Eh bein man Mess Bisson, qu'est cou criyies des fêtes? Si je vos d'mande chutte question la, ch'nest pas pour vous a m'la rêpondre, chest pour vos montré que j'ai formai m'nidaie d'sus et que je n'cherche qu'à vos la dithe; j'em sis adreschi a vous, car y patheais que nous n'gaunne rein de s'adreschi a Mess Le Feuvre, y l'est presque perdu dans des modèles de bathiaux et nou za d'la peine a l'vais achteuze.
Quest cou criyiez des fêtes? eh bein j'men vais vos l'dithe, si ou voulais bein me l'permettre: je sortîmes de siez nous, dans la sethaie du 6, ma femme et mé avec tuous les marmots, ah chest cou l'est bein arranghie not' van, yia des bancs et des couesins en pieumme de poule que Louisa a sauvai depis que je soummes mathiais, tout est bein arranghi pour quant y yia des thés es Chapelles; quand j'pense es vieilles gens, je m'en gratte la tête, et je m'imagine les vais sus la selle bâthièthe, l'un en drièthe de l'autre; eh bein, quand j'y pense j'ai pithi de yieux; nos v'la mé et ma femme et tuous l'esfants assis dans not' van sus des bancs tuous quosinais et allant quedaine sus la grande route de la Trintai, pour arrivé en temps en Ville pour vais les illuminations.
La prumièthe chose qui nos frappi che fut l'Moulin d'la Ville tout êluminai; hélas ouest qu'est l'temps qui fallait des soudars a l'gardé, les temps sont changhies, l'pain est a buoun marchi achteu, et nou peut avé des hot-rolls pour breakfirst au même prix.
En arrivant siez Braie, coumme je disons, tuous les esfants se minrent a criai my hie! car ne v'la tout l'anghiais qui savent, y n'savaient guèthe qu'est qu'yiavait par ailleurs dans la ville; pus haut dans Bath Street, yiavait des ételles et d'autres ramassies qui pathaissaient assais bein; mais je dis a Louisa d'attendre a vais les marchiers, et ou verrait de tchi bé, chest Mousieu Gruchy qu'est a la tête, me fisge, et je sis seux qui vos a éluminai tout chounna coumme y faut, toutes les arches et le dôme sethont êluminais à l'êlectricitai.
Quand je vinmes endrait l'marchi, ah je me sentais bein p'tit, j'érais voulu être siez nous, chétait triste à vais; les marchiers! ieunne des seules administrations qui paient bein, et la vais de même oubliai; pus tard nou m'dit que chétait pour ne pas fondre le beurre qui avait restai dans les panniers a Mrs. Nicolle et que les oeux éthaient tai a maintchi couies par la caleu, s'il avaient éluminai coumme j'entends; et vrainment je fini par dithe que chétait bein pensait de la par du président.
Dans le Square, la Cour n'avait pon grosse meinne, y yiavait quicque sorte d'êmânue en gas, nou nos dit que chetait des coumettes, mais ma femme et mé je n'avaîmes pon oquo veu ditais paissons.
Coumme dans le cas des Marchiers, je nos étaîmes fiais sus l'Club au bas du Square, et je fûmes longtemps a j'ensai en cherchant la raison, les autres faies le Club était diversement bé mais chutte faie, rein du tout, et pis j'erpensîmes es puoures médgians qui avaient perdu une trentaine de louis dernieth'ment.
Je veinmes tout d'un coup endrait Mess Jones, le kiencâlyi, sa boutique était bein belle; le gardin du Weigh-bridge était tout à fait bé, l'Esplanade et Gloster Street étaient ravissants.
L'Hopita et la Parade étaient tout chein qui yiavait de miyieu dans toute la Ville, et les esfants n'ont fait qué d'en pâlé dépis et continuethont a l'faithe pour cheinquante ans, si vivent; je restîmes coumme des estemperches, tous extâsiais et tous êbahis en viant chutte scaine-la devant nous, car tout chounna valait la peine de vais; jusqu'à la Vilette qu'en était toute j'en sai comment, j'avais biau li châtchi la bride oul tai coumme si oul avait tai fitchie a sa terraie, y l'y fallait vais aitou.
J'etais bein content d'avé prins touos les esfants jusqu'au baby de deux mais, qui était tout fi et tout content et pathessait comprendre tout - j'entends quicqu fais sa mémaie dithe qu'il est pus avisai que san pèthe, et je l'crai, je'tais d'même aitou a s'nage, mais j'en ai perdu hardi a vieillyi; et pis toutes les mémaies ont une grosse idaie de lus baby; pour ervenin à la parade, je fumes une bounne volaie la a stand by to never mind, coumme je dis quicq fais, car chétait si bé a vais.
J'erveinmes par la rue de l'Hôpita, par la Sêtounnerie et par la rue de Drièthe, je vîmes la procession avec des torches, des batiaux sus rouelles et de drôles de femmes avec des longues robes toutes bianches, je les vîmes descendre de lus vétuthes auprès d'la fète et Louisa s'apperchut qu'ils avaient des neithes brès souos lus patuoilles de bianches robes, oul' tai pour en pâlé au Connétable mais je lis dis d'nen dithe rein.
Dans la rue de Drièthe la boutique es Messieux d'Gruchy était quicq chose a s'en rapplé, yavait en grandes lettres "Long live the white rose and the May" entre ma femme et l'esfants il en faisaient "une bianche rose dans l'mais d'Mai," l'Arcade tai bein belle, qui longueu cou pathessait avait? my hy! oquoth une fais.
Les boutiques à Noel et Porter valaient la peine de vais - et tout bein countai, tout était bein bé, mais yia une chose que je n'pûmes pas vais, ma femme et ma grande fille, oul à huit ans et d'mi, 'taient tréjous à mé d'mandé pour le weding present, mais j'avais biau cherchi partout pour, je n'en vîmes rein du tout.
Je sortîmes de la ville vier les onze heuthes et je nos en 'r'veinnent siez nous, comme de buons vieirs paysans que j'soummes, che n'est pas par aucune chose, mais chest seimpiément pour dithe, j'étions bein contents mais bein lassais de not' viage, la Vilette pathessait de même aitou, - l'auluouge sounnait meingneit quand je frumais la porte de s'nêtable; je nos en allîmes nos quochi, je n'avaîmes pas besoin d'être berchies pour nos endormi, je tchîmes, tuous piât coumme gâche, car j'avons l'habitude de nos quochi quand 'tai les poules et de nos l'vé quand 'tai yieux aitou; dans les fermes chest du matin que le jour se gâgne.
Lias,
La Trintai,
Chu 13 Juillet 1893
Viyiz étout: