Fort Lauderdale, Florida,
U.S.A.
Lé 27 de févri, 1971.
Moussieu l'Rédacteu,
M'èrvéla en Floride et l'long d'la mé! I' n'a pon tchée un brîn d'plyie au Texas tout l'hiver, et jé n'm'attendais pon d'en aver en c'mîn d'San Antonio ichîn. J'tchittis chutte ville-là auve man moto l'matîn d'sanm'di, l'20 du mais, dans la bliâse (i' y'en a souvent l'matîn dans les pays cauds), et deux chents milles pus tard i' broussait un mio, pon fort, mais assez pour aver l'nétisseux d'la f'nêtre dé d'vant en allant.
Y'a à bein près 400 milles dé c'mîn dans l'Texas dévant v'nîn à la frontchièthe dé La Louisianne, et par lé temps qu' j'arrivis là i' c'menchait à tchaie d'la plyie, et d'vant longtemps ch'tait eune avèrse tchi m'fit arrêter justément d'vant v'nîn à Bâton Rouge, la capitale dé ch't Êtat-là, ouaithe qué j'n'avais cachi qu' 491 milles.
Ch'n'est pon souvent qu'nou peut crouaîsi La Louisianne à ch't êpoque-chîn sans aver d'la plyie, mais j'eus la chance dé n'vaie pon piéthe. Lé lendemain, en travèrsant L'Êtat d'Mississippi, jé n'savais dgèthe qué j'travèrsais l'térritouaithe des tourbillons (“tornadoes” en Angliais) tchi s'en allaient sacagi maîsons et bâtisses et tuer eune huiptantaine dé personnes dans l'pays ieauseux (“delta” en Angliais) des deux côtés d'la rivièthe du Mississippi dans la niet tchi v'nait. L's avèrses d'plyie qu' j'avais rencontré la séthée dé d'vant dans La Louisianne et en appréchant l'Mississippi 'taient l'avant-garde des tourbillons.
En travèrsant l'préchain Êtat - Alabama, pus tard dans l'jour, lé radio dans man moto m'donnit la nouvelle dé chein tchi v'nait dé s'passer, et j'pouvais r'mèrcier L'Bouan Dgieu acouo eune fais d'aver passé par là en temps pour êcapper les tourbillons. V'là tch'i' m'est arrivé deux-s'trais fais. Deux fais d'vant, j'passais par des villages tch'en avaient subi, et tout 'tait apliati comme eune galette. Sans doute, ch'est 'chîn les saison des tourbillons lé long des côtes du Golfe dé Mexique. I' pathait qu' ch'est les rafales dé chaleu v'nant du sud et tchi rencontrent la cirtchulâtion glaciale des couothants d'airs du nord tch'en sont la cause, mais jé n'mé r'connais pon fort dans ches affaithes météorologiques-là. Lé Révérend Peter Manton, Recteu d'St. Jean, tch'est expert là-d'dans, peut vouos explyitchi ch'la comme i' faut.
J'n'eus pon d'peine à faithe mes chîn chents milles les deuxième et traisième jours dé man viage. En arrivant dans L'Êtat d'la Floride j'èrtrouvis l'solé et la chaleu - et trais fortes achie d'plyie d'orage duthant l'jour, d'la plyie si êpaîsse qué nou-s'avait d'la peine à vaie l'avant à sé, et fallait cachi douochement. Mais v'la tchi n'duthe pon pus qu'chînq à dgiex munnutes, et l'solé r'lit comme s'i' n'y avait pon ieu d'plyie. Ch'est typique du temps dans les pays cauds.
Quand nou-s-est touos seurs nou trouvé un viage dé mème (1,600 milles) long et enn'yant et nou pense à toutes sortes d'choses. Et nou n'vait rein du pays des deux côtés d'sé sus les grand' routes (“expressways”), car i' faut cachi à septante ou septante-chîn milles à l'heuthe, ch'est s'lon l's Êtats, ou bein nou-s-est à la vaie d'touos l's autres, et pour aller à chutte vitesse-là à londgieu d'jour i' faut garder l'yi sus san travas - drait l'avant à sé!
J'viyais eune articl'ye întérèssante dans la gâzette d'ichîn l'aut' sé. Ch'tait entouorre lé rouai Charles Deux. L'articl'ye en tchestchion nouos dit qu' la Monarchie Britannique n'existait qué dans la Colonie d'La Virginie pour un temps quand lé rouai 'tait fugitif et qué Cromwell gouvèrnait l'Angliétèrre. Des décrets fûdrent prononcés et enregistrés en san nom dans la colonie, et un Coronel Richard Lee fut env'yé en Hollande pour înviter lé rouai à êtablyi san trône en Virginie. Mangnifique! Mais l'auteur dé l'articl'ye né sait probabliément pon qu' Charles Deux avait 'té procliâmé rouai en Jèrri longtemps d'vant, et i' s'trompe en nouos disant qu'la Monarchie n'existait qu'en Virginie pour un temps. Si j'ai l'temps j'm'en vais li êcrithe à lî dithe!
Dans la mème gâzette, y'a un assez long alibêle entouorre nouot' fanmeuse Lily Langtry étout, mais ch'n'est pon rein d'bein întérèssant. Ch'est pûtôt des détâles entouorre ses piéches dé théatre quand oulle 'tait en Améthique.
J'veins d'èrchéver la “Jersey Weekly Post” du sept janvyi, et j'sis content d'vaie qué l'Sieur Harold Le Druillenec, un St. Ouënnais, veint d'êt' honoré par la Reine. V'la tch'i' m'fait pliaîsi dé l'féliciter. J'félicite, étout, lé Révérend Ouoilliamme Tabb pour aver 'té nommé Douoyen-Substitut. I' pathaît bein sus san portrait auve l'Avocat Bailhache dans la gâzette. Ch'est tréjous un pliaîsi d'lé r'vaie quand j'vais en Jèrri. L'ayant connu au Cannada, où'est tch'il 'tait hardi populaithe, j'pouvons reunminner entouorre l's affaithes ecclésiastiques dans l'Diocèse d'Ottawa. Un charmant moussieu, l'Révérend Tabb, un homme tchi vait tout l'monde et qu' nou ouait quand i' prêche un sèrmon dans la tchaîthe dé sa belle et vénéthabl'ye églyise dé St. Brélade!
George d'La Forge
Viyiz étout: