L'autre Mercredi l'arlevée, viyant que l'boss était de r'tour d'un p'tit trip en France, j'pensi qui d'vait être de buanne humeuthe et que ch'tait l'temps d'ly d'mander d'm'faithe un plaisi. J'savais qu'il tait touot fier de n'pon aver ieut l'mal de mer, ly qui n'voudrait pon aller dans un p'tit bâté jusqu'au châté d'peur d'aver à engraissi les paissons. Tchi surprinse, quand j'apprins qu'il avait l'mal de mer deux jours oprès son r'tour sur l'plancher des vacques, couomme disent les normands de France.
Et tchès que tu m'veur, qui s'fit avec une telle buanne humeuthe que j'pensi qui fallait mus rein ly d'mander.
J'sis v'nue vais si pouor une fais vous pouvez vous passer d'mes balivernes car j'pense bein qu'vous allez en mettre un long but dans la gazette à l'entouor d'votre trip. Et un Moussieu couomme vous n'peut pon viagi sans qu'nous ly fasse honneur surtout dans une grande ville couomme Paris. J'pense bein que ce n'fut que réceptions et dîners en votre honneur...
- As-tu la berlue pouor pasler d'même, qui s'fit. Si ch'tait té j'sis quassiment seur que ch'est au Jardin des Pliantes qu'nous organiserait une réception.
- Au Jardin des Pliantes? Mais j'n'sis pon une pliante mé.
- Nennin, mais tu es une bête, et chès là qu'nous vais toutes sortes d'bêtes. Tu f'rais mus d'écrithe tes balivernes pouor la gazette de Samedi que de m'ennièth d'même.
Et mé qui criyait aver un holiday èttout!
D'pis que ch'est d'même y faut que j'vos raconte tchiques scène qui s'passites à la fête au manièth dans la paraisse d'man biaiu cliochi.
Couomme nous sait l'Jeudi au sé y versait d'pluie, mais j'couonnais trais couples qui n'en étaient pon marris car ils avaient la grande tente à lus touot seu et ch'est que...
Fred, ly qui n'tait pon seul pouor seur, resti dans l'bâté sus l'vivi jusqu'à passé onze heuthes de sé. Il tait trempé couomme une soupe et la hardelle èttout, mais n'v'la qui n'faisait rein.
S'il y ieut un exhibit de moins dans les bikes ch'est que viyant qu'nous apprins qu'Alice avait enviée sa bike a grée hors paraisse et n'v'la pouortchi que chu butterfly ieut l's'ailes coupées à La Godillerie mais si nous avait seu que ch'tait du bord de Grouville que la bike avait été enviée n'v'la qui ne se s'rait pon passé d'même.
Nous n'mins pon sus les gazettes que quand Charlie s'trouvi à mitan sus l'aerial y laissi tchès l'mousse à Edwin.
Harold et George avaient l'pus populaire side show de touos avec lus cocaonuts qui étaient d'une sorte spéciale car ch'n'tait pon du lait de cocaonut ordinaithe qu'nous faisait gouoter à ses amins.
Pouor saver dans tchi motor car qu'ou eut une ride y faut d'mander au cacheur car si j'en connais un p'tit pus long n'v'la qui r'ergarde. J'sis bein seur qu'a chute fête l'profit sus l'thée n'fut pon bé grand car s'il y en ieut touot pliein d'bu et hardi d'gache de mangie il y avait tant d'helpers qui s'aidites que j'crais pon qu'nous r'chu grand sous.
Caouain
1924
Viyiz étout:
