Les Pages Jèrriaises

Aut'fais...


Dans deux ans d'ichîn l's Améthitchains s'en vont célébrer lus deuxième chent'naithe comme nâtion îndépendante. J'liêsais eune articl'ye au sujet l'aut' jour tchi donnait eune idée des changements dans la vie des gens d'pis qu' les "pionniers" lus êtablyîdrent dans l'pays. V'la tchi m'frappit viyant qu' v'là tchi m'fît penser ès changements dans la vie des Jèrriais dépis qué j 'tais mousse, ouaithe qué j'pâle dé huiptante ans à la pliaiche dé deux chents.

Les Jèrriais dé m'n âge ont veu les changements étout, et i' pouôrront en raconter un tas ès jannes qué j 'n'ai pon d'run à mentionner ichîn. Les jannes craient probabliément tch'i' sont comme les Jèrriais dé y'a huiptante ans mais tch'il' ont pus d'êducâtion et pus d'expéthience et d'saver faithe. Mais l'pâssage du temps change bein des choses. Par exempl'ye, lé j'va et l'hèrnais ont dispathu. I' n'èrveindront janmais sus la scène dé touos les jours. Mais av'-ous janmais réalisé qué l'homme tchi m'nait lé j'va et travaillait comme un mèrcénaithe quâsi niet et jour, et tch'était dû comme eune vielle chavette, a dispathu étout? Ch'tî-là n'pensait qu'à gângni sa vie et souangni d'sa fanmile et d'ses anciens (nou viyait tréjous les grand-péthe et grand'méthe assis au pid dé s'n âtre), et d'joui d'la vie honnêtement et d'faithe san d'ver dans l'êtat où'est tch'il avait plieu au Bouan Dgieu d'l'appeler. Il avait apprîns à s'comporter d'même dans l'Caticème tch'est dans la Litourgie tch'il avait gângni dans sa preunmiéthe année à l'êcole du Dînmanche.

La couôsinne Mêrrienne Lé Feuvre dé Gros Nez, décédée y'a dêjà dgiex-huit ou dgiex-neuv' ans dans sa nénante-eunième année, m'a souvent raconté comment tch'i' faîsaient l'beurre toutes les s'maines à la fèrme, et tch'il' allaient l'vendre au marchi en ville au sanm'di dans l'hèrnais, et ch'est seux tch'i' y'en avait hardi dans les campangnes tchi y'allaient à pid, au marchi, vendre lus beurre dé fèrme tch'était jaune comme dé l'or et tch'avait lus nom et adresse êtampés d'ssus auve lé mèrtcheux tch'est un objet d'mûsée à ch't heu.

Ch'est vrai qué l'fèrmyi d'nouos jours est acouo un homme dé travas, et tch'i' n'est pon rêcompensé comme i' dévthait l'être pour ses longues heuthes dans les clios, mais sa vie est difféthente. Ses ambitions n'sont pus les mêmes. I' faut tch'i' s'accorde à la vie modèrne, à l'automobile, au couôtement d'l'êcolage dé ses mousses, à la machinn'nie tchi rempliaiche lé j'va et la main-d'oeuvre dans la grand' partie d'san travas, et à s'graie atout la main-d'oeuvre actuelle, souvent médiocre ou piéthe et tchi finnit tchiquefais par faithe pus d'sou qu' li dans l'couothant d'la saison.

Les villais, et même tchiques grôsses têtes dé l'Île, vouos dithont: "Mais i' font des sou, les fèrmièrs!" Véthe, i' y'en a, sans doute. Mais la grand' partie d'ches'là ont héthité lus fèrmes dé ches vièrs-là tch'ont travailli comme des nègres pour laîssi du bein à lus êfants - lé mangnifique trait d'caractéthe du temps jadis. Et souvent l'héthitage avait grandi par eune atchumulâtion d'sou et d'rente à r'chéver. Et souvent nou vait ches belles fèrmes-là vendues à d's êtrangièrs - ou la maîson touannée en hôtel ou "guest house" et les tèrres louées à dgi l'adèrt. Si l's anciens pouvaient vaie tout chenna il' en touann'naient dans lus côffres !

Un aut' trait d's anciens tch'a dispathu 'tait la couôteunme dé couoyer. J'm'èrsouveins qué quand Manman ouvrait eune pathe dé cauches ou finnissait par ranner les talons et l's ortés, ch'est à dithe l's êpaîssi, dévant les mettre, et nou couoyait tellement tch'il' 'taient racc'modées continnuellement jusqu'au point tch'i' n'y'avait presque rein d'restant d'la cauche originale. J'n'ai veu qu'eune femme ranner et racc'moder des cauches ches dreines années, et ch'est eune danme tchi d'meuthe à L'Êta. Et quand j'vai l'nombre d'robes dé difféthentes couleurs qué les femmes mettent ches jours quand i' n'sont pon en braies, et les bieaux habits d's hommes, j'pense ès jours qué nou s'griyait atout un fa d'habits du Dînmanche tchi duthait d's années. Lé nièr fa à Papa 'tait dév'nu vèrdâtre à forche d'années d'ûsage. L's habits d'travas 'taient rabilyis si souvent qué nou viyait pus d'clius qu' d'habit d'originne. Et bottes et souliers 'taient couôsus et r'becqu'tés bein des fais. Ch'tait eune grand' fête d'en aver eune neuve pathe pour aller à l'êcole du Dînmanche et à l'églyise, sachant tch'i' fallait qu' ou duthîsse deux-s'trais ans.

Nou savait couoyer. Et ch'est tellement dans l'sang des vièrs comme mé qué j'racc'mode acouo mes cauches, et qué ouaithe qué jé n'sais pon, Dgieu mèrci, dans l'bésoin, j'pense pûtôt à couoyer qu'à dêpenser un sou mal à propos.

Mais jé n'veurs pon couoyer l'bonheur qué j'souhaite à tout l'monde!

G. F. Le Feuvre

 

Viyiz étout:

 

Les Pages Jèrriaises