L's anciens du temps pâssé éthaient d'la peine à r'connaitre lus p'tit Jèrri si' pouvaient r'vénîn pour lé r'vaie. Les vielles cauminnes et maiethons d'fèrme en granit, aut'fais couvèrtes en glyi, sont quâsiment toutes couvèrtes en ardouaises ou tuiles, et les muthâles sont pliâtrées ou chînmentées. Dans bein des cas, des neuves maiethons ont 'té bâties dans l'gardîn en d'vant et la belle vielle cauminne est dév'nue partie d's offices dé fèrme en driéthe. Des neuves maiethons sont en train d'construction par toute l'Ile. I' n'èrsembl'yent pon ès vielles, étant d'faichon modèrne et tchiquefais êtrangiéthe. I' sont câsuelles compathées ès cheinnes du temps pâssé, tch'avaient des muthâles solides et êpaisses.
Hardi d'la campangne a pèrdu sén air paîsibl'ye et a changi sa vie trantchile pour lé domaine des char-à-bancs et des motos tchi vômissent d's odeurs empouaîsonneuses dé pétrole, et tchi rempliaichent l'air sain et doux d'la Natuthe.
Lé catchet et l'angliaîchin'nie des touristes rempliaichent la vielle langue du campangnard. Le fèrmyi tchi mène ses vaques au clios à la pâtuthe, et tch'a l'preunmié drouait à la route, est souvent embêté par les motos, et même les pouorres vaques sont tchiquefais en dangi d'ches motoristes tchi craient qu'les routes lus appartcheinnent!
Un tas des Brétons qu'lus grands-péthes 'taient v'nus comme domestiques ont mathié des Jèrriaises et sont à ch't heu propriétaithes dé hardi d'nouos bouannes fèrmes, et nou vait lus noms, étout en ville dans l'commèrce. En général, nou peut dithe qu'un tas des vielles fanmiles Jèrriaises ont dispathu - péthinmées ou émigrées - et qu'les gens ont changi auve lé temps. Il' ont bein pus d'conforts à ch't heu, et tant pus tch'il en ont tant pus il' en veulent. I' travâlent mains d'heuthes et gangnent pus d'sou par heuthe! Tant pus qu'les gages hauchissent, tant pus il en couôte à vivre, et l'affaithe n'en finnit janmais! L'ouvriyi gangne dé bein pus hauts gages mais i' lî couôte tant à vivre tch'i' n'a pon fort pus d'sou dans sa pouchette auprés qu'sa bouannefemme a 'té à la boutique au sanm'di tch'i' n'avait quand les gages 'taient à dgiex-huit ch'lîns la s'maine !
Tout est boul'vèrsé d'nouos jours. Les travailleurs gaspillent lus temps et font souvent pus d'sou qu'les cheins tchi lus donnent du travas! La souo-disant r'forme gaspille nouot libèrté et nouos vielles couôteunmes! J'avons ieu deux dgèrres pour donner la libèrté à touos les peupl'yes, et y'a mains d'libèrté dans l'monde d'aniet tch'i' n'y'avait d'vant la dgèrre dé mil neu chent quatorze
Les poules né ponnent pon et les vaques né donnent pon à mains qu'nou n'les nouôrrissent atout des boulets d'toutes sortes d'matchiéthes comprinmées! Nouos couochons n'veulent pus d'chours! Les Jèrriais oublient l'Jèrriais! Les femmes copent lus g'veux et les jannes hommes les gardent longs, et les femmes mettent des braies à la pliaiche dé cotillons! Les Brétons n'mettent pus d'chabots, et la grand' tchéthue s'fait sans j'vaux! L'temps pâssé nou m'ttait d'la peintuthe sus l'bouais pour lé consèrver: à ch't heu les femmes s'en mettent sus l'mûsé pour l'empêchi d'fliêtri, et sus l's ongl'yes pour qué nou n'pièsse pon vaie quand i' sont en deu - l's ongl'yes - pas ieux!
Nou brûle les gens à la pliaiche dé l's entèrrer quand i' sont morts, et les Minnistres liêsent des p'tits doux psaumes ès entèrrements à la pliaiche du bouan vièr solide tchînzième chapitre d'la preunmiéthe êpitre ès Corintcheins, tchi nouos dit un tas d'choses au sujet des dreins jours et d'la rêsurrection des morts et d'la vie êtèrnelle !
Les gens d'à ch't heu n'craient ni à Dgieu ni à dgiâbi'ye! Là où-est qu'nou viyait chent pèrsonnes à l'églyise ou à la chapelle lé temps pâssé, si nou-s en vait eune vîngtaine aujourd'aniet ch'est bein prés tout. I' n'y'a qué quand i' sont quâsi sus l'pus tch'i' pensent à déhaler la "Nouorrituthe dé lAme ". Nou vait bein tch'i' veulent même l'êtèrnité pour rein !
Au temps jadis, quand l's anciens n'pouvaient pus gabather, lusêfants s'faîthaient un d'vé d'en souangni. Aujourd'aniet l's êfants aiment mus haler sus les vièrs qué d'lus aîdgi. I' lus mathyissent quand il' ont acouo les talons jaunes et s'en vont d'meuther siez p'pèe ou m'mèe! Si l'bouanhomme a un moto les jannes veulent lé faithe sèrvi pour aller prom'ner des hardelles et faithe dé lus tchian, à la pliaiche dé sauver lus sou pour en acater iun ieux-mêmes.
L'temps pâssé non-s appranait à couoyer les sou pour en aver deux-s'trais d'côté en cas d'bésouain, et ch'tait honteux d'êt' sus la pâraisse - à ch't heu lé "Welfare State" nouos apprend qué ches idées-là 'taient binnasses et arriéthées, et ch'est au chein tchi s'sa l'pus malîn pour en haler autant qu'pôsslbl'ye d'la pâraisse à la pliaiche dé négrer sa vie !
Les Juis et l's Arabes veulent s'entr'quétilyi. L'Argentinne et L'Chili veulent voler l's Îles Britanniques dans L'Antarctique, et L'Guatémala dit que L'Honduras Britannique n'appartcheint pus ès Angliais viyant qu'L'Angliétèrre a r'donné L's Indes ès Indgiens et L'Êgypte ès Êgyptiens! Quandi qu'les peupl'yes d'la maîntchi du monde sont à s'entr'chicangni, les Russes sont à gober l'aut' maîntchi. Quand nou vait tout chu tripot, ch'est assez pour vouos d's'encouothagi et vouos faithe rêver la rouoge trie!
George F. Le Feuvre
Viyiz étout: