, et personne n'chantait mus qu'l'janne Raulin; comme disait sa "grand'mèze", "I' chante si bein, chu pouôre garçon ! Jammais j'n'èzais creu d'vais chu jour ichin; ch'est ocouo une jouèe tchi m'est accordèe ! Passèz-mé don' l'pinton, que j'bève unne fais, pour mé rassaeûzé." Pis la v'là qu'a "fait la câre au pinton daeûse-trais fais"! A la fin d'l'Assise, les "jannes hardelles et lus galants suivaient les vièrs auve lus lanternes à bouoyon" à lus siez-ieux.
Ch'est comme ch'là qu'nos anchêtres s'divèrtithaient - j'pouorrons-t-i' faithe r'vivre la Longue Veille acquo eune fais?
Viyiz étout: