Trenton,
Michigan, USA.
Lé 24 de novembre, 1979.
Moussieu l'Rédacteu,
Nou n'sait janmais tch'est tchi vouos pend sus la tête. Le temps s'pâsse si vite qué v'la tchi m'fait penser au nénantième psaume tchi nouos dit. “Mille ans sont devant Tes yeux comme le jour d'hier qui est passé, et comme une veille en la nuit”. Hélas! Mille ans mé pathaîssent quâsi eune êternité quand j'vai les changements tch'ont ieu lieu duthant lé p'tit compathabl'ye temps d'mes huiptante-huit ans sus chutte tèrre.
Quand j'tais mousse és Landes à St. Ouën, y'avait un tas d'êfants tchi mouothaient d'eune mannièthe dé diarrhée tchi s'appelait “Summer Complaint” en Angliais. Trais d'mes soeurs en mouothîdrent dévant qué j'fûsse né. J'fus l'quatrième êfant d'mes pathents et l'preunmyi à survivre. Et quandi que j'sis au sujet d'êfants, dans chu temps-là ch'tait honteux d'être un êfant d'galiotage, ou un êfant ne en paillardise. A ch't heu ch'est quâsi dév'nu la mode par ichîn. Jé n'sai pon trop bein si ch'est d'même en Jèrri.
En Jèrri, quand nou pâle d'avouortément ch'est pûtôt en rapport des bestchias - ch'est quand eune vaque ou eune géniche ont avouorté qué nou ouait l'expression. Mais dans cértains pays ch'est dév'nu affaithe dé conséquenche parmi l's humains. L'aut' jour j'liêsais dans un magâzîn des Têmoins dé Jehovah qué l'conmité du Gouvèrnément á Washington sus la crise dé populâtion a dêcliathé qué ieune dé toutes les quatre “grossesses” dans l'monde d'à ch't heu finnit en avouortément. Eune autorité au sujet nouos dit qu' un apèrchu montre qué l's avouortéments mondiaux sont au main quarante millions, et qu' eune bouanne maîntchi d'chu nombre est faite illégalement et qu' ches opéthâtions illégales sont dév'nues eune cause alarmante dé décès d'femmes en fanmil'ye.
La cause d'un tas d'décès y'a huiptante ans 'tait la conseunmtion. J'avais l'asthma quand j'tais mousse. Heutheusement, v'la tchi dispathut quand j'avais quatorze ans. Quand j'en avais eune bordée et qué j'viyais tant d'monde mouothi d'la conseunmtion, j'mé d'mandais si m'n asthma allait m'la donner en fîn d'compte et m'emporter dans mes vîngt ans. A ch't heu, ieune des bouannes choses qué l'pâssage du temps nouos à apporté est l'manque dé chutte maladie-là. Par contre, lé mauvais ma pathaît l'aver rempliaiche, ouaithe qué v'la tchi nouos pathaît p't-êt' en être lé cas viyant qué dans l'temps pâssé chutte vilaine maladie 'tait muchie (manque dé saver mus) dans l'expression “enfliammâtion” comme enfliammâtion d'ponmons, enflimmâtion des bouoyaux et cétera.
J'm'èrsouveins qué dans man janme temps les gens mouothaient généralement dans les souoxante-chînq ans et qu' nou criyait qué septante ans 'tait vyi. Quand nou-s-en viyait iun d'huiptante ans, nou criyait qué ch'tait quâsi un mithacl'ye dé vivre si longtemps. A ch't heu nou-s-en vait un tas tch'ont même dêpassé ch't age-là et tchi sont acouo en êtat d'activité.
Malheutheusement, Jèrri n'est pus l'Jèrri dé y'a huiptante ans. Hardi d'la campangne à pèrdu sén air paîsibl'ye et a changi sa vie trantchil'ye pour la domaine des motos et char-à-bancs tchi vômissent d's odeurs empouaisonneuses dé pétrole et tchi rempliaichent l'air sain et dou d'la natuthe.
Lé catchet et l'Angliaîchinn'nie des touristes rempliaichent la vielle langue Jèrriaise du campangnard. Lé fèrmyi tchi mène ses vaques au clios et tch'a l'preunmie drouait à la route, est souvent embêté par les motos et les pouôrres vaques mêmes sont tchiquefais en dangi d'ches motoristes tchi craient qu' les routes lus appartcheinnent.
Tout est boul'vérsé d'nouos jours. Les travailleurs gaspillent lus temps et font souvent pus d'sou qu' les cheins tchi lus donnent du travas. La souô-disant réforme gaspille nouot' liberté et nouos vielles couôteunmes. J'avons ieu deux dgèrres pour garanti la liberté à touos les peupl'yes, et y'a mains d'liberté dans l'monde d'aniet tchi n'y'avait d'vant la dgèrre dé mil neu' chent quatorze.
Les gens d'à ch't heu n'craient ni à Dgieu ni à Dgiâbl'ye. La où'est qu' nou viyait chent pèrsonnes à l'églyise ou a la chapelle, si nou-s-en vait eune vingtaine au jour d'aniet, ch'est à bein près tout. I'n'y'a qué quand i' sont sus l'pus tch'i' pensent à dêhaler “La Nourriture de l'Ame”. Nou vait bein tchi veulent même l'êtérnité pour rein!
Et quandi qu' les peupl'yes dé la maîntchi du monde sont à s'entre'chicangni, les Russes sont à gober l'aut' maîntchi! Ch'est assez pour vouos d's'encouothagi et vouos faithe rêver la rouoge trie.
George d'La Forge
Viyiz étout: