Trenton,
Michigan,
USA
Lé 25 dé novembre 1978
Moussieu L'Rédacteu,
J'vai qu'St. Ouën est hardi dans les nouvelles mentionées dans la gâzette du 28 dé septembre qué j'veins d'èrchéver - eune sémaine auprès la cheinne du chînq d'octobre. Jé n'sai pon si ch'est la poste d'Jèrri ou les potses d'Angliétèrre et d's Etats-Unis d'Améthique tchi sont resposabl'yes pour lé temps tchi'i' faut à les transporter d'Jèrri ichîn, mais v'là tch'empiéthe à m'suthe qué l'temps va. Lé progrès dans l'sèrvice postal dé nouos pays, supposés êt' les pus aptes, progressifs et modèrnisés, marche à r'tchulons.
Y'a in bieau portrait d'l'êlection pour Connêtabl'ye à St. Ouën lé 17 d'août, 1903, sans la gâzette, et m'n oncl'ye Adolphus Le Feuvre est d'dans. Les deux candidats pour Connêtabl'ye 'taient Mêssieux Philip John Le Feuvre, du parti du Louothi, et Francis Philip Hâcou, du parti d'la Rose, et l'Sieur Le Feuvre en gângnit par eune mâjorité dé vîngt-deux vouaix.
J'me r'souveins tout à fait bein dé ch't'êlection-là. Nouot' fanmil'ye a tréjous 'té du parti du Louothi, et l'rêsultat fut hardi satisfaîsnt pour nous. Ch'n'est pon qu'j'avions rein contre Moussieu Hâcou, un Moussieu pour tchi qu'j'avions un grand respé, sustout comme li et sa fanmil'ye 'taient les pilièrs dé l'Eglyise dé St. George, tch'était nouot' lieu d'tchulte étout, mais j'tions accouôsinnés auve lé Sieur Philip John Le Feuvre, et il 'tait du parti Louothi.
Dans chu temps-là ch'tait încriyabl'ye, même honteux, dé voter hors du parti. J'm'èrsouveins qué quand j'èrvîns en Jèrri en 1946 quand j'm'èrtithis d'affaithes ichîn en Améthique, j'tais en pâlement eune arlévée auve eune dgaîngue dé St. Ouënnais à Portînfer, et iun d'ieux mé d'mandit si j'tais acouo Louothi.
"Oui-dgia!" j'lî dis. "j'n'ai janmais voté pour un rôsyi quand j'votais d'vant m'en aller en Améthique, et jé f'thais acouo la même chose au jour d'aniet si j'pouvais voter."
"Bon!" i' m'dit, "vot'tais-tu pour un louothi s'il 'tait un trou d'chour?"
"Mais oui!" j'lî dis, "car un trou d'chour éthait pus d'avis qu'un Rôsyi!"
Sans doute, ch'tait tout en bagoulant, mais y'avait un rôsyi parmi nous tchi n'pathaîssait pon content. Enfîn, nou peut dithe qué la fidelité au parti 'tait eune êvangile dans chu temps-là, et en allant à l'êcole en temps d'êlections les mousses dé nouot' parti chantaient "Lé Louothi à ma boutonniéthe et la Rose à man driéthe!"
Lé Sieur Philip John Le Feuvre fut Connêtabl'ye dé 1903 à 1912. Il 'tait l'grand dé trais fréthes, êfants dé Philippe Le Feuvre, fis Jean, fis Edouard, dé La Fontaine, à Millais, et d'Esther Le Blancq. Lé deuxième des fis, John, tch'avait gardé boutique à La Fontaine, mouothit en 1900 à l'âge dé trente-chînq ans. Lé pus janne des trais, Francis Vibert Le Feuvre (pus tard Juré-Justicier dé la Cour Rouoyale), fut Connêtabl'ye dé St. Pièrre dé 1907 à 1912. Les deux fréthes fûdrent don Connêtabl'yes des deux pâraisses vaîsinnes en même temps.
En touannant les pages dé la gâzette, j'vai l'portrait dé m'n anmîn, lé Sieur Allen Clarke dé La Vue des Vagues au Haut du Mont du Vallet, et j'vai qué, comme ségrétaithe dé la sociêté pour la prêsèrvâtion des Landes, il a annoncé sa crainte qué les motos et les motocyclettes sont en train d'endonmagi l'êtendue d'lande entre lé Châté dé Gros Nez et la Tour du Radar. I' faut l'féliciter pour sén êgard au sujet et i' faut féliciter lé Sieur Kenneth Vibèrt étout pour sén întéthêt et travas pour la consèrvâtion d'ches Landes tchi sont tréjous assujethies à la gourmandise dé cèrtains tchi veulent les gâter et l's avraûner et dêtruithe lus bieauté en cachant motos et motocyclettes partout sans ordre ni r'ténue tchelconque. Si nou n'y met pon arrêt, i' dêtruithont toute la vèrduthe et la belle bruëthe - comme il 'taient à l'faithe dans Les Blianches Banques dévant qué l's autorités y mîndrent arrêt.
J'fus né dans la contrée, et j'ai connu les courses dé j'vaux dé y'a eune huiptantaine d'années ès Landes, et ch'tait ès courses qué j'gouôtis d'la crème "à la glace" la preunmié fais. Ch'tait un Italien tch'en vendait. Il avait un p'tit tchéthiot atout ses cannes dédans, et i' vendait la crême gliaichie entre deux galettes bêlongues. Ch'tait d'la vraie crême tch'i' faîsaint sèrvi dans chu temps-là, et oulle 'tait d'licieuse. Nou s'en litchait les babinnes!
Les régiments d'soudards des rédgulièrs - j'm'èrsouveins qué ch'tait lé Highland Light Infantry dans l'temps - allaient tither au blianc là touos l's ans, et lus mûsique v'nait y jouer au Dînmanche l'arlévée et tout l'monde du vaîsinné allait la ouï. Sans doute, i' n'y'avait pon d'motos dans chu temps-là et Les Landes n'enhannaient pon. Piêssent-i' garder lus caractéthe Landîn pour tréjous, et nouos garanti un mio d'trantchilité dans la contrée!
George d'La Forge
Viyiz étout: