Donnez, Riches; l'aumône est soeur de la prière.
V. Hugo
|
Lundi qui vain, la Saint-Michet arrive, Pour bain des gens chest un jour de bonheur, Mais qui grand tas y va mettre en derive; Car chette annais est un an de malheur; Comment chacun va-ti payi ses dettes; Car pour monnaie nou na que du papi Qui ne vaut pas pus qu'autant de chiquettes, Aiyie Piqui! Riches, aiyie piqui! Car des renquiers y faut bain tenir compte Et pie depus chest le jour du quart-d'an, Dénonciateurs et Député-Vicomte, Les Ecrivains, tous jusqu'à Moussieu Jean, Yzont bétôt par campagne et par ville, Comme jadis faisait Thomas Sohi; Dize payie ou je vos envie bille, Aiyie Piqui! Riches, aiyie piqui! Je ne vains pas pliaigui ma propre cause, Car mes anmins savent que je n'ai rain, Mais mes besoins ne sont pas grande chose Et ma gaieté me suffit pour tout bain. Tout chan que j'ai de propriétait foncieze Est un terrain grand de deux-pies-par-huit, A l'Almorah dans le coin du chimquieze, Aiyie Piqui! Riches, aiyie piqui! Mais quand je sait que tout le monde souffre, Je ne peux pas resté tranquille et vais Devant ses pas s'ouvri un nouviau gouffre Sans avertir tout homme au coeur Jerriais, Car man pays, petit Jerri je t'aime, Et quand la gniet je ne peux pas dormi, Pensant à té, je siès hors de mé même, Aiyie Piqui! Riches, aiyie piqui! Don che n'est pas l'intezêt qui me gide, Je ne vains pas demandé rain pour mé Pour l'orphelin, la veuve et le timide, Y faut qu'au mains quicun ôze pâlé. Ches chan qui fait que je prends lus défense; Je risque tout même d'être nargui, Mais j'ai trejous soutenu l'innocence Aiyie Piqui! Riches, aiyie piqui! Refliechisson; chute mort qui tout ôze Yun de chès jours à tout va mettre fin, Et que fezons de vos sous dans la fosse; Répondais-mé Godfray, Gibaut, Robin? Sans charitait, l'argent est inutile, Pensais-zi bain Gosset et Hemery, Y n'en faut pas dans la maison d'argile; Aiyie Piqui! Riches, aiyie piqui!
Lé 29 Septembre(êcrithie modèrnîsée) Lundi tchi veint, la Saint-Miché arrive, Pouor bein des gens ch'est un jour dé bonheu, Mais tchi grand tas i' va mettre en dérive; Car ch't' année est un an dé malheu; Comment châtchun va-t-i' payi ses dettes; Car pouor monnaie nou n'a qué du papi Tchi né vaut pas pus qu'autant de chitchettes, Ayiz Pitchi! Riches, ayiz pitchi! Car des rentchièrs i' faut bein ténîn compte Épis dé pus ch'est lé jour du quart-d'an, Dénonciateurs et Député-Vicomte, Les Ecrivains, touos jusqu'à Moussieu Jean, Îthont bétôt par campangne et par ville, Comme jadis faîthait Thomas Sohyi; Dithe payiz ou jé vos envyie bille, Ayiz Pitchi! Riches, ayiz pitchi! Jé né veins pas pliaidgi ma propre cause, Car mes anmîns savent qué jé n'ai rein, Mais mes bésouains né sont pas grande chose Et ma dgaieté mé suffit pouor tout bein. Tout chein qué j'ai dé propriêté fonciéthe Est un tèrrain grand dé deux-pids-par-huit, A l'Almorah dans lé coin du chînm'tchiéthe, Ayiz Pitchi! Riches, ayiz pitchi! Mais quand jé sai qué tout lé monde souffre, Jé ne peux pas rester trantchil'ye et vaie Dévant ses pas s'ouvri un nouvieau gouffre Sans avèrti tout homme au tchoeu Jèrriais, Car man pays, pétit Jèrri, jé t'aime, Et quand la niet jé né peux pas dormi, Pensant à té, je sis hors dé mé-même, Ayiz Pitchi! Riches, ayiz pitchi! Don ché n'est pas l'intéthêt tchi mé dgide, Je ne veins pas démandé rein pouor mé Pour l'orphélîn, la veuve et lé tînmide, I' faut qu'au mains tchitchun ôse pâler. Ch'est chein tchi fait qué jé prends lus défense; Jé risque tout même d'être nardgi, Mais j'ai tréjous souôténu l'innocence Ayiz Pitchi! Riches, ayiz pitchi! Refliéchissons; chutte mort tchi tout ôse Iun dé ches jours à tout va mettre fîn, Et tchi féthons dé vos sou dans la fôsse; Répondez-mé Godfray, Gibaut, Robîn? Sans charité, l'argent est înnutile, Pensez-y bein Gosset et Hemery, I' n'en faut pas dans la maîson d'èrdgile; Ayiz Pitchi! Riches, ayiz pitchi! L'Anmin Flippe La Chronique de Jersey 27/9/1873 |
Viyiz étout: