Les Pages Jèrriaises

L'Frainque de Vinchelez en fit des sous avec sa djingue de ch'vaux

L'Frainque de Vinchelez en fit des sous avec sa djingue de ch'vaux et l'affaithe alli d'charme d'pis que malgré tout chu monde à l'entouour du race course, personne n'eut d'coupi d'cheva ! Y reste une maie non pas d'fumi mais de tchi fumer avec touos chès buts de cigarettes !

Freddo, l'tcherpenthi d'Millais, ne voulli pon que nous l'y aidisse et s'y vous voulais aver une bordée d'fun y faut sufflié "If I were the only girl" car ch'est l'tune qu'il aimait l'mus et j'gage ieunne de mes plieumes que si nous suffliait chu tune près de l'y sa main touounerait touout l'temps !

Frainque de Lecq et Jack d'la Cache étaient à bailli d'lus bec pour conter ès gens un tas d'sornettes. Y fallait les ouithe s'faithe : De 'dittès montres y n'ont pon ès "London Jewellers." Vingt-chinq ans de garantie qui n'arrêteront pas une fais windée avec la clef que nous peu acater sièz Hunt !! … Frainque en avait la gorge sec et l'Jeudi au sé y n'pouvait quassiment pus d'viser. Un lermin d'lime juice l'y aurait fait hardi d'bein.

Je criyais qui y avait une autre side-show dans ieunne des valettes en viyant touous ces couples s'n'aller de chu bord. J'y alli mais j'n'trouvi personne en chèrge et j'crais que l'siens qui y allites étaient ennièths d'attendre et avaient fraid car y en avait hardi d'assis sus les fossés et y s'rapprochaient l'pus près possible …. pour n'pon aver fraid ! P't'être que ch'tait pour vèr la veue du phare d'la Hague ou pour admithé la leunne !! Pour seur y n'y avait pon grand bruit de chu bord !

La prechaine fais que Frainque de Grosnez s'ra en chèrge y f'ra bein de clieuther les balles ou d'avèr pus de cocoanuts car d'vant sept heuthes l'Jeudi au sé touout était hors et y fallu aller cherchi des bouaitées de chocolat et de cigarettes. Frainque, l'annèe tchi vint y faudra en avèr deux harnais plein de chès cocoanuts.

Nous viyait bein que Berti du Marais avait servi d'vant dans une boutique à vaissiaux d'pis qui cliairgi touout avec son houpe là ! Crais tu Berti, qu'les mêlles taient assez grandes ?

Bill, l'fossi, fut bein otchuppé. Nennin, pon a digger mais a ramasser les sous à pelletée. Y'm'fit quassiment peux en l'viyant avec chutte night gown. Ma fingre, Bill t'aurais fait un bel êpeuthas pour les siens qui s'n'allaient s'proumener dans les valettes.

D'pis pus d'un an l'p'tit Philip d'oprès Dolphus avait un plian pour arrangi l's'arbres et pour seur n'vla qui pathaissait magnifique. Stan l'tcherpenti, de Millais, et Franco, l'causeur, avait la job la pus êlevée de touotes … celle d'allumer la grande maison.

Ichin fini la prumiéthe leçon, celle des compliements, achteu y faut que j'vos raconte tchiques p'tits d'une autre suourte.

J'connais bein deux hardelles qui fites trais chelins pour l'grand bézaar d'la chapelle.

N'v'chein coumment que chunna s'fit et je vos asseuthe que n'v'la qu'est la pure, pliene et entièthe vétithèt. Ils 'taient deux gars qui rencontrites deux belles hardelles. Lus noms vous n'l'connaitrais pon mais mé j'les connais. Ieun des gars s'mit à faithe : Baille mé un kiss et l'hardelle l'y reponnit : Si tu veur m'dounner un chelin pour notre bézaar. Et ma fingre il l'y bailli un chelin … et un kiss. L'autre gars, un p'tit pus gourmand en prins deux ch'est pourtchi il alli deux chelins de sa pouchette pour chu bézaar !

L'Franco d'la Robeline voudrait bein saver l'nom du sien qui s'n'alli avec la pus belle flieuthe qu'il avait apporté et qui valait bein huit sous a san tout seu.

Chu Franco fit grand peur au grand Frank de Trodez quand l'êtchelle tchi bas. Y criyait que ch'tait une job pour le docteur mais il n'y avait rein le rompu.

L'Vendredi, la grande Mérienne éthait bein embarassé à l'entuour de chu lapin qui n'avait rein eu à mangi d'pis deux jours. Y fallait l'nocer !

L'grand Frainque de l'Etacq criyait aver happé une andjuille et bail'i un si dur satchet au wire qui s'ne'n alla tchès sus l'dos dans l'vivi comme un canard. Frainque, si j'tais que té j'enverrais une callenge à Yvon car pour seur y n'pon diver sus l'dos aussi bein que té.

Viyant chunna l'Frainque d'la porte, alli cherchi un moteur et cache à l'Etacq pour setchi l'pouorre quand Frainque. Nennin, y n'fut pon amathé sus une corde à linge ! Il alli changi ses hardes.

Jim l'Souoneur et son fils étaient en charge d'une boutique de ticles qui ronnaient et plieuthaient pour que nous les hale de chu feu d'enfé que l'viez Nickless, l'foreman et touos ses routiers étaient à stoker avec du bouais. J'ai oui dithe qu'ils en brulites pus de 400 fagots et comme s'faisait l'gros Phlip : Y n'reste pas grand bouais dans la paraisse, d'pis huit jours que j'sis a en charrier avec mon van. Ch'est qu'il en faut éttout pour cauffer 23 ticles pour quatre jours.

Coume j'naime pas l's'armes j'n'halli pon du bord du tir. Tchique fais viyous un malheur est bé vite arrivé.

Nos gens fits bein d'n'pon avec de fireworks car si un squib ou un cracker éthait tombe sus George, l'boss du show, il aurait fait une belle chandelle, viyant qu'il tait touot graissi a forche de déshaller les chandelles et les tapes pour l'illumination. L'pouorre corps n'voulait même pon allumer une cigarette d'peur de brûler sa moustache avec toute chutte graisse ou d'être ruotti comme un mousson.

D'avant d'porter les lampions en ville l'Frank de Lecq d'mandi s'ils avaient té bein envelopés car y n'voulait pon aver à payi les pots cassés !

Ch'tait p't'être pour illuminer sièz li quand son fils s'mariera que Frainque de la Villaise ramassi touos les buts de chandelles. Il avait prins tout chut embarras et oprès tout, Dolphus de Vinchelez les fit vendre.

Ch'est l'gros Phlip de Porte en fer qui les accati pour 1/6. Comme y s'faisait : N'v'la qui servira cet hiver quand nos gens s'ront à mâter des patates.

Ch'est Moussieu Frainque qui fit la vendu mais tchi qui accati les verres cassés et les payi ?



Caouain
28/8/1920
 

Viyiz étout:

 

Les Pages Jèrriaises