Le Ménage ès Feuvres,
St. Ouën.
Le 14 juin, 1969.
Moussieu l'Rédacteu,
Quand Mess Lé Boutilyi John Wesley a am'né san j'va pour êt' féthé, j'disais à Papa eune séthée auprès l'thée quand j'tais mousse et que j'tions assis au pid du feu, il a pâlé du rouoge chéva au couôsîn Cliément L'Cornu d'L'Êta. Tchi difféthence qué y'a entre un j'va et un chéva?
Eh bein, Papa m'dît, i' n'y en pon, d'difféthence. En pâlant, nou dit tout simpliément 'un j'va', mais quand ch'est eune affaithe dé la couleu d'un j'va, ch'est pus aîsi d'dithe 'un nièr chéva' ou 'un rouoge chéva' qué d'dithe un nièr ou un rouoge j'va. Pour un gris, ch'est pus aîsi d'dithe un gris j'va qu'un gris chéva. Êprouve-s-y, et tu vêrras!
L'aut' jour, j'dis à Papa, quand Cap'taine L'Feuvre, d'La Fèrme d'Gros Nez, 'tait dans la forge, i' t'dit qué Missis Lesbithé 'tait 'lé j'va dé d'vant'. Pourtchi tch'il appelait eune femme un j'va?
J'vai qu'tu'est comme les j'vaux té-mème man garçon, Papa m'dit, tu-as l'ouïe finne! Mais pour rêpondre à ta tchestchion, ch'n'est pon qué l'Cap'taine voulait mett' Missis Lesbithé du rang des annimaux. Au contraithe - i' voulait la loûser! Quand nou dit qué telle et telle est lé j'va dé d'vant, v'la tchi veurt dithe qu'ou travâle dû et qu'oulle est prête à prendre d'la responsabilité et qu'ou peut condithe la fèrme lyi-mème!
Hièr, quand p'pèe 'tait à féther la junment à Mess Le Cornu Darrique, j'dis à Papa, et tch'il 'tait à coper la corne du chabot à la junment, il env'yit san couté rupêment dans san bosc à féther et i' dit à Mess Lé Cornu 'nou pouorrait aller à j'va sus chu fichu couté à corne-là!' Tch'est qu'ch'la veurt dithe? Nou n'peut pon aller à j'va sus un couté!
Mais nan, Papa m'dît, v'la tchi veurt dithe qué l'couté n'cope pon. Et y'a mème pus d'eune manniéthe à dithe qu'un couté n'est pon assez affilé pour coper. Nou peut dithe tch'i' cope tout chein tch'i' trouve! Comme tu l'sai bein, un couté n'vait pon, et i' n'peut pon trouver rein, ch'est en tchi ch'est eune bouanne manniéthe dé dithe tch'i' n'cope pon assez pour coper autcheune chose!
Fallait-i' tch'il eûsse d'la pacienche, lé pouôrre vièr papa, pour rêpondre à toutes les tchestchions qué j'lî pôsais au sé. Ch'est vrai qué j'tais tchuthieux et qué j'voulais saver tout. J'lé ouïs dithe à un homme eune fais qué j'tais aussi tchuthieux comme les femmes! J'pense souvent à ches vièrs temps-là ches jours qué j'sis tout seu au Ménage et qué j'vai les vielles muthâles dé la salle lé tou d'mé, et j'mé d'mande combein tch'i' y'a d'jannes Jèrriais tchi savent qué la pus grande appartènement d'la maison, à bas, 'tait appelé La Salle. Ch'est là tch'est la grande âtre et l'fou à fouângner. I'n'y avait pon d'tabl'ye dédans quand j'tais mousse. Lé couvèrcl'ye sus l'tro à pêtri faisait sèrvi d'tabl'ye, et nou s'assiévait sus un banc d'chaque côté du tro.
I' n'y avait pon d'chambres à haut dans chu temps-là. Ch'tait l'galetas, et nou pouvait y monter dé d'dans la salle par eune trappe dans la carre à côté d'l'âtre. Oulle est acouo-là, mais oulle est freunmée à ch't heu et fait partie d'la chambre en d'ssus. Y'avait entrée dans l'galetas par lé vitchet dans l'pîngnon étout. L's anciens couochaient dans l'aître à liet tch'était dans l'allée et contre la muthâle du driéthe dé la maison. I' d'vait y faithe eune fraid d'tchian dans l'hivèr, man bouanhomme, mais il' 'taient dueurs, les anciens. Ch'est assez r'mèrquabl'ye, quand mème, qué ch'tait l'année d'la grand' fraid, 1895-96, qué ma grand'grand' méthe mouothit à l'âge dé huiptante-neuv ans, mais j'ôse penser qué ch'tait pûtôt l'âge qué la fraid tchi l'emportit. J'avais quatre ans quand ou mouothit, ayant 'té né en 1891.
Ch'tait eune année împortante, 1891. L's Êtats passîdrent la louai ordonnant l's êlections au scrutîn, et la preunmiéthe êlection souos la nouvelle louai eut lieu l'preunmyi d'dézembre. La population d'Jèrri, d'après l'réconsement fait chu jour-là, 'tait 54,518, ch'est en tchi j'considéthe ma naissance împortante dépis qué, sans lyi, la population n'éthait 'té qué 54,517!
Ch'n'est pon d'aniet qu'nouos Êtats r'cliâment et affirment l'îndépendance dé l'Île vis-à-vis du gouvèrnément Angliais. Lé vîngt-trais d'juin, 1891, un Order du Conseil appointit lé Lieut'nant Gouvèrneux président du Conseil dé la Prison sans les consulter, et eune réprésentâtion fut faite à Sa Majesté en Conseil lé 19 d'octobre la priant d'annuler l'Ordre. Sa Majesté fut grâcieuse envèrs Les Êtats, et un nouvel Ordre en Conseil en date du 27 juin, 1894, en êffet annulit l'Ordre du 23 d'juin, 1891.
Pour couronner l'année d'mil huit chent nénant'tch-ieune, la neuve églyise dé St. Paul, en ville, fut ouvèrte lé 29 septembre, fête dé St. Miché et touos L's Anges, et man jour dé naissance!
George d'La Forge
Viyiz étout: