Le Ménage ès Feuvres,
St. Ouën.
Lé 16 dé juin, 1979.
Moussieu l'Rédacteu,
Au sé, en reunminnant à man tout seu au pid du feu dans l'grand âtre à ch't heu qué j'sis dans man vièr Ménage, j'pense souvent ès vièrs temps quand man grand-oncl'ye Charles L'Feuvre (1834-1911), tchi d'meuthait ichîn à san tout seu étout et dé tchi j'héthitis L'Ménage en 1911, soulait souvent v'nîn pâsser la séthée siez Papa (san frèthe) à La Forge où'est qu' jé d'meuthais.
Y'avait un tas dé r'vénants par les c'mîns la niet dans chu temps-là. Quand nou sortait au sé et tch'i' n'faîthait pon cliai d'leune, y'avait des temps qu' nou n'viyait pon la main d'vant sè. M'n oncl'ye Charles avait eune ronde lantèrne tch'avait des f'nêtres dé corne à la pliaiche dé vèrre. Ch'tait eune chandelle dans la lantèrne tchi donnait la lueu, et ou n'montrait pon fort dé veue mais ou lî-aidgait à trouver san c'mîn du Ménage à La Forge. I' m'sembl'ye qué j'lé vai acouo entrer dans la tchuîthinne atout ses braies d'bâthîn à pliatchet, sa c'mînse dé molleton et san vièr chapé d'feûtre amathé en d'ssous d'san moton atout un but d'ficelle.
Quand Papa voulait aller d'tchique bord au sé, et qu' la niet 'tait sombre, il empruntait chutte lantèrne-là et j'allais auve li. I' portait la lantèrne d'eune main et j'lé t'nais pas l'aut' main. Auve la faillie lueu d'la lantèrne, l's ombres avaient trèjous un air fantastique pour mé tch'étais mousse et tch'avais ouï tant d'histouaithes entouorre des r'vénants et des balles-à-leunettes.
Les vièrs bouais sus les fôssés l'long d'la route, tch'avaient 'té êpilès touos l's ans, avaient l'air grotesque étout, et m'pathaîssaient r'semblier à des faûtômes, sustout quand il' 'taient difformes. Quand y'avait des creux dans les têtes des cheins tch'étaient à maîntchi pouôrris, v'la tchi donnait l'împression d'un giant atout des grands ièrs! Dé temps en temps nou ouiyait qu' des blianches femmes hantaient ichîn et là.
Lé pâssage par cèrtaines routes 'tait craintif viyant tch'il' avaient la r'nommée d'êt' hantées. La Route dé Vinchelez en' 'tait ieune. Ou pâssait entre les mannièrs dé Vinchelez d'Haut et dé Vinchelez d'Bas et les branques des bouais faithaient eune “voûte” en d'ssus d'la route et nou n'y viyait lèrme. Certaines routes, étout, avaient des noms tragiques, comme La Rue à la Pendue. Nou ouiyait l's anciens mentionner l'nom en convèrsâtion et étant d'âge înmaginatif, i' sembliait ès mousses tch'i' pouvaient vaie des pendus la niet quand i' pâssaient souos les bouais auprès du carrefour ioù qu' Tanminne Le Cornu d'meuthait.
Y'avait eune pétite ruette - oulle est acouo là - tch'allait d'la maison et tchèrpent'tie à Maît' Fred de Caën à La Vieille Fontaine, maîson d'anchêtres dé la fanmil'ye du défunt Juge Francis Vibert Le Feuvre. Chutte pétite ruette-là 'tait hantée par un cadâvre couochi sus l'fôssé la niet. La m'mèe du défunt Juge, née Esther Le Bliancq (décédée en 1914 à l'âge dé pus d'huiptante ans), soulait nouos raconter qué sa grand'méthe et eune aut' bouannefemme êrvénaient par la ruette, auprès mîniet d'eune niet bein sombre, pour lus en aller à La Vielle Fontaine, où'est qu' la grand'-méthe Le Feuvre démeuthait. En pâssant l'long du fôssé où'est qu' lé cadavre soulait s'couochi, l'aut' bouannefemme dît à la grand'méthe Le Feuvre: “Bon! J'avais tréjous ouï tch'i' y'avait un cadâvre couochi sus l'fôssé, mais chutte niet i' y'en a deux!” I' s'adonnait qu' un farceux du vaîthînné, voulant êffriter l'monde, s'était couochi sus l'fôssé et s'était couvèrt auve un lîncheu, mais quand i' ouit la bouannefemme dithe qué nou viyait deux cadâvres lá, i' fut sa êpeûthé la-mème tch'il en eut les sangs touânnés et en mouothit!
Pour nous, mousses, i' n'y avait autcheune doute dé l'existance du nièr tchian tchi hantait L'Carrefour des Chînq Vèrges, et bein des gens vouos asseûthaient tch'il' avaient ouï sa chaîne traîner. Eune séthée, man fréthe Fraînque eut eune fichue peux en pâssant par là. Ch'tait ieune dé ches sombres séthée-là qu' nou n'viyait pon la main d'vant sé. Il avait à peine travèrsé l'carrefour quand i' ouit tchiquechose sauter driéthe li et du tapotage dé fé dans la route. I' happit la pathe ava la route dans la direction d'siez nous. Il allait à feu d'galop, mais tant pus vite tch'i' couothait, tant pus d'brit i' ouiyait driéthe li. Arrivé quâsi à la tchèrpent'tie au Sieur de Caën il 'tait à but d'vent et n'en pouvait pus. I' pensit qué ch'tait la fîn pour li et s'arrêtit l'long du fôssé et s'touânnit d'bord, quâsi au m'sespé d'sa vie. Heûtheusement, sa vie n'tait pon en dangi. Lè nièr tchian avait touânné en vaque! Ch'tait eune géniche tchi s'était abanonneé et tchi l'avait sieu. San lian et l'paîsson, tapotant dans la route, 'tait vrainment la chaîne traînante!
La vie a amendé, ou m'dithez. P't-êt' bein, mais à ch't heu qu' les gens n'craient ni á Dgieu ni à dgiâbl'ye, ni au mystéthe ni ès faûtômes, les jannes sont prîns d'ennion et n'pensent qu' à faithe mêché. Et, en fîn d'compte, les faûtômes né faîthaient d'ma à pèrsonne!
George d'La Forge
Viyiz étout: