Les Pages Jèrriaises

UN JEUNE HOMME D' ACH'TTE HEURE

Je s'is un garçon qu'a tout plien
De sous, - et meut d'un magle d'bein.

I.

Le buon homm' qui m'a dévanchi,
A-t'i' donc sué et épeigni,
Afin de m'mettre à l'aise!
Mais dam! coumm' li je n'veux pas faire, -
Travas n'a pas l'hounneur de m'pliaire,
Pourqui, d'ailleurs, en f'rais-je?
S'is-j' pas un garçon qu'a tout plien
De sous, - et meut d'un magle d'bein? -

II.

Atou d'mé j'vé quiq'fais des gens
Qui pass'nt un lopin de ius temps
A liaire et à s'pousser.
Coumme i' s'tempêt'nt! - oui, - mais pourqui?
I' z-ont ius gogaille à gangni:
J'n'ai pas chla à m'badrer!
Car j'sis un garçon qu'a tout plien
De sous, - et meut d'un magle d'bein.

III.

I' sont embêtant ov lus d'vis,
Lus compagnie donc j'écopis, -
Pourqui l'endurerais-je?
Mon chervé, mé, je n'veux troublier
De rein qui dounn' même à penser,
Pourqui l'accabass'rais-je?
S'is-j' pas un garçon qu'a tout plien
De sous, - et meut d'un magle d'bein?

IV.

Je n'vis pour rein sinon pour joui;
Mon temps, donc, n'est pas gazuolli
Avec des esprités.
Voul'ous savé l'empliet qu'j'en fais?
Voul'ous que j'vo's conte iou je m'pliais?
Et coumment s'trouv'nt passés,
Les jours d'un jeun' homm' qu'a tout plien
De sous, - et meut d'un magle d'bein?

V.

Je m'lève assez tard; - pis j'allume
Ma pipe, et pour un' volée fume,
Dont - j'prends mon déjuner:
Après chla j'm'en vais au café,
Là quiq' parties de billiards j'ai
Et j'm'en r'veins pour dîner:
Joyeux d'avé, coumm' l'ai, tout plien
De sous, - et d'joui d'un magle d'bein.

VI.

Pis, je r'fume - et prends un' tuônée, -
Mon verre - un somme, - une autr' pipée,
Un' beurrée et un' tasse;
Après qui, au Club je m'en vais,
Là l'rest' de la journée je fais, -
O qui' buon temps j'y passe!
Avec des garçons qu'ont tout plien
De sous, coumm' mé, et meuv'nt de bein!

VII.

J'no's ent'faisons tout' sortes d'farces -
J'pâlons de chans, de ch'vaux, de garces -
J' faisons un trains de fer;
Pis cartes - et grog - et p'tit souper, -
O faut no's vais no's en dounner, -
Chest un' vraie boss' chaq' seir!
Un chaqun d'nous est garçon plien
De sous, - et qui rengorge d'bein,

VIII.

Le Dimanche à l'us des chapelles,
Je m'louène afin d'vais les hardelles,
En entrer et sorti:
Mais ni à messe ou prêch' je vais -
O sapristi! coumm' j'y baill'rais -
Ou quaîrais endormi!
Préchaille est buonn' pour plo sans pain,
Mais n'va pas pour jeun' homm' de bein.

IX.

I'a un flioquet d'bachouards - des gens
Sans sous - qui dis'nt à c'que j'entends
Que j'dais êtr' bein vicieux:
Ou, - pière aquor! - que j'vis coumm' por
Qui n'fait pon d'bein avant d'êt' mort; -
Boustre! - N'êch' pas honteux,
De dir' dité d'un jeun' homm' plien
De sous, - et qu'a un magle d' bein?

X.

Mais, j'm'en bott'. La strad' je battrai, -
Club, carte et pip' continuerai, -
De man boulans j'sis fi -
Et vo's ayant dit tout choun'chin,
Et vo's conté tout man dem'nin,
J'VO'S CALLENGE A JUGI
LA VIE QU'EST A LA MODE ANIEN,
PARMI LES GARÇONS QU'ONT DU BEIN!

 

L

 

Viyiz étout:

 

Les Pages Jèrriaises