Trenton, Michigan,
U.S.A.
Lé 2 d'mai, 1970.
Moussieu l'Rédacteu,
Y'a eune dgiêxaine dé jours j'tais acouo au solé d'La Floride. Un tas d'gens du nord s'y trouvaient en mème temps qu' mé, car l'ambition des pèrsonnes tchi pâssent lus vie à travailli dans un pays tch'est fraid tout l'hiver est d'aspither au moment d'aver assez d'sou pour pouver s'absenter d'chu travas-là pour pâsser un mais ou pus dans la chaleu d'La Floride pour lé raccourchi.
Ch'est d'l'Angliaichîn qu'nou ouait là comme dans touos l's Êtats en Améthique, mais chutte fais y'a ieu du Jèrriais d'pâlé! Un anmin d'ma jannèche et compangnon d'êcole à St. Ouën, Joseph Le Floch, tch'a pâssé eune chinquantaine d'années à travailli pour les Robîns à La Côte, et tchi s'en va aver huiptante ans dans l'mais d'juîn, mais tch'est acouo robuste et bein plianté sus ses pids d'drièthe, vînt pâsser eune tchînzaine dé jours, lî et sa femme et sa fille et ieune de ses belle-filles, à Hollywood (en Floride), à eune dgiêxaine dé milles dé là ou'est qué j'tais à d'meuther, et j'eûnmes la chance dé bailli d'nouot' becque en Jèrriais.
J'en avons-t-i' bargouêchi entouorre nouos jours à l'Êcole Wesleyenne, et entouorre les vaîthîns d'chu temps-là! Iun d'ieux 'tait John Le Héron. I' d'meuthait dans la preunmié maîson à drouaite en allant du Carrefour dans La Rue Freûle, Millais. San vaîthîn 'tait Mait' John Hubert Genteel. John Le Héron s'en fut à La Côte étout. À La Ruette, ch'tait des Lé Mèrquand. Lé grand des fis, Adolphus, fut Policeman et Ph'lippe, lé pus janne, s'en allit à La Côte. J'm'èrsouveins tout à fait bein d'li à L'Êcole Wesleyenne car il 'tait habilyi comme au Dînmanche. I' n'y en avait pon fort à l'êcole habilyi d'mème - deux autres 'taient John Clifford Malzard et Phisi Hamon, et nou l's admithait hardi. Pour la grand' partie d'nous, nouos habits du Dînmanche avaient à duther d's années et nou les m'ttait seulement pour aller à l'églyise et au Thée des Trais Pâraisses! Dans chu temps-là nou m'ttait des bottes à cliou faites sus m'suthe par Mess Maugi, Elie. Quand fallait marchi aller et v'nîn des Landes à l'êcole au Haut du Mathais touos les jours, i' fallait êt' cauchi comme i' faut!
Lé Sieur Tanminne Le Cornu, organniste à St. George, démeuthait au Carrefour. I' n'y avait qu'eune maîson dans La Rue à La Pendue, à drouaite en allant pour Les Landes. Ch'tait Mait' Bram Le Ruez tch'y d'meuthait.
J'pensais à ches bouans vièrs temps-là en faîsant l'trajet en moto d' La Floride au Michigan, eune affaithe dé tchînze chents milles, et j'mé d'mandais si la vie n'tait pon pus aîsie et pliaîsante dans chu temps-là. Y'avait mains d'tîntamarre. Et ch'est seux tch'i' n'y à pon d'pliaîsi à cachi des motos dans les grand' routes d'Améthique dé nouos jours. I' faut aller quédaine à septante milles à l'heuthe, septante-chînq s'lon l's Êtats, ou bein nou-s-est à la vaie d'touos l's autres, et quand nou-s-a fait ch'la pour chîn chents milles dans l'mème jour sans arrêter sénon eune fais pour remplyi d'pêtrole ou mangi un r'pas, nou-s-en à pliein ses braies et nou né d'mande qu'à s'arrêter pour la niet et s'couochi d'bouanne heuthe!
J'fis chîn chent souoxante milles lé preunmié jour en allant d'Fort Lauderdale, en Floride, à Roberta, en Georgie, dans un temps supèrbe - un mio trop caud si autcheune chose. Lé deuxième jour j'avais à travèrser les montangnes Great Smoky dé Tennessee et d'Kentucky, mais auve du bieau temps et par la grâce du Bouan Dgieu, j'mênagis à faithe chîn chents milles dans dgiex heuthes. Lé traîsième jour i' tchilyait d'la plyie avèrse, et auve les motos à aller à septante milles à l'heuthe quand-même, i' y'avait eune manniéthe dé bliâse l'avant à sé viyant qu' la vitesse du touannement des reues faisait l'ieau êcliatchi d'la surface dé la route. V'la tchi m'faîsait penser au vièr diton des naviguants du temps passé : Aller sept noeuds dans la bliâse! Ch'est êtonnant tch'i' n'y a pon pus d'accidents!
Enfin, m'èrvéla siez man fréthe Fraînque dans l'Michigan, et prêt à r'faithe lé trajet d'chîn chents milles dé là à Ottawa, au Cannada, pour vaie nouot' fréthe Sydney et nouot' soeu Emily. Malheutheusement, jé v'nons d'pèrdre nouot' soeu Elsie, la preunmiéthe dé nouot' fanmile dé huit fréthes et soeurs à pâsser l'pas, et la pus janne sénon iun. V'la tchi nouos ramémouaithe qué la mort est un pas dans la vie et qué ch'n'est pon tréjous l'âge tchi gouvérne san chouaix. Ou pâsse tchiquesfais par dessus l's anciens pour prendre les jannes. Nouos v'là don restés à sept, entre les âges dé chinquante-neuf et septante-neuf - auve quatre dé nous en d'ssus d'septante et deux des quatre appréchant d'la huiptantaine!
Beintôt, j'espéthe aver l'pliaîsi d'aller vouos r'vaie en Jèrri, car j'appréche du temps d'pélèrinnage annuel au pays natal, iun des privilèges qué l'Bouan Dgieu m'a accordé dans mes vièrs jours!
George d'La Forge
Viyiz étout: