San Antonio, Texas,
U.S.A.
Lé 25 dézembre, 1971.
Moussieu l'Rédacteu,
Aniet, jour dé Noué, en fanmile siez ma fille ichîn en Améthique - bein liain d'Jèrri - j'pensais pûtôt ès choses et couôteunmes des vièrs temps dans l'Île natale. Quand j'viyais l'bel arbre d'Noué auve touos les présents au pid, j' pensais au temps qu' Papa nouos copait eune branque dé dgèrrue ou d'vèrt bouais d'autcheune sorte pour mett' sus la p'tite ronde tabl'ye dans la carre dé la tchuisine à La Forge, et qué j'copais des mios d'papi couleuthé en forme d'églyises pour lé décorer, et pis j'y pendais des mios d'riban ramássés ichîn et là duthant l'année, et j'mettais des p'tites chandelles dans des p'tites lantèrnes qué ma marraine d'Aubert n'avait donné pour illeunminner l'arbre.
Janmais j'n'oublîthai l'pliaîsi d'trouver eune orange et les deux-s-trais almandes, nouaix et codrettes tch'étaient dans ma cauche pendue à côté d'l'âtre la servelle, et comment qu' j'avais êprouvé à m'garder êvilyi pour êt' seux d'vaie Papa Noué d'valer par la cheunm'née pour les mett' dans la cauche! Nou-s-avait attendu fête longtemps pour le jour dé Noué, et i' sembliait tch'i' n'arrivethait janmais!
Quand j'vai les présents d'à ch't heu souos l'arbre d'Noué, des présents tch'ont couôté eune pétite forteune compathée ès deux-s-trais sou qué l's anciens pouvaient affaûrder pour des jouets y'a huiptante ans en Jèrri, i' m'veint à l'idée qu' ch'est eune vraie pèrte d'sou. Les mousses ichîn ont tant dé jouets tch'i' n'savent pon tchi en faithe. I' n'y a qu'à marchi les rues pour les vaie abandonnés sus les p'louses en d'vant des maisons - des p'tits hèrnais d'toutes les sortes, des cannons, des machinnes dé construction et des motos, en minniatuthe, bicyclettes, etc. J'dis abandonnés mais j'dév'thais pûtôt dithe néglyigis. Y'a tant d'prospèthité en Améthique qué les gens n'ont pon apprîns la valeu des sou ès mousses, ni l'soin ni la nécessité d'couoyer, ch'est en tchi i' n'prannent pon la peine dé souangni d'lus jouets et dé l's entrer quand veint la niet et i' d'veinnent avraûnés bein vite. Quand j'en palais à un anmîn dans la rue l'aut' jour, i' m'dit : Eh bein, ch'est ch'la tchi fait les reues du conmèrce touanner! Tant pus d'jouets avraûnés ou dêtruits, tant pus i' faudra en r'fabritchi, et v'la tchi donne du travas au monde. J'pense bein que j'sis trop vyi et trop Jèrriais dans l'âme pour apprécier chutte théorie-la. Pour mé de tchi abandonné ou dêtruit mal à propos est d'tchi pèrdu, et l'vier diton Pas d'soin, pas d'mênage vaut acouo la peine dé prandre à tchoeu!
Viyant qué jé n'bai pon en mangeant, si touos ches Améthitchains-chîn savaient l'Jèrriais i' pouorraient dithe Il est comme les brébis, i' n'bait pon!, mais j'aime bein eune fais à baithe à l'occâsion, et j'pense qué ché s'sait întérêssant d'gouôter chein que l's anciens faIsaient pour baithe dans l'temps jadis. J'n'ai pon connu ches bouaissons-là, mé-mème - sénon l' chaudé. Il 'tait fait atout du lait et du cidre caud et d's oeufs battus. Eune bollée d'chaudé d'mème 'tait fanmeuse pour sé rêcauffer quand nou-s-avait fraid. Eune aut' bouaisson qu' j'ai connue, étout, 'tait du flipe, fait atout du cidre doux, d'l'ieau d'vie d'cidre et du chucre. Ma grand'-grand'méthe et Papa en faîsaient acouo quand j'tais tout mousse.
D'aut bouaissons du temps jadis, qué j'n'ai pon connu mé-mème mais tchi sont mentionnées dans l'Dictionnaithe Jèrriais d'L'Académicien L'Maistre, sont le chamiard et l' baûchet. Lé chamiard, tchiquesfais appelé chamillard, 'tait eune manniéthe dé biéthe auve du myi comme base qué les Jèrriais faîsaient ès tchînzième et seizième siècl'yes. Il' en faîsaient d'deux sortes - lé baûchet (ou baûtchet) et l' vitot (ou vitoué). L'baûchet sé b'vait à m'suthe tch'il 'tait fait, mais l'vitot 'tait pus fort, et i' s'gardait. I' pathait qué ch'tait au c'menchement du dgiex-septième siècl'ye qué l'cidre vînt sus l'tapis comme bouaisson.
J'm'èrsouveins, étout, des bouannes séthées en Jèrri dans les temps d'Noué, et j'mé d'mande si ch'est acouo la couôteunme dans l'Île. Nou l's appelait des partis d'Noué. Y'avait d'la danse et du rêvillon et des jeux, et v'la tchi duthait tard dans la niet. Les jeux 'taient populaithes parmi les jannes. V'la tchi lus donnait eune chance dé s'trouver pûtôt ensembl'ye sans la seurvillance des pathents. Iun des jeux 'tait d'conter l's êtailes. Lé garçon d'mandait à la janne fille tchi lî pâssait près du tchoeu d'li'aîdgi à les conter. Sans doute i' fallait sorti d'houors pour les vaie, et v'la tchi donnait la chance au janne homme dé l'embraichi. Dans chu temps-là, ch't occâsion-là n'sé présentait pon souvent car les jannes filles né sortaient pon toutes seules. Y'avait tréjous la m'mèe ou la tante à les chap'ronner. Comme les temps ont changi! Mais Noué veint tréjous, et châque pays a sa mannièthe à l'célébrer!
George d'La Forge
Viyiz étout: