Les Pages Jèrriaises

Acte de charité expiatoire
envers la
classe des minserables.

Messieurs viers garçons, âsa néyiz pas d'peux,
Mais qué j'vos déniche si vos plais de vos creux,
Et rêvilious un mio, car ch'nais pas pour rire,
Car chest d'qui d'importance que j'men vais vos dire,
Mais prennais d'liau et un gouttin d'vin bliant,
Dévant qué je qu'menche, pour rasseuré vos sens,
Car mondoux quand les hommes d'meurent comme vous touos seurs,
Y vainnent hardi effritais et hardi nerveurs,
Mais enfin pour vos r'mettre un p'tit mio sus vos pis,
Je vos dirai deux trais p'tites parolles sus que j'sis;
Jé sis vieille et bain laie, et don pusaquo bête,
Et j'nessa pas mé qui vos tounnerai la tête,
Nou vos prendra chutte fais pour des pouors émanues,
Ah s'y ou zy pensais j'en s'ais si émue
Que jammais j'né r'vaudrais la valeur d'un sou,
Et jammais j'né pouorais errouvré un tou.
Jen cré pas q'jem marie j'nen sis pon en hâte,
Et les hommes, ma tante dit, sont de terrible embâtes,
Oh lyi! vaire! ou devrai bain savé chain qu'chés,
Car oul est méthodiste et oul en a yeu trais,
Chés pus d'paine que d'honneu que davé un homme!
Les femmes mariées disent qué j'sommes mus comme jé sommes,
Et comme je sis gréjie et un p'tit têtoigne,
J'menbâtré pon d'homme car j'naime pon que nom oigne,
Ou qu'nou vainne me regarder à r'quignon et d'travers,
Si un homme met faisait, oh! j'ly'grimrais ti l'ziers!!!
Et j'liêcaudrais l'zuorelles et oprès chonna j'cré
Quou verrais qu'yn faut pas s'apréchi près d'mé.
Mais ove touos mes defauts jai l'coeiu bain, bain tendre,
Et chnez pas auquo pasque oun voulais pas m'prendre,
Qué j'vos voudrais du ma, nannin, nannin ma fé,
Chest tout l'bain au monde qué'je souhaite vote vieille pé,
Et j'em fais, chiers Messieurs, un profond honneu,
D'vos paslé un mio pour votre propre bonheur.
Presque auqunne autre femme érait peux de sie mettre
Mais ov l'âge, j'sis v'nue affrontaie comme bélette,
Là, assiévous oprès d'mé, mes pouors viers j'vos en prie,
Et tâchis bravement d'écouter mes avis.
Sus les femmes esche pon vrai, vaire, vaire quou s'avez
Toute vote pouore bénite vie fait moqueris et riselais,
Mais j'vos dit tout nait, i faut fini chutte gamme,
Et pas d'autre gniolin, chaquiun prennais une femme.
Yiou en trouver? oum dirais, quérons le couorage
Dé s'tuolyi de pouors viers prôneurs de votre âge.
Et mon doue oprès tout, ou n'êtes pas si pervers,
Chest seullement, viyous, quou zêtes prins sus les ners,
Et quique noble p'tite femme à la carre de vot feu,
Viyous vos r'douochirait bain vit l'humeu,
Et y'len a parmi vous qui nia femme qu'in dit.
Qui sont bons, mais damme bons, comme du chucres candi,
Et mes chiers! pour chés dammes, ah! y lien en a assais,
Allais dire votre affaire, ou n'sais pas r'fusais.
J'connais un noble p'tite veuve, vaire qu'affolle,
Pour chu chier vier garçon, le juge..................
Mais j'crains qui n'ait levé, pour sen propre malheu
La Clameu de Haro en cour, sus sen coeu.
La chenne quil happera, ah! y gagnera sa cremme,
Car tuos dise de lyi qu'chez la bontai même;
Ah MONS. W......! ah pensais d'ercheffe,
Pour queque ou louogiz vos amitiés au Greffe
Quand toutes chez belles dammes, aussitôt qui vos nomme
Chez pour chanter vos louanges, comme le millieu des hommes.
Hélas! chez pouore chieries ah je crai bain qui lune
Car jammais ou nérais l'couorage d'en prendre iune,
Amains qu'chute p'tite veuve, pour vos sauvai la paine
Et tout l'tiné d'affaire, vaine vos d'mandé lyi-maîme.
Et si ou zen finissis quique biau matin
Oum donnerais des gants et de la gâche et du vin.
Y y'la aitout une p'tite qui na pour chanson
Que le Lieutenant B......, chu noble Mons.........
Ah damme oul est belle, mais belle comme une flieur,
Et douoche comme du mi, oh ou n'frait pas d'zonneur
Au Prince Albert même, dévinous san nom?
Assa, Mons........, assa pensais y don,
Ou n'a pas pus d'quinze ans, et douoche, mais damme douoche,
Et les pus biaux blius yeux, la pus belle petite bouoche
Que jammais y lia ieu! assa, prennez m'navis,
Et pour l'yi, la p'tite chiére oun sera pas trébuquie.
Et pis dont aitout, y lia une jeunne fille,
Qui pense sus ses mitaines au juge............
Oul est jentiment belle, mais ou n'a pas d'sous,
Mais i l'en a des tas, et des tas don partout,
Et oul est si aimable, Mons. l'Juge et mon doux,
Laissrous une jeunne fille estre enterraie pour vous,
Jammais nou na dit quou zétiez bain mauvais,
Assa prennais pitié don et allais la vais.
Et l'juge de St. C......, ah n'en v'la un auotre
Dé chés pouors viers garçons, dé chés pouors viers apôtres,
Il en trouvera bain iune si fait bain sa d'mande,
Une p'tite pie dênichie, rêvillie d'Irlande,
Ou danse le Polka, joue la guitarre et chante,
Et d'vise, mais d'une manière qués toute édifiante,
Et ou zêtes assais bé pour que je sai quite pour quite
Assa Mons. Philip, assa, qu'est qu'ou z'en dites?
Et qué j'noublie pas, car j'en érais r'gré,
Une damme qui trait bain pour le vier J. D.....
Oul est laie, oh! damme laie! oul est, vaire, piére qué mé,
Et san tempéranment est une humeur de fé,
Ah chest qui s'rêvillra chutte fais, damme vaire dia,
Car chest une indomptable qui vos l'trimoussra,
Mais in conte presque pas, quoique vier garçon assais,
Car i n' est oprès tout, qué d'la soupe récauffaie.
Est y étonnant que la Cour sait d'travers
Ove un tas d'viers garçons tuos enhannais d'lus nairs?
Marious! marious! messieurs, car dites mé qui leçons
Les gens peuvent-ti apprendre d'un tas d'viers garçons;
Pour mé jé grand pityi d'chez pouors viers apôtres
Rôdans par les rues, les uns souautre les aoutres,
J'en dis pas qu'il y ai dans lus rôdes du ma,
Mais qui demoieselle erdréchrait ses babinnes pour chla,
Là, quique fais accluquie ensemble à la fret
Ove des minnes édifiantes comme des vielles poules à coué
Vaire dia à m'nidèe chez d'qué fièrement bête
Qu'un homme qui n'a jammais yeu l'amour en tête
Pour quique belle petite vaisine, là! bouanne et avenante
Ou quique belle petite couosinne évilyie et riante;
Car quand chez une parente, nou peu pus à co
Prendre couorage et rgardé une couosine un mio,
Ah! tout vier cuo zête, on zen érais l'couorage!
Quand chest une couosinne nou nest pas si sauvage
Assa prennais vot chapé et bravement allais,
Je sai bain les couosinnes sont bain affrontais
Et vla quéfritte un homme, mais n'aiyiz pas d'peux
Qmenchiz par ly paslé douochement ov les yeux,
Et si ou viyiz quou vos r'garde un p'tit mio,
Et bain faites les doux yeux et r'gardais oquo,
Demandez ly en sortant quique ser de la chapelle
Quêqu'ou cré du sermon et d'la lune et d'zêtelles,
Et quand ou levra ses biau yeux pour les vais
Oh damme! chêque ou s'rais bain êmu chutte fais
Mais quêque il en ais quêque ou dites ou chain quou dit
Si ou vos r'dêmêlais vier garçon bain fianchi.
Ch'nez pas qu'chez pouors médians né voudrais s'marié,
Mais chez chutte triste langue quin ne peut pon sé dêlié,
Y sauterais à deux pis sy pouvais s'y prendre.
Mais chest d'qué si terrible qué d'dire de qui tendre
A quique belle petite créature qu'hélas mon doux!
Est ouquo pus effritais et nerveuse que vous.
Et dans les temps nerveurs acheteu ouesquejé sommes,
Ch'est assais pour faire touanner les sens à un homme,
Mais r'gardais dans les rues, ergardais don les teurs,
Qué chés belles dammes font pour votre propre bonheur,
Si ou touonais vot dos ès belles minnes qui vos font,
Oh vraîment ou n'manquis pas chutte fais d'affront!
Dans l'temps qué j'tés p'tite les messieus faisais
La carre et l'zavanches ès dammes les premiers,
Mais acheteu les hommes sont d'si pouours tristes bachouards,
Si nou z'attend pour yieux a qu'menchi, le hasard
Es qui né qu'menchons pon, ainchin donc à la paix!
Y faut qu'les d'moiselles faichent la carre les premiers,
En font-i des sifaiches chés chières dans les rues!
Naitissant toute la bos, ov lus robes toutes en clius,
Et lus bonnettes en lair, en j'nen mentirai pon,
Dé telles effachis nons pon l'air de qué bon,
A m'nidaie d'faichon jessai mus m'est avis,
Dé couvrir lus faches et découvri lus pis
Un p'tit pus qu'in font. Oh n'esche pon d'qué rare
Dé vais comme touolyis de chu pité y s'ercarre
Oh n'esche pas d'qué triste, mais bain triste de vais
Chés biaux cotillons d'la pus superbe soie.
Trainais dans les canniaux. - Hélas! chés viers temps!!
Mais la noblièche d'acheteu n'est pas ditelles gens,
Et les poules et les piros éraient honte de lus pis
Si enhalaoudais d'bos et ditelle saloprie,
Et not vier t'chan d'Terreneuve vaire dia à pus d'goût,
Pustôt qué d'sécliaqui i r'dréche bain sa cous,
Et c'hnest pas oquo tout mes belles dames, mes chez
Quou vos abilyis contre vot propre intérêt,
Nou peu bain sé r'tinffer mais ou savais ai tout,
Qué chés quil en couote et des sous, et des sous,
Et les hommes oprès tout n'sont pas si ébahus,
Qué d'payi tant d'sous pour faire nettir les rues,
I lus faut quique autre chose qu'une belle pétite fille,
Qui n'sait pon faire rain sinon naittir la ville,
Jé sis à vos r'quémander mes chiers nobles dames,
Mais les messieurs que j'connais n'aiment pas chutte neuve gamme.
Ah! les hommes, et mon doux i sont tréjous rustiques!
Et touannent pusaco l'nez à des dammes si publiques,
Qui n'paraissent n'avé aucune autre sorte de tâche,
Qué d'rôder les rues à montrer lus belles faches,
Chés d'qui triste, vaire dia, qu'une femme qui n'sait rain.
I lus en faut iune qui sait touesné sa main
Nettement et promptement au tou d'sa table,
Et faire du bouillion pour un pouor minsérable,
Qui peut erdairner san corset d'molton,
Et couâtre l' arlevaie à une qu'minse de cotton,
Qué quand i r'vaindra et mouilly et lassai,
Trouvera tout naitti et bain racmodai,
Et s'era toute riante et contente dé l'ervais,
Et ira bravement vite liarangi san tée,
Ove des nobles merveilles qué lyi même a faites,
Ove ses belles pétites mains et si blianches et si naittes.
Ah si j'tai sus chu ton, dammes! quou faisiez la carre
J'cré qu'les viers garçons d'vaindraient pus râres,
Et âsa, més viers, jé fais tout chèque jé peux
Pour tâchi d'vos m'né dans la vois du bonheur.
Mais hâtous messieurs, car devant bain longtems
On s'rais cousus d'rhumatisse, si happais d'ahens,
Ai chute bouanne fais, dite mé qu'chest qui vos soignna.
Aiche une fille de buoan sens qu'ou criie, vos prendra
Pour passé sa vie. Un tas de tracas à grée
Ai vos enfliubé touos les jours de fliannées.
Chessa d'qui édifiant, dame! que d'vos enpâté,
Qui d'moieselle criious ira s'en embâté.
Un biau pliat pour san Noé ou trouvera qu'oul a fait
Qu'un pâté d'vier garçon à crôte de fliannet.
Belle pâte de r'vas-y! au nom du bouan sens
Révillious Messieurs et r'gangnys vot temps
J'ai l'tchieu aussi bouan qu'auchunne autre vieille personne
Mais dame, près d'mes piêches, ai bain mârisonne.
La! n'm'êlourdais pon don den voulé pon m'craire
Mais trouvais une damme ai dêhallous d'affaire:
Dites mé j'vos en prie, à chaique la tchi sers
De rester viers garçons touos lais ai pervers.
Ne sérious pas bain mues d'être bain aitablis,
Qu'a hauté ensemble, pouor viers piros bénis.
Mais v'la la R'forme qui va kmenchi, ai pour
Chutte bouanne bénitte fais ch'est qu'ou k'menche par la Cour.
Ch'est à mé k'nou la dé, ai nou dira ès veilles
Madmoiselle Catton vaut trais Ordres du Conseil.
Si chute Reforme est faite la tchéton'ra tout l'monde,
Touos les Chorchiers de Roquebert en danseront des rondes.
Vive la Cour! vive les juges! i s'accordent à touos sons
Et passe acte de faire marier lus pouor viers garçons.
Que la Rose ai Laouri achteu ensemble s'apprechent,
Tri trinquant leus verres. Vive les filles! vive les neuches!!
Que tout l'monde s'êville ai s'en aille à la halle
Cherchi lus tiquets, nos braves Etats donne balle.
Jem d'zengoudirai pour dansé parmi yeux,
Vaire, j'dans'rai la Polka ov le vier procureux,
Ai j'vos l'ferai-t-i sauté ai delié ses viers pis,
J'vos l'danserai comme jamais 'n'a dansé d'sa vie.
Profitais d'mes avis mes chiers viers, profitais,
Ai hâtous un mio ai vos en deshallais,
Ai j'espère le préchain Quatorze Févrié,
Yn yera pas vingt viers garçons à marié.

Après chenchin messieurs, j'mêle pus de vos affaires,
Jen m'en vais pas guépé les môqes pour vos pliaire.
J'sis d'trop bouanne famille pour être votre servante,
Mais j'vos aime, mes pouors viers comme chique aimable tante.

Je sie achteu si vieille qu'je marche avec un bâton,
Ai en actes charitable tâche de passer ma vie,
J'nobait personne
Ai ove honneu me nomme

 

DEMOISELLE NENNÉ CATON,
Châtelaine de la Catonnerie.

 

Viyiz étout:

 

Les Pages Jèrriaises