Fort Lauderdale, Florida,
U.S.A.
Lé 15 dé mar, 1975.
Moussieu l'Rédacteu,
La gâzette du six d'févri, arrivée chutte sémaine, nouos annonce qué ch'est l'Député Binnington tch'est l'nouvieau Sénateu. Félicitâtions! À m'n idée i' n'y a pon grand difféthence entre les fonctions d'Sénateu et d'Député, sénon qu' la gestion du Sénateu est d'pus longue duthée. J'pense bein qu' ch'est pour ch'là qu' les gens tch'ont l'ambition d'êt' Membres d's Êtats aspithent à chu titre-la.
Eune chose qué j'ai r'mèrtchi en êtudiant l'analyse des vouaix à St. Ouën est qu' les deux candidats tch'ont des noms Angliais (et Irlandais?) eûdrent pus d'vouaix qué l'candidat tch'a un nom Jèrriais. V'la tchi montre les changements qué l'pâssage du temps apporte. J'm'èrsouveins du temps qu'un candidat auve un nom autrément qu' Jèrriais n'éthait pon ieu pus qu' deux-s'trais vouaix dans eune élection à St. Ouën. Quant à mé, j'espéthé qué Moussieu Riley, Seigneu d'La Trinneté, êprouvetha acouo eune fais. Il a fait d'mangnifique travas comme Député, et j'l'ai tréjous admithé d'pis tch'i' fut maûdit par l'Union des Travailleurs à l'aérodrôme pour aver aîdgi à dêchêrgi la cartchaison d'un avion quand il' 'taient en grêve.
J'vai qu'un aut' dé mes vièrs anmîns, Ph'lippe Ahyi, MA, BSc, etc, etc., n'est pus. J'lî faîsais l'honneu et l'pliaîsi d'mett' tréjous les lettres majuscules au but d'san nom quand j'li'êcrivais; ch'est en tchi j'lé fais acouo à sa mèmouaithe. Un pliaîsant et întérêssant vièr moussieu. I' m'contait ses p'tits contretemps quand j'lé rencontrais en ville, et j'mé faisais un d'vé de l'féliciter quand i' r'chévait l's honneurs tchi li permettaient d'mett' toutes ches lettres au but d'san nom, et i' d'mandait tréjous d'mes nouvelles à ma couôsinne, Missis Ouoyamme Le Maître, quand i' m'savait houors Jèrri.
Mais un décès tchi m'a rêellement attristé est l'chein du Docteu Albert Carré, un charmant moussieu si janmais y'en a ieu iun, et j'fais part dé ma profonde sympathie à Madanme Paulette Carré, sa veuve. J'n'ai pon 'couo veu l'décès du Docteu dans la gâzette. Ou s'sa tout probabliément dans la cheinne du 13 févri tchi n'est pon 'couo v'nue. Lé Docteu Carré 'tait iun des pus charmants et aimabl'yes pèrsonnages dé ma connaissance. Et il 'tait aussi hospitalyi comme il 'tait charmant. Il 'tait doué d'eune supèrbe întelligence et ch'tait un vraie festîn d'pliaîsi d'pâsser eune séthée auve li et sa charmante danme siez ieux à St. Louothains. Ouaithe tch'i' n'tait pon Jèrriais d'naissance, il 'tait pus Jèrriais qu' bein des souô-disant Jèrriais, et il avait eune bouanne connaîssance dé nouot' vielle Langue, ayant travailli souangneusement à arrangi l'Vocabulaithe Français-Jèrriais du fanmeux Dictionnaithe Jèrriais-Français du Docteu Frank Le Maistre. J'm'en vais cèrtainement l'mantchi quand j'îthai en Jèrri.
J'n'ai pon 'couo ieu l'temps d'liéthe lé long alibêle des dêbats dans l's Êtats au sujet d'la renchiéthe qué l's avions éthont à payi pour attèrri à l'aérodrôme, mais j'vai qué l'projet d'renchiéthe en gangnit par eune pétite mâjorité d'quat' vouaix. Mais jé n'comprends pon l'manque d'accord entres les voteurs dé châque pâraisse. Par exempl'ye lé Connêtabl'ye d'St. Ouën votit contre, mais l'Député d'la pâraisse votit pour. Lé Connêtabl'ye d'St. Brélade votit contre, mais les deux Députés d'chutte pâraisse votîdrent pour. Nou créthait qu' en prîncipe l'întéthêt d'eune pâraisse vaudrait l'support euni d'ses r'présentants, mais comme l'affaithe en est, lé vote dé iun contrémande lé vote dé l'autre, et ch'est comme si l'întéthêt d'la pâraisse - comme pâraisse - est annulé compliètement. Dans touos les cas, ch'est seux qu' la renchiéthe s'en va êt' en fîn d'compte chèrgie au pâssagi et qué v'la tchi s'en va m'couôter pus pour aller en Jèrri. J'mé d'mande si j'pouorrai y'affaûrder? Si oui, j'éthai p't-êt' à faithe eune collecte en Jèrri pour r'vénîn en Améthique!
Ch'est întérêssant d'liéthe lé projet d'amendements qué l'Sénateu John Le Merquand a dans l'idée pour l'administrâtion des Êtats. Jé n'prétends pon d'êt' assez au couothant d's affaithes en Jèrri pour avanchi m's idées pèrsonnelles, mais j'vai un tas d'choses tchi m'pathaissent valer la peine d'êtudier dans san rapport à la gâzette, sustout s'n idée d'aboli lé Policy Advisory Committee et mett' ses travaux entre les mains des présidents d'conmités rêunis. J'ai tréjous ieu idée qu'les Jèrriais savent mus géther l's affaithes dé Jèrri qué d's Angliais tch'arrivent auve un tas d'lettres au but d'lus noms mais tch'ont d's idées enchéthinnées par les bésoins d'aut' pays bein pus grands qu' Jèrri.
Et l'Sénateu a eune idée absolûment Améthitchaine quand i' dit qu' un empliyé d'Êtat dév'thait êt mîns à la porte s'i' n'est pon âpre à sa tâche, comme en s'sait l'procédé dans eune maison d'conmèrce.
George d'La Forge
Viyiz étout: