Quand j'dis au boss que j'avais dans l'idêe d'aller au carnava dans la paraisse à man biau cliocher, y s'fit: Tu peux aller au diable si tu veur mais mé j'sis mârri aves les siens de chu carnava qui n'ont pas ieut la civilité d'penser à notre gazette.

Et ch'est qu'il tait mârri éttout mais n'v'la qui n'fait rein car mé j'vais vos en raconter pus qu'nous n'aurait mins sus la gazette si l'boss y avait été pouor en faithe un report.

Ch'est que j'en ai oui et veu éttout pendant et après la fête.

J'pense bein qu'achteu touos les trin'tais savent chein que ch'est que des nymphes ou des mermaids couomme nous les appelle en angliais car d'pis l'carnava ch'est touot l'd'vis d'la paraisse.

Bé seur, touos n'sont pon du mêmê avis car il y a les siens qui trouvent que chunna était superbe et d'autres qui s'font que ch'tait assez pouor attrapper les fraids d'la mort et autres ermerques.

L'Bill, qui n'pouorrait pon aller en baté jusqu'au chaté s'en aver l'mà de mer, s'faisait à un pètcheur du bord de Rozé que s'il savait pêtchi un paisson couomme ch'est mermaids il acaterait d'suite un bâté et un dranet.

L'grand Jack, v'nu d'une autre paraisse pouor jugi les exhibits, s'fit dans l'Coumittee room que jamais de sa vie il n'aurait pensé qu'nous pouvait pêtchi dithèt à la Trinité, mais mon pouor Jack tu n'lus dit pon couomment que tu t'y prins pouor saver si ch'est mermaids étaient en vie!

Quand Cliaude s'fit qu'nous aller remplir la coupe de champagne pouor bèthe à la santé des mermaids il ieut des hear, hear!

Ieun des grands d'la paraisse de St. Ou, qu'était là éttouot pour jugi, voulait saver si les confettis étaient les siens qu'nous avait ramassi oprès la fête d'l'année passée viyant que les pouques étaient pleines de gravi mais couomme y s'faisait: By Gad! tchi nice turn out.

A dithe la vérithèt il y en avait pus d'ieun qu'aurait bein voulu être pêtcheur au risque de d'v'nir pécheur!

Couomme il et d'couotume dans des fêtes de même il y avait fricot pouor les siens du Coumité et les Juges. Quand nous servi l'paisson, l'grand Jack voulait savèr si chu 'bar' avait été tithèt avec le revolver à Moussieu d'Inspecteur.

Oprès l'diner, ch'fut une game de 'nap' pouor tchicques uns d'entre nos gens et si l'Douard du Critic n'avait pon était si otchupé à p'tite scène qui s'passait pon bé liain d'ly et qu'il aurait pu raconter dans sa gazette. Mais nennin il tait trop otchupé à montrer à ieun des grands d'une autre paraisse la manièthe d'jouer à nap, pouor vais chein qui s'passait de l'autre but d'la table. Et couomme s'faisait Jim à George de Surville: It's a sight for sore eyes!

L'pus bé de l'affaithe ch'est chein qui s'passi dans l'bel, quand un villais crut qui s'n'allait être nièt dans l'motor-car. Ch'tait une bouctée d'ieaue qui fut enviée de mus pouor rafrachir un miot nos gens mais chu villais f'rait mus d'taithe sa becque que de s'pliaindre que ch'tait une sale trick à faithe car oprès tout y n'fallait pon qu'il y aille! Vèr, j'couonnais touote chutte affaithe là et si j'n'en dis pon pus long ch'est que je n'veur pon car j'connais bein l'oisé qui jouit chutte farce... et l's'autres!

J'sais bein éttout que si l'George d'une autre paraisse gagni sa séthée ès cartes, un autre était si mârri d'aver perdu quassiment trente chelins qui s'fit que jamais pu y n'jouerait à chutte game et que ch'n'est pon d'même que nous joue à nap dans sa paraisse.

Marie, n'en v'la assez pouor faithe vais que tu en counnais pu que du n'veur dithe et... pus que nous n'voudrait que tu connaisses!

J'peux dithe à Jack d'la Garenne que s'il y eut du poulet de servi au dinèth du carnava ch'n'tait pon l'sien qu'nous avait mins dans la pouchette à Cliaude, il y a tchîque temps de chunna, car j'n'sis pon coumme Charles et j'n'crais pon que Cliaude voudrait faithe un poulailler de sa pouchette.