Le Ménage ès Feuvres,
St. Ouën.
Lè 9 dé juin, 1979.
Moussieu l'Rédacteu,
Tant pus qué l'temps s'pâssé, tant pus j'vai des changements quand j'èrveins en Jèrri m'èrnarder dans man vièr Ménage. Et tant pus qu' j'y pense, tant pus j'èrgrette ches changements. Sans doute touos les Jèrriais dé m'n âge né peuvent qué d'les r'gretter, car il' ont veu la vie trantchil'ye dé y'a huiptante ans quand l's hommes mettaient les braies et qu' les femmes 'taient en cotillons et avaient les j'veux longs.
Les jannes craient probabliément tch'i' sont comme les Jèrriais d'chu temps-là - mais tch'i' sont pus avisés viyant tch'il' ont pus d'êducâtion et pus d'expéthience et d'saver-faithe. Mais l'pâssage du temps change bein des choses. Par exempl'ye, lé j'va et l'hèrnais ont dispathu. I' n'èrveindront janmais sus la scène dé touos les jours. Mais av'-ous janmais rêalisé qué l'homme tchi m'nait lé j'va et travaillait comme un mèrcénaithe quâsi niet et jour, et tch'était dû comme eune vielle chavette, a dispathu étout?
Ch'tî-là n'pensait qu'à gângni sa vie et d'souangni d'sa fanmil'ye et d's anciens (nou viyait tréjous les grand-péthe et grand'-mèthe assis au pid dé s'n âtre) et d'joui d'la vie honnêtement et d'faithe san d'ver dans l'êtat où'est tch'il avait plieu au Bouan Dgieu dé l'appeler. Il avait apprîns à s'comporter d'même dans l'Caticème tch'est dans la Litourgie tch'il avait gângni dans sa preunmiéthe année à l'Ecole du Dînmanche.
A la fèrme i' faîsaient l'beurre toutes les s'maines et allaient l'vendre au marchi en ville au sanm'di dans l'hèrnais, et ch'est seux tch'i' y'en avait hardi dans les campangnes tchi y'allaient à pid, au marchi, vendre lus beurre dé fèrme tch'était jaune comme dé l'or et tch'avait lus nom et adresse êtampés d'ssus auve lé mèrtcheux tch'est un objet d'mûsée à ch't heu.
Ch'est vrai qué l'fèrmyi d'nouos jours est acouo un homme dé travas, et tch'i' n'est pon rêcompensé comme i' dév'thait l'être pour ses longues heuthes dans les clios, mais sa vie est difféthente et ses ambitions n'sont pus les mêmes. I' faut tch'i' s'accorde à la vie moderne, à l'automobile, au couôtement d'l'êcolage dé ses mousses, à la machinn'nie tchi rempliaiche lé j'va et à la main-d'oeuvre dans la grand' partie d'san travas, et à s'graie atout chutte main-d'oeuvre actuelle, souvent médiocre ou piéthe et tchi finnit tchiquefais par faithe pus d'sou qu' li dans l'couothant d'la saîson.
Les villais, et même tchiques grosses têtes dé l'Ile, vouos dithont: “Mais i' font des sou, les fèrmiers!” Véthe, i' y'en a, sans doute. Mais la grand' partie d'ches'là ont héthité lus fèrmes dé ches vièrs-la tch'ont travailli commes des nègres pour laîssis du bein à lus êfants - lé mangnifique trait d'caractéthe du temps jadis. Et souvent l'héthitage avait grandi par eune atchumulâtion d'sou et d'rente à r'chéver. Et souvent nou vait ches belles fèrmes-là vendues à d's êtrangièrs, ou la maîson touannée en hôtel ou “guest house” et les tèrres louées à Dgi l'adèrt. Si l's anciens pouvaient vaie tout chenna il' en touann'naient dans lus côffres!
Un aut' trait d's anciens tch'a dispathu 'tait la couôteunme dé couoyer. J'm'èrsouveins qué quand Manman ouvrait eune pathe dé cauches ou finnissait par ranner les talons et l's ortés, ch'est à dithe l's êpaîssi, devant les mettre, et nou couoyait tellement tch'il' 'taient racc'modées continuellement jusqu'au point tch'i' n'y avait presque rein d'restant d'la cauche originale! J'n'ai veu qu' eune femme ranner et racc'moder des cauches ches dreines années, et ch'est eune danme tchi d'meuthe à L'Eta. Et quand j'vai l'nombre d'robes dé difféthentes couleurs qué les femmes mettent ches jours quand i' n'sont pon en braies, et les bieaux habits d's hommes, j'pense ès jours qué nou s'griyait atout un fa d'habits du Dînmanche tchi duthait d's années. Lé nièr fa à Papa L'Feuvre 'tait dév'nu vèrdâtre à forche d'années d'ûsage.
L's habits d'travas 'taient rabilyis si souvent qué nou viyait pus d'clius qué d'habit d'originne. Et bottes et souliers 'taient couôsus et r'becqu'tés bein des fais. Ch'tait eune grand' fête d'en aver eune neuve pathe pour aller à l'Ecole du Dînmanche et à l'églyise, sachant tch'i' fallait qu' ou duthîsse deux-s'trais ans.
Nou savait couoyer. Et ch'est tellement dans l'sang des vièrs comme mé qué j'racc'mode acouo mes cauches, et qué ouaithe qué jé n'sais pon, Dgieu mèrci, dans l'bésoin, j'pense pûtôt à couoyer qu' à dêpenser un sou mal à propos.
Mais jé n'veurs pon couoyer l'bonheu qué j'souhaite à tout l'monde en général, et à vouos lecteurs en partitchulyi!
George d'La Forge
Viyiz étout: