Ottawa, Ontario,
Cannada.
Lé 6 d'novembre, 1971.
Moussieu l'Rédacteu,
Combein d'fais, à m'n âge, qué j'm'en vais pouver mett' ch't întitulement-là au haut de ma lettre? Eh bein, né v'la eune tchestchion tchi n'est pon aîsie à rêpondre. I' n'y a qué l'Bouan Dgieu tchi pouorrait nouos l'dithe. J'espéthe quand-mème qué y'etha acouo mouoyen dé l'faithe pus qu'eune fais.
Ch'est drôle d'êt' en Jèrri l'matîn et de s'trouver en Améthique lé sé du mème jour, mais né v'la chein tch'i' s'arrive. Dans l'avion à rêaction Boeing 727 dé la compangnie Pan American lé viage dé Londres à Detroit, Michigan, où'est qu'man fréthe Fraînque démeuthe, sé fait dans sept heuthes trais-quarts - sans arrêt, sans doute, car nou n'peut pon arrêter là-haut à trente-sept mille pids d'tèrre! L'avion roûle à 180 milles à l'heuthe sus la “piste” (“runway” en Angliais) dévant “tchitter la tèrre pour aller vèrs les creux”, comme j'ouïyais Manman L'Feuvre liéthe dans “La Nourriture de l'Ame” quand j'tais mousse, et i' monte en l'air à l'alleûthe dé mille, quat' chents pids à la munnute, et eune fais en l'air i' vole à quâsi siex chents milles à l'heuthe.
À bord, châtcheun s'passe lé temps comme i' veurt. Quant à mé, j'aime liéthe un livre et dormilloner d'temps en temps. Pour les cheins tch'aiment la télévision, y'a un bouan portrait en couleu mîns sus un êcran au but d'l'allée dans l'mitan d'l'avion (les siéges sont trais à trais d'châque côté d'l'allée) pour qué touos les pâssagièrs piêssent lé vaie. Si nou veurt ouï l'dgialogue, i' faut louer d's êcouteurs qué nou s'met sus l's ouothelles, et v'la tchi couôte un louis. Autrément, la scène est silencieuse. À mains qué l'portrait s'sait affaithe historique, j'n'y prends pon d'avis mé-mème. J'aime mus liéthe et dormillonner. Des belles jannes filles en costeunme officiel prannent bouan soin d'tout l'monde et vouos sèrvent d'aussi bouans r'pas comme si nou 'tait en hôtel.
Arrivés à destinnation, i' faut pâsser l'immigrâtion et la douanne. L's agents d'la douanne sont r'gardants ches jours en Améthique. I' font tout l'monde ouvri lus valises pour êt' fouoillies. Nou m'dit qu' ch'est à cause du trafi des drogues. Siez man fréthe Fraînque, tch'était à ma rencontre à l'aérodrôme dé Detroit, nouos v'la assis dans sa cave à célébrer man r'tou auve eune fais à baithe. Ou r'ouaït la langue Jèrriaise à la mode St. Ouënnaise, sa cave, pour la preunmié fais d'pis qué j'm'en fus en Jèrri à la fîn d'mai dé ch't année. Nou pâle d's anmîns décédés ch't êté dans l'Île et qu' nou né r'vérra janmais sus chutte tèrre, des jannes filles dé nouot' janneche tchi sont au r'pos êtèrnel étout, et d'la chance qué nou-s-a d'êt' acouo du rang des vivants sé-mème, et d'l'espèthance qué nou pouorra acouo vivre assez longtemps pour èrvaie Jèrri à l'av'nîn!
I' veint d's Améthitchains vouos vaie. I' sont tchuthieurs au sujet des pays tch'i' n'ont pon veu ieux-mèmes et d'mandent si nou-s-a r'gretté d'tchitter l'pays natal. “Eh bein,” j'lus dis, “y'a l'pour et l'contre dans toutes choses, et y'a longtemps qu' j'ai adopté un vièr diton Jèrriais tchi nouos dit tch'i' faut paître là où'est qué nou-s-est fitchis. Ma fille et mes p'tits êfants et touos mes fréthes et ma soeu sont ichîn et à La Côte. I' m'enn'yie d'ieux quand j'sis en Jèrri, et i' m'enn'yie d'Jèrri quand j'sis 'chîn. Ch'est en tchi jé d'meuthe la maîntchi du temps ichîn et l'aut' maîntchi là!”
Pour lé moment, j'pense à touos les bouans amnîns qu' j'ai laîssi driéthe en Jèrri, et je d'mande ès cheins qué j'n'ai pon ieu l'temps d'aller vaie à la dreine munnute dévant m'en v'nîn, dé m'pardonner et dé n'êt' pon mârris à mé. Ch'est tréjous la mème turlutte à la fin d'man séjour au Ménage ès Feuvres. Trop à faithe les dreins jours. Trop d'temps pèrdu à décider tchi papet'tie patchi et tchi papet'tie laîssi driéthe. Tch'il' habits prendre auve sé. Patchi et p'ser les valises pour vaie s'i' dêpassent lé paids permîns par avion. Aller vaie l's anmîns pour lus dithe “À la préchaine!” Aver à aller deux-s'trais fais à la mème maîson viyant qu' nou-s-y trouve fache dé bouais quand nou-s-y va, et finni par mantchi d'aller en vaie un tas car lé jour tch'i' faut aborder l'avion arrive trop vite - et ch'n'est pon aîsi dé l'dêmettre à pus tard car nou-s-a r'tîns sa pliaiche assez longtemps à l'avanche pour pouver êcrithe en Améthique pour annoncer la date d'arrivée pour êt' rencontré là-bas.
Enfin, j'èrmèrcie touos m's anmîns tchi m'ont 'té si bouans en Jèrri, et si j'n'ai pon ieu l'temps d'aller les vaie d'vant m'en v'nîn j'lus asseûthe qué j'lus sis bein èrconnaîssant quand-mème.
George d'La Forge
Viyiz étout: