Long Island, New York,
U.S.A.
Lé 5 dé novembre, 1966.
Moussieu l'Rédacteu,
Mé v'la à vouos êcrithe dé l'Êtat d'New York, chutte sémaine. J'sis auve un anmîn à bord dé san baté, un p'tit yacht dé quarante-huit pids tchi fait dans les onze noeuds par heuthe à l'aigue dé deux motos diésel dé chent douze chévaux châtcheun. Mêcrédi tchi veint j'allons l'ver l'ancre et filer pour Fort Lauderdale, en Floride, un viage tchi finnitha douze chents milles d'ichîn.
J'tchittînmes Miami avant hièr matîn à bord d'un avion à rêaction pour l'aérodrome Kennedy à New York, et j'fînmes les douze chents milles, volant à la hauteu d'trente-trais mille milles, dans deux heuthes. À chutte hauteu-là, j'eûnmes la chance dé vaie tchiquechose que nou n'vait pon touos les jours. I' s'adonnait qu'l'heuthe du lanchement en l'air d'eune capsule spatiale "Gemini" par eune fusée "Titan 3" s'accordait auve l'heuthe dé l'arrivée d'nout' avion endrait la tour du lanchement au Cap Kennedy - mus connu comme lé Cap Canaveral, en Floride. Lé Cap'taine dé l'avion nouos annoncit, à travèrs du "Haut parleur", tchi y'avait eune chance dé vaie la capsule êt' soûffliée en l'air, et nouos consilyit d'garder l's ièrs ouverts. L'avion avait du run pour chent quarante passagièrs, mais i' s'adonnait qué j'tions rein qu'eune souoxantaine à bord, et j'nouos appréchînmes tous ès f'nêtres du côté bâbord pour vaie l'spectacl'ye. Tout d'un coup, j'vînmes eune fliambe dé feu, âpre comme la lueu du solé, êcliaithi l'bas d'la tour dé lanchement, et dans un clyîn d'li, nou viyait la capsule - poussée par un nuage dé feu tch'était âpre assez pour vouos êbliouyi - monter rapidement et vèrticalement en l'air. Êtant nous-mème à eune hauteu d'trente-trais mille pids d'tèrre, i' nouos sembliait tch'i' prînt seulement tchiques ségondes pour la fusée à monter aussi haut comme j'étions, mais sa montée en espace fut pus rapide qué nouot' vitesse-mème, et deux fais j'vînmes eune section sé s'pather d'l'entchi, et châque fais, la montée d'chein tch'en restait allait pus rapidement en l'air jusqu'à qu'sa course dispathîsse compliètement dans la hauteur dé l'espace, et qu'rein n'en restait en veue sénon la feunmée ou vapeur tchi s'montrait blianche comme si un blianc riban restait à mèrtchi san c'mîn d'la tèrre à l'êtèrnité!
I' n'y étha p't êt' pon eune aut' occasion d'vaie eune fusée soûfflier eune capsule en l'air à mains qu'nou piêsse aver pèrmission d'êt' sus les lieux, mais jé n'crai pon tch'i' y'aie autcheune doute qué d'ichîn eune dgiexaine d'années, ou mains, y'étha un homme mînt sus la leune par l'Améthique ou la Russie - p't êt' par les deux! Malheutheusement, j'né s'sai pon du rang des vivants par lé temps qué l'atèrrissage sus la leune es'sa pèrfectionnée assez pour y mett' des passagièrs en nombres. Et pourtant j'ai tréjous ieu envie d'vaie sa surface dé près dépis l'moment, y'a eune quarantaine d'années, qué j'la vis l'travèrs du téléscope dé l'observatouaithe à Ottawa, au Canada!
Ch'est drôle comme nou peut s'trouver dans deux sortes d'saisons dans l'mème jour dans chu pays-'chîn. Avant-hièr matîn la tempéthatuthe 'tait dans les septante-deux dégrés à Miami à huit heuthes, et l'temps 'tait bé, ouaithe qué pûtôt frais en arrivant à l'aérodrome Kennedy à New York. Mais dévant nouos couochi à bord du baté l'mème jour i' faithait eune fraid d'tchian, et radio et télévision nouos annonçait tch'i' tchiyait d'la né dans la région des Grands Lacs, et qué mème lé nord dé La Floride souffrait d'la fraid. La né et les vents g'lés des Montangnes des Grandes Rocques du Canada avaient, dans l'couothant des dreines vîngt-quatre heuthes, travèrsé les pliaines des Dacotas et d'Montana, et porté lus fraîcheu ès Êtats du Sud mème! Nou s'attend à ch'la dans l'mais d'novembre - mais pon dans les preunmièrs jours - et ch'est tout d'mème eune bouanne chose pour mé d'aver tchitté l'Michigan vèrs la fin d'octobre pour faithe lé viage en Floride dévant qu'la né et la glace pûsse faithe lé viage en moto eune dangereuse aventuthe!
D'ichîn mêcrédi tchi veint j'm'en vais aver l'temps d'lièthe les gâzettes hebdomadaithes publiyées en Jèrri dans l'temps qué j'tais houors l'Île en France, l'Allemangne, la Hollande et la Belgique. Y'a un tas d'nouvelles dédans qué j'ai envie d'lièthe - y'a l's assembliées d's Êtats. J'viyais en r'gardant ieune dé ches gâzettes-là l'aut' sé, tch'i' y'en a, dans l's Êtats, tchi sont d'avis d'laissi les gens j'va faithe sèrvi les p'tits c'mîns sus l'haut des falaises du côté d'Gros Nez! Sans entanmer la tchestchion du dangi ès piêtons, j'éthais grand' peux d'y aller à j'va mé-mème! Si un j'va 'tait êffrité par autcheune pétite chose, et tch'i' prannait l'mord ès dents, ché s'sait si aîsi pour li dé s'avoler au galop du mauvais bord et dé s'drotchi ava la falaise auve san cavalyi sus l'dos! Pèrsonne né pathaît aver pensé à chu dangi-là!
George d'La Forge
Viyiz étout: