Je vos avais dit l'aut'e semaine que Laïesse Ernon avait 'té invité d'aller au Carnaval de St.-Pierre et qu'sa femme se décidi d'y aller avec li.
Eh bain, chu jour-là i' ventait une brise abominablye duthant la matinée et i' tchiyait d'la plyie par bordées, chein qui fit Laïesse penser que sa missice ne voudrait pon sorti du temps qui faisait et qu'il aithait p't'-être a chance d'y aller tout seu.
Quand ils 'taient à dîner i li dit comme chenna, “Je n'crai pas ma chiéthe, que les St. Pierrais pouorront avé lus Carnaval de chu temps-là, et pis quand-même tu ès à peine erfaite de ta suée d'fraid et je n'crai pas que tu dévthais ristchi d'aller t'mettre piéthe, car tu vai, la terre s'en va être pus ou mains mouollyie et tu aithas les pids gelès toute la séthée. I' y a ocqo de vier chent-chinquante cassées d'patates à mâter et je crai, sais-tu bain...
“En v'là assez Laïesse!” ou li raîponni, “si y a un Carnaval annièt je m'y en vais, ou si j'n'y vais pas tu n'îthas pas ninnetou, té! A trais heuthes ch'tte arlévée je m'en vais téléphoner à Ertu l'Marquand pour saver tch'est qu'en est et li d'mander si j'pouvais mettre le jument et l'querre siez-li. Ch'est pourtchi n'êprouve pas d'autre à m'empêchi d'y aller, man garçon. Si y a oquo des patates à mâter tu peux tréjous les fini té, tchique jour qui tcherra d'la plyie. Pour de mé je sis bain dêterminée de ne r'passer pas d'autres nyits dans les soyiers.”
Comme le temps se r'cliergi, la fête ne fut pas r'minse, et opprès l'thée Laïesse lyi la jument et les v'là partis. Opprès avé mins la jument à l'abri siez Ertu i' s'minrent en route pour le terrain et par chu temps-là les “exhibits” êtaient rangis le long d'la route qui mène de la “Post Office” au Mannyi d'la Hague.
Les Juges v'naient justement d'sorti d'l'Hôtel et étaient en traîn de s'mettre à jugi, et Laïesse comptait d'pouver s'en aller examiner les difféthentes classes de tout près, comme il avait fait à Ste.-Mathie, mais i' trouvi une grande barre en travers de la route et i' s'mins à la souôlever d'un but pour laissi sa bouanefemme passer, mais i' fut empoigni par le collet et une vouaix li d'mandi, “Ouest qu'ou criyiz qu'ou vos 'n alllez?”
Ch'tait l'gros Chant'nyi Winneteur qui li avait mins la main sus l'co.
“Mais j'voulons aller vaie l'Carnaval!” se fît Laïesse.
“Eh bain, ou n'pouvez pas passer par ichin! Faites comme les autres, allez par dans l'clios.”
Missice Ernon c'menchi à protester, en disant qu'ou n'voulait pas piler sus la terre mucre.
“Mettez des chabots!” se fit Winneteur.
Ils entrithent dans l'clios en grommâchant et Missice demandi à Laïsse, “Est-che là l'Chant'nyi de tchi qu'tu n'pâlais l'aut'e jour?”
“Oui dja.”
“Eh bain j'n'aithais pas creu qu'il aithait pâlé comme chenna à une femme!”
Ils euthent touos les deux bain d'la minséthe à vaie les “exhibits” comme i'faut, car i' fallait allouogni l'co par en d'sus d'un banc d'êpines et i' y avait tant d'monde à s'entre pousser que la pouore Missice fini par aver une grande triyache dans san bouan châle.
Oprès qu'ils eurent veu la procession passer i' s'en furent dans l'aut'e clios alentou du “Band Stand,” vaie les gens s'entre jouôter avec du confetti, mais quand vint au temps la femme à Laïesse se pliaigni qu'oulle avait fraid ès pids, ch'est pourtchi s'n homme la fit entrer dans une tente ouest qu'i' servaient du café caud et opprès li en aver c'mandé une tassée i' la fit s'assièthe à une tablye et li dit le l'attendre la pour tchiques minutes car il avait affaithe ailleurs.
Mais ches minutes-là furent bain longues.
Au but d'une démie-heuthe Missice vint gênée, et ou dêhalli d'hors pour tâchi d'trouver Laïesse mais ou n'avait pas fait vingt pas, qu'i'li tchi une poignie d'confetti à travers de la fache. Ou n'tait pas accouôtumée à chenna lyi, et à la maintchi êtouffée et presqu'aveuglyie oulle êprouvi à assommer l'individu qui l'avait fait, avec un coup d'parapluie, mais malheur y en fut, car ou fut assaîllie de touos les côtés par une djaingue de jeunes gens.
Iun d'ieux eu l'audace de li ouvri l'collet d'la blouse et li en fouôrri une poutchie toute entchéthe avau l'estoma, un autre li en fit autant dans l'dos, et la pouore femme vint quâsi folle.
Ou s'sauvi dans la route et s'mins à s'êcouer comme une poule qui vaint de s'rouler dans du ponsi, mais tant pus qu'ou s'châtchait tant pus la maudite matchiéthe filait ava et oulle 'tait bain liain d'être confortablye, je vos asseûthe.
Au but d'tchique temps ou vi un homme qu'ou connaissait et oulle li d'mandi. “Avous veu m'n homme de tchique carre?”
“Ah oui Missice,” j'li raîponni, “j'ai rencontré Laïesse i'y a peu près une démi-heuthe. Il 'tait avec la Président et i's'en allaient du côté du “Committee Room,”
“Par iou qu'nous y va?”
I' li inditchi le c'min.
Ou s'y en fut tout drèt.
Un homme qu'était à la porte êprouvi à li barrer le c'min mais ou l'poussi d'côté et la prumié chose qu'ou vit était Laïesse avec un verre à la main et qui disait justement, “A vot'e santé, Messieux!”
Ou sauti d'sus comme un lion et avec le manche de san parapluie li baîlli une ouape sus la patte qui mins san verre en minchons.
Le pouôre Laïesse fut si êtonné qu'i' n'pu pas dithe un mot, et le prenant par une ouotheille ou l'entraîni hors de l'appartement.
Je n'peux pas vos raconter chein qui s'passi dans l'bel à Ertu l'Merquand, - i' y a des mots que not'e foremainne erfuse d'imprimer - mais le pouore Laïesse en attrapi du cliai et d'l'êpais tout l'temps qu'i' fut à lier la jument et tout l'long du c'min en s'en rallant siez ieux.
Laïesse n'ayant pas attrapé d'confetti, s'en fut tout dret s'couochi, mais Missice, opprès aver barre les portes et abattu les ridgeaux, se d's'habillyi dans la tchuisine. Quand ou vit le mouoché de confetti qui reste sus l'chiment quand oulle eut êcoué ses habits, ou r'vint pus enragie qu'jamais, et quand ou ramonti à s'couochi ou r'c'menchi entouor s'n homme jusqu'au lendemain au matin.
I' n'dormithent pas une lerme, ni l'un ni l'autre chute nièt-là, Laïesse qu'avait ieu bouanne idée d'aller à St.-Martin et à Grouville, a 'té d'fendu d'y mettre le pid et sa femme ne li a pas pâlé djaix patholes dépis la bordée d'St. Pierre.
Si ch'est qu'ou voulez causer une scène, en autchun temps qu'ou vos trouvethez en présence de Missice Ernon, ou n'avez qu'à prononcer le mot “Carnaval.”
Caouain
1924
Viyiz étout: