San Antonio, Texas,
U.S.A.
Lé 6 d'janvyi, 1968.
Moussieu l'Rédacteu,
À ch't heu qu'Noué et La Nouvelle Année sont d'l'histouaithe du temps-passé, nou-s-a l'temps d'èrfliéchi un mio et d'èrprendre la vie pus trantchil'ment. Les jannes ont ieu l'pliaîsi d'vaie Papa Noué ichîn en Améthique, et si les couôteunmes dé mes p'tits jours sont acouo les mèmes pour les mousses en Jèrri, il' éthont ieu l'pliaîsi d'trouver des présents dans lus cauches pendues à côté d'l'âtre pour qué l'Papa Noué pûsse les vaie en d'valant par la cheunm'née! En Améthique, les présents sont généralement trop grands et trop nombreux pour mett' dans des cauches, et l'âtre n'est pon souvent veue dans les maisons tchi sont cauffées par un p'tit cârré fourné à l'huile ou à gaz dans la cave; ch'est-en-tchi les mousses n'ont pon la mème crianche en ch'tchi concèrne la cauche. I' craient qué l'Papa Noué veint pûtôt par la f'nêtre ou la grand' porte qué par la cheunm'née!
L'passage du temps vouos fait r'fliéchi en pensant ès changements dans la vie et dans les couôteunmes. Et nou pense à l'av'nîn étout. Et nou peut sé d'mander tch'est l'pus important - lé jour d'hièr, lé jour-d'aniet ou d'main? Eh bein, d'main n'veindra p't êt' pon pour un tas; ch'est-en-tchi nou n'peut pon trop bein apprécier sa valeu. Lé jour d'aniet est auve nous pour lé moment, mais i' s'en va à si grands pas tch'il a dispathu d'vant qu'nou-s-a peut l'êvaluer! V'la don tchi nouos laîsse les êvènements d'hièr à reunminner, et à m'suthe qué nou s'vieillis ch'est hièr tchi nouos laîsse la pus grande împression dans l'esprit, car i' n'est pon bein liain dans l'passé, mais l's êvènements d'hièr atchumulés avau l's années ont créé la mémouaithe du temps jadis! Est-che tch'i' n'vouos sembl'ye pon qué ché n'tait qu'hièr qu'ou' 'tiez acouo à l'êcole, et qué ché n'tait qu'hièr qu'ou-s-aviez l'ambition d'tchitter l'êcole pour aller en travas et c'menchi à gangni vouot' vie comme un homme?
S'en est-i' passe, dans ches hièrs! Un garçon halait sa castchette quand i' rencontrait l'Connétabl'ye dans la rue, ou quand fallait taper à la porte du vaîsîn pour donner un message dé la part dé san p'pèe ou d'sa m'mèe. Et pus tard, quand il 'tait janne homme i' n'éthait pon pensé à la garder sus sa tête en pâlant à eune danme dans la rue!
Ch'tait hièr qué l's aut' nations n'éthaient pon ôsé affronter l'Angliétèrre dé peux d'aver à combattre ses forches armées, et qu'la veue d'un passeport atout ses armueûthies sus lé d'vant c'mandait l'respect d'l'êtrangi dans l'pays visité!
Ch'tait hièr qué les mousses pouvaient acouo s'abûser atout eune êlîngue ou eune canonnièthe tch'il' avaient fabritchi ieux-mèmes, ou à jouer au tireli ou ès marbres, et tch'i' portaient eune topie, des buts d'ficelle, eune brioche, des marbres, eune pomme et Bouan Dgieu sait tchi dans lus pouchettes dé braies, et tch'il' allaient à l'Êcole du Dînmanche à la pliaiche d'êt' à couorre les c'mîns et p't êt' faithe mêché! Et qu'un homme travaillait chînquante ou souoxante heuthes par sémaine et attendait fête à vaie l'Dînmanche arriver pour pouver s'alouangni sus l'sofa auprès dîner et faithe un p'tit somme dévant s'promener douochement et trantchil'ment jusqu'au haut du Mont du Vallet et s'assiéthe sus l'hèrbe à bailli d'sa becque auve ses vaîsîns!
Ch'tait hièr qué l's hommes laîssaient lus barbes craître et tch'i' pathaissaient vièrs à l'âge dé chînquante ans! Et qu'les femmes mettaient des longues robes et des cotillons d'ssous atout d'la dentelle au bas, et qu'un homme n'avait qué d's'êvanni quand ou' l'vait sa robe un pouce ou deux et tch'i' viyait un mio d'chutte dentelle-là! Et qu'les femmes gardaient lus j'veux longs - mais bein arrangis en chîngnon sus l'haut ou en driéthe dé la tête, à la pliaiche dé l's aver copés courts ou laissis à trainer sus l's êpaules et muchi la maîntchi d'lus faches!
Ch'tait hièr qué l's hommes feunmaient la pipe à la pliaiche d'eune cigarette, et tch'i' faîsaient sèrvi un chipaudé fait atout eune vessie d'couochon!
Ch'tait hièr qu'un tas d'nouos anmîns tchi sont au r'pos êtèrnel 'taient acouo par les c'mîns. J'veins d'ouï la triste nouvelle qué iun qué j'connaîssais si bein veint d's'en aller dreinement - lé Sieur John Le Masuthi d'Grande Grève à La Côte - un charmant moussieu, décédé lé 27 dé novembre, 1967. I' d'vait aver 81 ou 82 et 'tait l'drein d'sa généthâtion, ses fréthes Percy et Bert et sa soeu Lilian du Haut du Mathais, à St. Ouën, ayant passé l'pas l'avant-dreine année. San n'veu, lé respecté Sieur Percy L'Masuthi, d'La Pointe, est l'grand d'la fanmile en Jèrri à ch't heu.
Ch'tait hièr qué les Juges 'taient Jèrriais et êlus par touos l's êlecteurs dé l'Île et qu'les minnistres dé nouos êglyises parouaîssiales 'taient Jèrriais étout, et qu'les Jèrriais ieux-mèmes pâlaient l'Jèrriais et en 'taient ordgilleurs!
S'en est-i' passé, des choses èrmèrquabl'yes dans l'couothant d'touos ches hièrs-là! Vouos en r'souv'nous? Est-che ravissant tch'il' en remportent?
George d'La Forge.
Viyiz étout: