Trenton,Michigan, USA.
Lé 18 dé dézembre, 1982.
Moussieu l'Rédacteu,
Noué s'en va nouos tchée sus l'co d'ichîn eune sémaine, et j'vouos asseûthe qué jé n'sis pon en train d'm'en rêjoui. J'veins d'pèrdre man fréthe Fraînque, lé quatrième à s'en aller ches dreines années, et j'sommes réduits à deux fréthes (Percy, 80, et mé, 91) sus six, et jé n'sis pon bein raide mé-même. J'sai bein qu' jé c'menche à en pèrdre!
Fraînque fut né lé onze dé févri, mil huit chent nénante-chînq. Il éthait don ieu huiptante-huit ans s'il avait vêtchu jusqu' au mais d'févri d'l'année tchi veint. Quand j'tais en Jèrri chutte dreine fais j'allis vaie deux-s'trais d'ses vièrs anmîns tchi sont à bein près dé s'n'âge pour lus faithe ses complyîments, Ph'lippe Carré, tchi d'meuthe tout près d'la Salle Pârouaîssiale, Edmund Vibert dé Trodez, et Sydney Rault d'La Ville La Bas. J'sai bein qu' Edmund et Sydney 'taient à l'êcole auve Fraînque à St George, mais jé n'sai pon si Ph'lippe y'était. Il 'tait à apprendre sa vocâtion d'tchèrpentchi auve Fraînque siez Maît' Fred de Caën à Millais.
J'avons 'té însépathabl'yes, Fraînque et mé, toute nouot' vie, car ch'tait li tchi restit en Jèrri auve mé quand nouos pathents et nouos fréthes Sydney et Jean Giffard lus en fûdrent à La Côte en 1901, et j'ai d'la peine à envîsagi l'restant d'mes jours sans li. Touos l's ans quand j'èrvénais d'pâsser l'êté en Jèrri ch'tait tréjous ichîn (siez li) qué jé v'nais pour lî raconter l's êvenèments dans l'Île et les rencontres auve nouos vièrs anmîns là-bas.
Ch'tait à La Forge ("Mossgiel" à ch't heu), bâtie par Papa L'Feuvre, qué j'pâssînmes nouos preunmiéthes années ensembl'ye, et j'avons r'pâlé bein des fais, Fraînque et mé, des gammes dé tireli qué j'soulions jouer en d'vant d'l'entrée d'la forge et l'long d'La Rue Féthièthe, car nou tapait l'tireli un fichu but si nou l'attrapait en l'air comme i' faut. Et nou jouait ès marbres souvent étout, en d'dans dans l'aithe dé la tchuîsinne si Manman n'tait pon là et qu' Papa 'tait en travas dans la forge. Et nou jouait ès marbres déhors étout. Dans des temps nou s'abûsait à topinner nouos topies. Nou-s-êprouvait à en abattre ieune en topinnant atout l'autre. Pour les faithe topinner eune volée i' fallait les vier comme i' faut.
Et pis y'avait la ronfliérêsse. Ieune dé nouos tantes nouos en avait donné ieune pour Noué et j'en 'tions ordgilleux car ché n'tait pon touos les mousses tch'en avaient ieune. Oulle 'tait rouoge et vèrte et jaune et bliue, et ou ronfliait bein. Pouor eune aut' gamme dé ronfliérêsse nou faisait sèrvi eune bouanne londgieu d'ficelle doubl'ye qué nou tcheint, un but dans châque main, et nou fait eune rîndelle couôrre dessus, et pis ou ronfl'ye en touannant à grand' vitesse.
J'allions à l'Êcole Wesleyenne au Haut du Mathais. I' fallait y marchi, aller et v'nîn, touos les jours. Comme ou pouvez vouos l'înmaginner, nou-s-ûsait un tas d'bottes car ch'tait eune affaithe dé chînq ou siex milles par jour, et nou grimpait souvent les muthâles en c'min. Tchiquefais nou boulait un cèrcl'ye en couothant. Papa nouos en faisait iun dans la forge, et j'avions un avantage sus l's aut' mousses car i' nouos faisait un cro pour lé bouler et l's autres avaient à taper lus cèrcl'yes atout un bâton pour les bouler. Tchiquefais nou v'nait enn'yés d'les bouler et fallait les muchi dans tchique bel ou clios, et les r'quéthi en r'vénant d'l'êcole.
Y'avait d's aventuthes en c'mîn. Quand nou viyait eune vainne tch'allait vouos pâsser, nou-s-êprouvait à s'pendre sus l'banné d'driéthe, et les cheins tch'étaient grands assez pouvaient mett' lé pid sus l'êsseu d'driéthe. Mais les fèrmièrs, en général, fouettaient les mousses pour les faithe laîssi couôrre. Dans des temps, tchique mousse tchi n'en aimait pon iun tch'avait ieu la chance dé s'cramponner, criyait "Whip behind!" et l'fèrmyi donnait un coup d'fouet. I' n'y'avait qu'eune exception. Lé Sieur John Hamon, tch'était à la fèrme à La Fontaine, arrêtait tréjous sa vainne et învitait les mousses à monter d'dans et i' les portait tout l'long du c'mîn jusqu' à l'école. Il 'tait bein aimé par touos les mousses du vaîsinné.
Pus tard, quand Fraînque avait finni s'n'apprentissage et 'tait un au-fait tchèrpentchi et travaillait pour Ferguson, j'restais souvent en ville et j'allions au cinéma dans Phillips Street vaie Charlie Chaplin sus l'êcran. Fraînque avait un fanmeux sens d'humour et admithait Charlot et ses fariboles.
Il a pâssé hardi dg'ieau par La Corbiéthe dépis chu temps-là, et autrément qu'les années d'la dgèrre dé 1914-18, quand j'tions dans d'difféthents régiments sus l'camp d'batâle, j'avons pâssé eune partie d'châque année ensembl'ye.
Hélas, Fraînque est au r'pos êtèrnel à ch't heu et j'mé lamente. Mais ch'est la vie, et i' faut bein s'y soumettre.
George d'La Forge
Viyiz étout: