Il y en a pus d'ieun des siens qui allites à la fête de Springfield, Vendredi au sé, qui auraient bein payi tchiques coppers de pus pouor vais happer au “lasso” les siens qui avaient happé lus sous pouor dithèt spectaclye!
Ch'est qu'il y en avait de mârris et en attendant les fireworks d'la séthée il y eu ieut de tithèt … avec la langue contre les organisateurs de chu Rodéo.
D'pis qu'ieun d'lus parchionniers, qui s'rendit à la pêque autouor des Pierres-de-Lecq, le lendemain de la thitherie pouor prix des siens du club de St.-Ou, d'pis que chu pêtcheur aurait pu remplir son bâté de cormorans, les pêtcheurs de Bonne Nièth n'veulent pus aller à la pèque de maqueré de chu bord d'peur d'être tithés èttout!!
Ch'tait l'buanhomme Philip qui touot surprins d'vais que les cormorans semblaient aver la maladie du sommeil, s'approchi et vit qu'ils taient morts. Y pensi que p't-être qu'ils avaient été gazés par la titherie de tchique frégattes mais nennin, ch'n'tait pon chunna.
Mé, Marie Hibou, j'peur dithe ès pètcheurs de Bonne Nièth que pouor être seur d'n'être pon tithèt d'même, l'mus à faithe chest d'envièth ieun d'lus mousses sus sa bicke pouor s'faithe seur que Frainque de l'Etacq est trop otchuppé à l'entouor de ses toumates pouor aller pratithi avec s'n'arme à Crabbé!
J'sis quassiment seur que ch'est chu Frainque là qui fit chu massacre de cormorans et n'v'la pouortchi que l'jour d'la titherie pouor prix, y n'touchi pas l'target une seule fais! Chunna est la pure, plaine et entièthe vérithèt et nous dit que si l'année tchi veint y fait un “bull” ch'est un cormorant stuffé qu'nous ly f'ra présent couomme prix spécial des pètcheurs de Bonne Nièth!
Touot chest temps ch'n'est que fêtes d'un bord et d'l'autre. Y faut craithe que la saison des patates n'a pon été aussi faillie que touot chunna, d'pis que les sous les déshallent à pelletées pouor aller vais à touotes ces fêtes la même chose!!
Si tchicques fais j'vais à dithèt fêtes ch'n'est pon pouor vais deux ou trais lanternes chinoises ou des podins rouoges ou blieus, ni pouor esprouver à avèr des cockunets à buan marchi et aver l'plaisi d'en supper le lait; nennin, ch'est pouor vais si je n'pouorrais pon ramasser tchiques p'tits buts pouor mettre sus la gazette et faithe plaisi ès siens qui n'voudraient pon vais chunna en “print”!
A dire vrai, j'n'comprends pon les siens qui dépensent des souos pouor être à maintchi aveuglye ou empoisonnné par l'ponsy des buts d'papi qu'nous ramasse à bas pouor n'pon aver à en acater! Oprès chein que j'vit l'autre sé, j'espèthe que le Coumitté de Santé Publique s'f'ra un d'vé de faithe passer une louaie par les Etats pouor empêchi la vente des confettis.
Chutte affaithe ichin n'est pon du gnollin car ch'est la pure, pleine et entièthe vérithèt.
Ch'tait la séthée des régates à Gouorey. J'tais jutchie sus ieun des bouais d'oprès la d'meuthe d'ieun des grands d'la paraisse qui fut un grand abbé de Carteret pendant un temps. J'tais jutchie là pensant que d'même j'pouorrais dormir bé trantchille souos la protection d'la police, quand j'vit mon vièr amin Jack Washington qui s'en r'venait d'la fête. L'pouorre vi n'en pouvait pus, d'fatigue, bein entendu. J'pensi à mé même qu'une buanne nièth dans son lièth ermettrait l'buanhomme Jack all right.
J'oui Louisa, sa belle fille, ly faithe tchicques r'merques - ly souhaiter buanne nièth à chein que j'pensi - mais tchi surprinse quand j'vit l'buanhomme rêssortir, s'n'aller dans l'gardin, déshaller sa casaque puis sa qu'minse s'il vous pliait oui, respect de vous, sa qu'minse, car y n'gardi que ses braies! Et deux fais il la halli avec sa casaque et s'mint à secouer l'tout dans l'gardin, assez pouor attrapper les fraids d'la mort pouor un homme de s'n'âge. Et touot chunna pouor rein en tout d'pis que ch'tait pouor des confettis, car Louise n'aime pon aver dithèt dans la maison et couomme l'buanhomme en était rempli quassiment couomme une pouque, ch'est dans l'gardin qui voulis aller les enfouir mais pus il en tirait de sa qu'minse pus il y en avait qui lus déshallaient!
Et encouore malgré touot du d'jantre s'il n'en trouvi pon jusque dans ses cauches, et même dans san lièth, le lendemain au matin!
Caouain
1924
Viyiz étout:
