Le Ménage ès Feuvres,
St. Ouën.
Lé 22 d'août, 1970.
Moussieu l'Rédacteu,
“Tchi bieau p'tit garçon!”, s'fît Manman en pâlant à Missis Lesbithé un jour qu'oulle 'tait v'nue à la forge, à St. Ouën, quand j'tais mousse.
“Véthe, Missis Le Feuvre,” Missis Lesbithé lî dit, “mais ché s'sait eune aut' histouaithe s'ou' pouviez l'vaie siez nous à L'Êta quand il est à la plyie! J'n'ai janmais veu un mousse dé l'garder dans la maiethon!”
“Mais touos l's êfants sont d'mème, ma pouorre Missis!”, Manman lî dit. “Sans doute, ch'n'est p't êt' pon l'cas parmi les riches, car i' peuvent acater d'bieaux jouets pour l's abûser dans la maiethon!”
“Bah! Des jouets?”, s'fit Missis Lesbithé. “Ch'n'est pon ch'la tchi li manque, à ch'ti-chîn il en a à gogo, des jouets. I' n'na tant tch'i' sont tréjous souos les pids dans la tchuîsinne quand i' les dêhalent pour jouer avec. Et nou li'en donne tréjous. À Noué passé, Mait' Ph'lippe Gallienne lî donnit eune belle petite grand'tchaîse tch'il avait dolé li-mème. Ou' pâlez d'tchi bein fait. Chutte pétite tchaîse-là n'a qu'à peine trais pouces dé haut, et les pids et les broques et l'dôssyi sont parfaitement formés et alîngnis. Ch'est mèrveilleux quand nou pense tch'i' fit ch'là d'un seul mio d'bouais!”
“Faut-i' tchi s'sait aufait, Mess Gallienne!”, s'fit Manman. “I' faut aver d'la pacienche pour faithe des choses dé mème. Il éthait fait un bouan tchèrpentchi! En pâlant d'tchèrpentchi, lé Ouinneteur, lé deuxième dé nouos garçons, tch'en est iun, est houors démeuther à St. Brélade. I' s'est mîns à fèrmer auve san bieau-fréthe Fraînque d'Aubert. I' sont dans eune ferme tchi s'appelle L'Harmonie, et j'espéthons, m'n homme et mé, tch'i' s'en vai y'en, aver, d'l'harmonie, entre les deux!
“J'avions espéthé, quand nouot' grand, l'George Francis, apprîns sa vocâtion d'forgeux - comme san p'pèe et comme lus anchêtres - et qu'Ouinneteur apprîns la vocâtion d'tchèrpentchi, qué j'éthions êtablyi l'conmèrce d'chârron. Ouinneteur éthait 'té l'faîtheux d'hèrnais, et san p'pèe et san fréthe éthaient fait toutes les féthâles dans la forge. J'éthions, sans doute, bâti eune tchèrpent'tie driéthe la forge. Mais tch'est qu'ou voulez - ou' connaîssiz bein l'vièr diton, 'L'homme propose, mais Dgieu dispose!' Sus trais garçons, i' n'y a qu'Dâlfeusse tch'est auve nous. Lé George est houors démeuther à St. Pierre, où'est qu'sa femme a héthité d'san p'pèe, l'Cap'taine Jean Ph'lippe Giffard, dans la vallée. Jé n'sai pon tch'est qu'les jannes ont dans la cahueûle ches jours. Lé temps passé, les garçons restaient siez ieux ou lus en allaient en mé. Enfîn, i' n'faut pon nouos plaindre trop. J'sommes contents qu'Dâlfeusse a décidé d'apprendre sa vocâtion ichîn dans la forge auve san p'pèe. J'en sis d'autant pus contente mé-mème viyant tch'i' c'menche à pèrdre la veue, san p'pèe.
“Y'a tchique temps tch'i' c'menche à vaie d'pres. J'tais dans la forge l'aut' jour quand j'allis lî porter sa bouochie viyant tch'il 'tait trop embarrassé pour v'nîn à la maiethon, et j'en frémissais dé l'vaie tremper l's ôtis tch'il 'tait à faithe pour la carriethe. I' les halent touos rouoges du feu, et pis i' les fouorrent dêliêment dans l'ieau ou dans l'huile et les tcheint en l'air au but d'ses pînchettes et les sent et les r'gardent c'menchi à r'fraidgi. Quand i' crait tch'i' sont d'la couleu tchi i' faut, i' les trempent pour bouan dans la toube. Eh bein, i' m'ttait chu fé caud-là si près d'sa fache pour lé vaie comme i' faut qu'j'avais quâsi peux tch'i' s'en allait traler sa barbe et s'brûler l'but du nez!”
“Mais pourtch'est tch'i' n'met pon des leunettes?”, s'fit Missis Lesbithé.
“I' n'na dêjà acate deux pathes!”, Manman li dit. “I' n'trouve pon qué v'la tchi li'aigue fort. L's êtinchelles n'lus fait pon d'bein quand i' sont à frapper sus l'enclieunme et quand il est à tremper d's ôtis, i' d'veinnent embliâsées.”
“Eh bein,” Missis Lesbithé lî dit, “j'ai ouï tch'i' y'a un Mess Sinné en ville tchi vend d'bouannes leunettes. Sa boutique est d'l'aut' côté d'La Faithe, à côté d'la cheinne à Podger, où'est tch'i' y'a un j'va en bouais dans lé d'vant. Dites don à Maît' George d'êprouver-là quand li en acat'ta eune neuve pathe. I' n'ont, à ch't heu, tch'ont un manniéthe dé cro qu'nou peut mett' lé tou d's ouothelles pour l's empêchi d'vouos tchaie sus l'but du nez. Maît' Ph'lippe Gallichan, l'prédicateu, en a eune pathe dé mème. J'en sis bein contente, car quand il avait ses vielles leunettes i' lî tchilyaient dans des temps sus l'but du nez quand il 'tait à nouos liéthe un chapitre dé dans Les Saintes Êcrituthes, et pis i' pèrdait sa pliaiche et r'quémenchait au c'menchement du chapitre pour êt' seux d'n'en mantchi pon, et v'la tch'allouangnait l'sèrvice! Auve ses neuves leunettes i' nouos liet ch'la couothamment! I' faut tch'i' s'saient à bouannes, ches leunettes-là à Mess Sinné. Ch'est probabl'ye tch'i' les fait v'nîn d'Londres en Angliétèrre!”
George d'La Forge
Viyiz étout: