Le Ménage ès Feuvres, St. Ouën.
Lé 12 d'août, 1967.
Moussieu l'Rédacteu,
I' n'y avait pon grand' chose à faithe pour sé passer l'temps au sé quand j'tais mousse y'a eune septantaine d'années. I' y'avait, sans doute, l's assembliées d'priéthes ichîn et là dans les pâraisses, dé tchi j'vouos ai pâlé d'vant, d's assembliées tch'avaient lieu siez les Méthodistes Wesleyens, mais hantées par des femmes d'églyise étout viyant tch'i' n'y avait pon d'aut' chose à faithe au sé à mains d'rester auprès du feu à couôtre ou à ouvrer. Les veil'yes sé faisaient acouo étout dans chu temps-là en hiver, mais pon si souvent comme dévant, à chein qu'Manman m'disait tchiquesfais dans san vivant, et la longue veil'ye du vîngt-trais d'dezembre 'tait toute eune affaithe. Pour nous, mousses, Noué 'tait si près qué chutte veil'ye-là avait acouo pus d'întéthêt car nou ouïyait tchiquesfais les grand' pèrsonnes pâler des présents qu'Papa Noué s'en allait donner à lus mousses!
Comme nou peut bein l'înmaginner, les jannes garçons d'chu temps-là n'savaient pon tchi faithe dé lus pé au sé. I' n'y avait pon d'distractions comme à ch't heu. L'moto n'tait pon 'couo v'nu, ni l'cinnéma, ni l'radio, sans paler d'la télévision. En pâlant du cinnéma, v'la tchi m'ramémouaithe qué ch'tait en 1900, quand j'avais neuv'ans, qu'eune compangnie nommée “Poole” vînt en Jèrri donner eune séthée d'spectacl'ye, appelée “Poole's Myriorama”, d'gens tchi faisaient d'la gynmnastique, des jongleurs, des magiciens, etc. Y'avait des portraits auve la lantèrne magique étout, et pour la preunmié fais, des portraits d'gens et d'annimaux qué nou viyait bouogi et marchi fûdrent montrés auve la lantèrne! Né v'la lé tout c'menchement en Jèrri dé chein qu'j'appelons l'cinnéma. I m'sembl'ye qué l' “Myriorama” vînt en Jèrri eune fais par an pour tchiques années, et qu'j'allis l'vaie dans l' “Oddfellows' Hall” en ville pour la preunmié fais quand j'avais dans les douze ans. Mais les mousses tchi d'meuthaient à St. Ouën en 1900 n'avaient pon grand' chance d'aller vaie d'tchi d'mème au sé.
Chu portrait-là duthait à bein près un quart d'heuthe dans l'programme du “Myriorama”. Ch'tait huit ans pus tard - en 1908 - qué l'preunmié cinnéma fut ouvèrt dans l' “Cercle St. Thomas” dans La Neuve Rue en ville.
Les pathents du temps jadis n'laîssaient pon lus mousses couôrre les c'mîns passé mînniet comme à ch't heu. En général, i' fallait êt' èrvenus à dgiex heuthes à la maîson, mais i' y'avait mouoyen d'faithe un tas d'mêché d'vant ch't heuthe-là dans les longues séthées d'hiver, et les garçons allaient l'tou d'lus vaîsinné et jouaient des farces ès gens.
Les vielles maîsons avaient d'grandes âtres dans la tchuîsinne. Dans nouot' Ménage, ma grand'manman (1806-1895) mé mâtait dans l'âtre pour vaie l'jour par lé haut d'la cheunm'née! Eh bein, ieune des farces qué les garçons aimaient à jouer 'tait d'buter eune êtchelle (y'en avait ieune d'habitude pendue sus des cros l'long du pingnon ou des bâtisses) contre lé pingnon, et pis bouchi l'haut d'la cheunm'née atout un fagot d'êtrain ou d'bouais. V'la tch'enfeunmâtchait les gens dans la tchuîsinne, car ch'tait un feu d'bouais ou d'vrai sé, et mème dé couêpieaux, tch'était dans l'âtre, et la feunmée sé r'foulait dans la tchuîsinne dépis qu'ou' n'pouvait pon sorti par la cheunm'née!
Man frèthe Frainque et deux-s'-trais aut' mousses dé s'n âge jouîdrent chutte farce-là à m'n oncl'ye Charles au Mènage eune séthée, et l'pouôrre bouanhomme eut d'l'embarras. I' fut enfeunmâtchi comme i' hoûtait en feunmant sa pipe auprès du feu et s'doutit bein d'tch'est tch'i' s'était arrivé. I' sé l'vit d'un embron et dêhalit d'la maîson en toussant comme un vièr chéva tch'est câssé, et s'en allit drait où'est qu'l'êtchelle éthait deu être - auve l'idée d'la mett' en pliaiche et dêbouchi la cheunm'née. Mais les mousses avaient porté l'êtchelle dans un clios, et i' passit la maîntchi d'la niet à chèrchi pour dévant la trouver!
Le lendemain, quand Frainque allit l'vaie, m'n oncl'ye Charles li contit l'affaithe et li dit d'garder l's ouïes ouvèrtes à l'êcole et d'tâchi d'dêcouvri tch'est tch'avait joué la farce. “Les mauvais sujets s'en vant'tont probabliément!”, i' li dit, “Et pis tu pouorras v'nîn mé l'dithe!” J'nai pon bésoin d'vouos dithe qué l'bouanhomme né put janmais dêcouvri l'responsabl'ye!
Les pus grands garçons tchi pouvaient rester d'houors tard dans la niet jouaient des farces ès fèrmièrs. Il' allaient dêmonter les reues des hèrnais et les porter dans les clios ou les muchi ichîn et là. I' dêmontaient des hèches et des haîmies étout pour les muchi, et si la boulanguethie n'tait pon bârrée l'fèrmyi 'tait apte à trouver toutes sortes d'choses dédans l'lendemain!
Eune aut' bouanne farce 'tait d'amather eune forte ficelle à la pouangnie d'la grand' porte (quand y'en avait - les pus vielles portes avaient des clianques), et amather l'aut' but à un bouais ou tchiquechose d'autre dans l'bel, et pis taper à la porte pour aver l'pliaîsi d'vaie les gens êprouver à l'ouvri!
Ch'tait des farces tchi n'faîsaient pon grand ma à pèrsonne. Quand nou liet la gâzette d'au jour d'aniet et qu'nou vait l'nombre d'malfaiteurs présentés d'vant Justice touos les jours, v'la tchi vouos fait envie d'pouver r'joui d'la trantchilité d'ches vièrs temps-là!
George d'La Forge
Viyiz étout: