Fort Lauderdale,
Florida, USA.
Lé 13 dé janvyi, 1979.
Moussieu l'Rédacteu,
A forche d'attendre, j'ai des nouvelles dé Jèrri tchi m'disent qué l'Sénateu Cyril Le Mèrquand r'est êlu pour eune aut' bordée dans L's Etats. Félicitâtions, Moussieu l'Sénateu! Et i' faut féliciter l's êlecteurs d'aver ieu l'bouân sens d'voter pour li acouo eune fais.
J'n'ai pon 'couo veu l'rêsultat d'l'êlection, mais j'ai r'gret d'ouï qué l'Sieur Thomas, ex-Député de St. Pièrre, né fut pon êlu. I' m'a tréjous donnè l'împresson d'êt' iun des miyeurs membres d's Etats. Mais né v'là la vie politique. I' faut des gângnants et des pèrdants, et l'bonheu d'iun est l'malheu d'l'autre. J'tais bein content d'ouï qué l'Sieur de Carteret s'était trouvé à la tête des vouaix dans toutes les pâraisses. V'là tchi montre qué les Jèrriais ont acouo du respé pour chu fanmeux nom-là.
J'vai, dans la gâzette du 16 dé novembre, la dreine èrchue ichîn, portrait d'un tas d'belles jannes filles dé difféthentes parties du monde tchi sont à aver des têtes-à-têtes au Fort Régent auve des anciens des pâraisses dé St. Hélyi, St. Brélade, St. Pièrre, St. Jean et Grouville. Pourtchi pon St. Ouen? Si j'avais 'té en Jèrri, étant St. Ouennais, j'n'éthais pon ieu la chance de les vaie, ches belles jannes filles. Ch'est p't-êt' aussîn bein qué j'tais en Améthique dans l'temps car j'éthais 'té chagrinné d'mantchi eune fête dé même - mé tch'a tréjous admithé eune belle femme. Mais j'sis content d'vaie qu' au mains deux d'mes bouans anmîns, l'Connêtabl'ye Winter Le Mèrquand et l'Sieur Elias Balleine, touos les deux des Pièrrots, 'taient parmi les mêssieux tch'eûdrent la chance tchi m'êcappis à cause d'étant Gris Ventre et “pigeon voyageur”. Enfîn, ch'est probabliément eune bouanne chose qué jé n'tais pon lá. Pâlant généralement, j'sis rêellement tînmide dé ma sorte, et j'ai pûtôt peux des femmes et j'n'éthais p't-êt' pon seu ioù m'fouôrrer si ieune dé ches belles hardelles là s'était appréchie trop près d'mé! Ch'est probabliément chutte tînmidité tchi m'gêne en prèsence des femmes tchi m'a empêchi d'en trouver eune deuxième duthant mes souoxante ans d'veuvage! Et pourtant, criyiz-mè ou n'mé criyiz pon, j'ai accouo espèthance!
Viyant l'portrait dé m'n anmîn Laïesse Balleine mè ramémouaithe les mangnifiques séthées pâssées siez li dans l'temps d'san p'pèe et sa m'mèe quand nou-s-avait des partis dans les temps d'Noué. J'pâle dé y'a eune souoxantaine d'années, pus ou mains. Lé Connêtabl'ye (pus tard Juge) Francis Vibert Le Feuvre fut Connêtabl'ye dé St. Pièrre dé 1907 à 1912 et ch'tait dans chu temps-là que j'tais san ségrétaithe, à ses frais - pon ès frais d'la pâraisse. Dans chu temps-là, j'crai tch'i' n'y'avait qu'la pâraisse dé St. Hélyi tchi payait un ségrétaithe.
Si ma mémouaithe n'est pon trop fautive, lé Sieur Laïesse Balleine démeuthait à gauche dans la rue tchi m'nait d'l'églyise au Saut Faluet. Ch'tait-i' pon La Chasse? Dé l'aut' côté d'la route (ch'tait du but du chînm'tchiéthe) 'tait la propriété au Sieur Walter Thomas Dallain. I' fut malade dé la conseunmtion pour longtemps et avait un liet l'long d'la f'nêtre en d'vant d'sa maîson, et j'lé viyais là au matîn quand j'pâssais par là en c'mîn pour La Fosse, domicile du Connêtabl'ye. Jé d'meuthais à La Mouaie à St. Brelade dans l'temps.
Pus bas, à gauche en allant pour lé Saut Faluet, 'tait la fèrme au Sieur John Elie Martin, et ch'tait un nommé Viel tchi d'meuthait au Saut Faluet.
Ch'tait dans chu temps-là qué deux jannes hommes, Ray Miché (janne fréthe du fanmeux “J.B.”) et Herbert Le Grand, vîndrent dé La Côte auprès lus chînq ans d'apprentissage. J'les viyais souvent, habilyis dans lus habits du Dînmanche et auve un dû chapé (“bowler hat”) sus la tête, et v'la tchi m'faîsait penser tch'i' y'avait cèrtainement eune forteune à faithe à La Côte. I' v'naient ès partis siez l'Sieur Balleine, et Ray Miché d'vînt amouotheux d'la pus janne des deux soeurs à Laïesse. I' lus mathyîdrent et ou s'en fut à La Côte auve sén homme. J'n'ai janmais r'veu les Sieurs Miché et Le Grand. J'sai bein qu' à la fîn du temps i' d'meuthaient à Montréal, et Ray mouothit là y'a tchiques années. Y'a longtemps qu' j'ai pèrdu d'veue du Sieur Le Grand et j'crai tch'il est mort étout.
Ch'tait un grand pliaîsi pour mé d'vaie l'portrait d'Moussieu et Madanme Laïesse Balleine dans la gâzette. Laïesse èrsembl'ye à san p'pèe comme deux d'goûts dg'ieau. Dé les vaie mé ramémouaithe ses pathents tch'étaient si charmants et hospitalyièrs.
George d'La Forge
Viyiz étout: