Les Pages Jèrriaises

Les Célèbres d'Cart'rêts

Fort Lauderdale, Florida,
U.S.A.
Lé 11 dé mar, 1972.

Moussieu l'Rédacteu,

Dans l'couothant d's années qu'j'ai d'meuthé en Améthique j'n'ai pon rencontré fort d'Améthitchains tch'ont ouï pâler d'l'Île dé Jèrri. Ouaithe qué j'ai êprouvé raide à pâler l'Angliais a la mode Améthitchaine, j'ai tréjous 'té atchûsé d'aver un accent Angliais, et v'la tchi mène tréjous à la tchestchion: "Dans tchi partie d'Angliétèrre qu'ou-s-avez veu l'jour?" Quand j'rêponds "J'n'ai pon 'té né en Angliétèrre; j'sis natif d'eune pétite île tchi faisait partie du pays tchi fît la contchête dé Angliétèrre en 1066 - l'île Anglo-Nouormande dé Jèrri" - i' m'dîsent "Bon" Jé n'savais pon qu'New Jersey avait fait la contchête d'autcheune chose!"

I' faut don eune longue explyicâtion géographique - et historique - pour lus faithe à saver qu'Jèrri n'est pon new Jersey - eune affaithe qué nou créthait tch'il' éthaient apprîns à l'êcole. La drôle dé chose est tch'i' savent tous tch'i' y'a eune vaque Jèrriaise, mais la grand' partie d's Améthitchains qu'j'ai rencontré n's'étaient janmais d'mandés dé où'est qu'ou v'nait. Enfîn, lé fait tch'i' savent tchiquechose entouorre lyi - san portrait est sus les tinnes dé lait prêsèrvé appelé "Pet Milk" - m'aîgue à les mett' au couothant au sujet d'l'île, et j'lus dis tréjous qu'la belle vaque Jèrriaise est ma couôsinne gèrmaine! Et pis quand j'lus d'mande comment qu'New Jersey vînt à êt' appelé d'même, j'n'en ai pon rencontré fort tchi pouvaient mé l'dithe!

Messire George Carteret V'la tchi m'donne la chance dé loûser couot' chièr Jèrri et lus montrer comment qu'les Jèrriais ont tréjous 'té louoyaux à la Couronne d'Angliétèrre tchi r'présente lé Duc dé Nouormandie, dépis tch'il 'tait lé Rouai Dgilliaume Preunmyi d'Angliétèrre et Duc dé Nouormandie en mème temps. Et v'la tchi mène à la dgèrre civile en angliétèrre et à l'assasinnâtion du Rouai Charles Preunmyi, et à l'êcappe du Prince Charles et s'n arrivée dans l'Île dé Jèrri, où'est tch'i' trouvit la beinv'nue et la seûtheté en mème temps souos la protection dé Moussieu d'St. Ouën, Seigneur du Fieu Haûbèrt et Seigneuthie dé St. Ouën. Et j'sis ordgilleux d'pouver lus dithe qué l'nom d'fanmile dé Moussieu d'St. Ouën est de Carteret aujour d'aniet comme i' l'était dans chu temps-là, et qu'St. Ouën est ma pâraisse natale.

Et j'peux lus dithe qué les Jèrriais, natifs et habitants d'eune pétite île dé douze milles par six, n'avaient pon d'peux du tèrribl'ye Cromwell, et tch'il' eûdrent lé couothage dé procliâmer l'Prînce Rouai Charles Deux d'Angliétèrre aussitôt tch'il' eûdrent la nouvelle dé l'assasinnâtion d'san p'pèe. Lé rouai don régnit duthant l'Protectorat d'Cromwell ouaithe tch'i' n'tait pon couronné ni assis sus san trône. Et né v'chîn l'occâsion tchi s'présente pour lus dithe comment tch'i' fut si r'connaîssant qué quand i' fut, en fîn d'compte, restaûré comme rouai dans san rouoyaume, i' n'oublyiyit pon d'rêcompenser san protecteur et anmîn - Moussieu d'Carteret. I' lî fît présent d'un territouaithe dans l'Nouvieau Monde, et ch'tait l'Seigneur de Carteret d'St. Ouën li-mème tchi l'nommit New Jersey en l'honneu dé s'n Île natale. La ville tch'a nom Carteret dans l'Nouvieau Jèrri est nommée d'après li, et un tîmbre en honneu d'l'occâsion fut împrînmé par les Êtats-Unis en 1964.

I' faut dithe qué l's Améthitchains sont hardi întérêssis, et mème êmèrvilyis, d'ouï l'histouaithe, et la preunmié chose tch'i' font est d'chèrchi eune carte géographique pour vaie où'est tch'est l'île, et deux-s'trais pèrsonnes dé ma connaîssance l'ont vîsitée d'pis.

En êcrivant l'nom d'l'illustre fanmile de Carteret, v'la tch'i' m'fait penser à la Légende du Nièr Chéva, un j'va tch'appartenait à iun des Seigneurs de Carteret. L'Académicien Frank Le Maistre en fît un mangnifique èrcit dans iun des bulletîns d'L'Assembliée d'Jèrriais, et ou vaut la peine d'èrcorder ichîn. Un jour, dans les 1460, dans l'temps qu'les Français avaient envahi l'êst d'l'Île et prîns L'Vièr Châté, cèrtains d'ches'chîn êprouvîdrent à happer l'Seigneur Ph'lippe de çarteret tch'était à la pêque trantchilement à La Mathe au Seigneu, tchi s'trouve entre les Grèves dé St. Ouën et san mangni. Il' 'taient v'nus à j'va en cachette par les grèves du côté du Vau d'La Mathe. Quand Moussieu d'Carteret l's avisit, i' sautit sus san bieau nièr chéva et cachit pour lé mangni! Mais d'vant arriver bein liain, né v'la eune aut' bande à sa rencontre. I' vithe dé bord et file pour Lé Vau d'Tchithiéthe, un pâssage entre côtis d'à pic des deux côtés, 22 d'laize et 18 pids d'hauteu. Les poursuivants lé t'naient quâsiment et lî criyaient "Rendez-vous!", mais il éthait aimé mus la mort qué d'êt' prîns. Arrivés au Vau d'Tchithiéthe, i' n'manquent pon - j'va et homme sé lanchent par dessus et, ayant d'vanchi les Français, sé rendent au mangni tchiques moments auprès. mais, tchi course! Lé pouorre chéva 'tait à but, et i' tchit mort souos san maître. Et dé chagrîn, lé Seigneur voulit l'entèrrer dans l'gardîn du mangni.

I' m'sembl'ye aver ouï tch'i' y'a un portrait d'chu j'va-là au mangni. La préchaine fais qué j'vèrrai Moussieu d'St. Ou i' faudra qué j'lî d'mande s'il est acouo là.

George d'La Forge

 

Viyiz étout:

 

Les Pages Jèrriaises