Trenton,
Michigan,
U.S.A.
Lé preunmyi d'septembre, 1979.
Moussieu l'Rédacteu,
J'tais acouo dans man vièr Ménage ès Feuvres quand j'vouos êcrivis la s'maine pâssée. À ch't heu m'èrvèlà à vouos êcrithe d'Amèthique - chu grand pays dans l'Nouvieau Monde où'est qu' j'ai pâssé la pus grande partie d'ma longue vie - et j'ai quâsi d'la peine à craithe qué y'a mains d'eune sémaine, qué j'tais en Jèrri. I' m'sembl'ye tch'i' y'a bein pus longtemps d'pis qué j'tais acouo parmi m's anmîns là-bas à bailli d'ma becque dans chutte fanmeuse langue Jèrriaise tchi mé rappelle si bein mes p'tits jours ès Landes à St. Ouën.
Ch'est grand danmage qué jé n'peux pon l's enm'ner auve mé, ches chièrs anmîns, quand j'tchitte l'Ile. I' m'enn'yis tréjous d'tchitch'uns. Quand j'sis en Jèrri i' m'enn'yis d'ma fanmil'ye tch'est en Améthique, et quand j'y sis en Améthique, i' m'enn'yis d'mes anmîns en Jèrri!
Pour lé moment, j'pense à man janne temps, prîncipalement à mes p'tits jours dans la forge auve Papa et man P'pèe. I' m'sembl'ye acouo ouï l'son du marté sus l'enclieunme, lé vent sorti des gros souffliets et d'vaie l's êtînchelles sauter où'est qu' Papa 'tait à caûffer l'fé pour faithe des fièrs à j'va. I' m'sembl'ye étout senti la corne brûlante quand P'pèe m'ttait l'fé, acouo caud, contre lé chabot du j'va, et i' m'sembl'ye acouo vaie l'tchian miâtchi la corne qué P'pèe copait du chabot pour lé r'dréchi.
Et j'donn'nais autcheune chose pour pouver r'pâsser eune séthée auve Papa et Manman à l'entou d'l'âtre et ouï Papa nouos raconter ses aventuthes dans les pays êtranges quand il' tait naviguant et tch'i' fut naûfragi.
Et j'voudrais r'quémenchi à aller à l'êcole. J'avais sept ans quand j'y'allis siez Miss Mabel Maugi à “Greenfield” dans La Rue du Sud et qué jé c'menchis à apprendre à liéthe. Tchi dêcouverte, man bouanhomme, chutte lectuthe! J'mé r'souveins qué ieune des preunmié choses qué j'lius dans la Bibl'ye 'tait l'accompte dé la Crucifixion dé Nouotre Seigneu, et qué j'eus un grand d'si d'vaie l'pays où'est tch'il avait d'meuthe. J'n'avais autcheune idée dans chu temps-là qué j'allais vivre assez longtemps pour y'aller trais fais, dans chu pays-là.
Et j'me r'souveins d'la preunmié fais, à l'âge dé sept ans, qu' j'allis à l'Êcole du Dînmanche à l'Églyise dé St. George. Ch'est r'mérquabl'ye qué j'tais dans ch't' églyise-là. Dînmanche pâssé, huiptante tch-ieune ans pus tard. Et ch'tait dans chu temps-là qué jé c'menchis à apprendre eune langue êtrangiéthe - l'Angliais. Ch'tait trais ans pus tard (quand j'avais dgiex ans) qué jé c'menchis à apprendre lé Français à l'Êcole Wesleyenne, dêjà un bouan mio viyant qu' les leçons et la Litourgie 'taient en Français à l'Êcole du Dînmanche à St. George. Mais ch'est acouo l'Jèrriais qué j'aime lé mus.
L'année mil neu chent trais fut l'année du changement pour mé. Papa L'Feuvre mouothit dans les temps d'Noué, et j'm'en allis d'meuther siez m'n oncl'ye et ma tante Fraînque d'Aubert, mes parrain et marraine, à La Mouaie à St. Brélade. Ch'tait comme un nouvieau monde pour mé. À l'êcole ch'tait l'Angliais tch'en gângnait, et à l'Êcole du Dînmanche à l'Églyise dé St. Brélade étout, et mé, accouôteunme au Français à l'Églyise dé St. George, j'trouvais ch'là drôle et êtrange. Mais les deux Recteurs tch'avaient dêjà ieu un êffet important dans ma vie d'chu temps-là. Moussieu John Pépîn à St. Ouën et Moussieu John Arthur Balleine à St. Brélade, 'taient d'fanmeux Jèrriais, et parmi l'Angliaîchinn'nie d'St. Brélade j'pâlions souvent en Jèrriais, Moussieu Balleine et mé, quand j'avions la chance.
En a-t-i' pâssé, d'l'ieau par La Corbiéthe, dépis chu temps-là! Et tch'il aventuthes dans ma vie! J'en ai fait et veu d'toutes les sortes! J'ai vêtchu dans plusieurs pays, j'ai êtudié les louais d'Jèrri, bâsées sus la vielle Couôteunme dé Nouormandie, soudardé dans la Milice Rouoyale dé Jèrri et dans l'Armée Rédgulièthe d'Angliétèrre et dans l'Armée Cannadgienne, en paix et en dgèrre, travailli dans la bureaucratie du Cannada et d's Êtats-Unis d'Améthique et dans l'mêtchi d'batisseux d'navithes, et viagi l'tou du monde en mé et par avion duthant mes trente-trais ans dé r'traite, et crouaîsi l'Atlantique eune souoxantaine dé fais. Et j'ai ieu la chance dé gângni assez dans mes travaux avau l's années pour aver les mouoyens d'visiter Jèrri touos l's ans dans ma vieillèche. Tchi belle vie! I' faut cèrtainement r'connaître qué l'Bouan Dgieu m'a té bouan, et j'Li'en sis r'connaîssant.
Eune chose tchi m'amuse tchiquefais est qué les gens mé d'mandent comment qu' j'ai peu faithe des sou pour viagi d'même. J'n'ai janmais seu comment faithe des sou, mais j'ai seu comment travailli pour en gângni, et pis comme tchi les couoyer et en mett' dé côté pour en profiter dans mes vièrs jours. Né v'la eune fanmeuse léçon qu' nous-s-apprend quand nou n'est pon nés dans l'opulence!
George d'La Forge
Viyiz étout: