Les Pages Jèrriaises

La fête au mougni

J'sis mârri quant au boss qui n'mint pon sus la gazette touos mes d'vis à l'entouor d'la fête au mougni de la Trinité.

P't'être qu'annièth y s'ra d'milleur humeuthe viyant qu'il a ieu l'mal de mer en s'n'allant à St. Brieuc et que n'v'la qui l'y aura ramoner la bile mus qu'une bouctée d'ieau de canelle ou de tché Chambart!

Faut vos dithe qu'a chutte fête nous avait un aeriel-railway mais les siens qui eutes la job de mettre à haut l'wire f'ront bien d'aller l'année tchi vint à la fête de Vinchelez pour apprendre couomment faithe une autre fais.

La Missis de John du Bouley, la sienne qui soigne de l'Eglise, ne lus baillera pon de félicitations sus lus travas, pour seur. Oulle éprouvi d'aver une ride sus l'wire et oulle resti à mi k'min! Tchès qu'nous pouver faithe? Charlie ly s'en alli ramasser un bêque pour éprouver a faithe slider la Missis mais tchi affront d'être enviaie à l'autre but à coup de bêque! Ch'tait être la riselée de tout l'monde et la Missis à John en fut fort mârrie. Si Charlie avait été un miot pus grand il aurait été coudepisé à la tête car ch'est qu'oulle en donni des coups d'pids pour essayi d'slider de l'autre but et Charlie qui resti là, quassiment dessous les pids, pour ercever la Missis dans chès bras si oulle s'ètait laissée tchès bas. Nice job, n'est-che pon Charlie?

Jack, la tie-pin de la Boucterie, fut happé d'même ètout, mais mon Jack si jamais tu réprouve dithèt sport y faudra apporter du fort fi et une aidjuile dans tes pouchettes pour être seur de n'pon perdre tes boutons d'braies couomme à la fête du mougni!

J'espèthe mon Jack que tu n'as pas ieu une suée d'frai oprès être resti jutchi d'même sus l'wire.

L'pouor Jack failli èttout être écrasé par deux couples qu'il tait a balanchi quand l'affaithe capsysi et notre Jack fut prins dessous!

J'pourrais vos en raconter tchicques autres p'tits buts sus chutte fête, mais couomme avec touotes les vendues y n's'en va pas y aver grand run dans la gazette et que j'veur raconter tchicque p'tites scènes qui se sont passées dans les paraisses d'amont, y faut mus taithe ma becque.

* * *

Il y a tchicques semains de chunna, les siens du carnava en la paraisse du buan bergi ieutes un meeting pour saver tchi faithe chutte année.

Ch'tait Fred qui présidait l'meeting et couomme il avait à tchoeur l'succès d'la fête, deux ou trais jours de d'vant il alla ver ses ammins pour lus d'mander d'v'nir au meeting.

Nos gens décidites d'nommer Fred Président et Jim fut ré-élu sécrétaithe, mais tchi surprinse quand Jim prins la pathole et dit a nos gens: J'vos r'mercie Messieurs, mais je résigne. Je ne r'fuse pon pour une autre année mais pour achteu y faudra cherchi un autre secrétaithe!

Et pourtchi dithèt d'vis d'la part de Jim qui était un raide buan secrétaithe? Pourtchi? D'mandez ly, car ce n'est pon mé qui va vous l'dithe, pour seur, mais j'sais bein mé tchès qu'en pense Jim.

* * *

A la fête du mougni de Vinchelez nos gens d'vaient aver un tug of war avec les siens d'la paraisse au buan bergi. L'affaithe avait été arrangie avec Winter qui avait accepté la callenge.

Philippo, l'captain, avait ramassi un team des pus grands hommes de paids d'la paraisse et l'Mardi au sé, pour être seur que son team était prêt y'eut une pratique, Jack d'la Cache ayant ramassi un team èttout.

L'pouorre Philippo, qu'était seur d'aver les milleurs et pus solides gars d'la paraisse fut fort surprins d'vais que la job de haller l'team a Jack d'la Cache était si duthe car nos gens tiraient sus la corde d'lus mus et les vièrs n'bougeaient pon. Mais èttout, pour les faithe bougi il aurait fallu hâler l'bouais iou qu'ieun du team à Jack avait amathé l'but d'la corde!!

Quand vint l'jour, les siens d'la paraisse au buan bergi n'montrites pon lus nez. Nous s'd'mandait s'ils avaient boleté oprès avér accepté la callenge.

Viyant chunna, Charles le St. Jeannais, proposi d'ramasser un team et oprès deux ou trais pulls nos gens fumites les cigares qu'nous avait pour prix.

D'pis, Philippo voudrait bein savér tchès qu'est l'sien qui téléphoni à Winter de n'pas amener son team viyant que l'match n'aurait pon lieu; Chein qui surprins fort Winter qui criyait que l'team a Philippo avait boleté.

Tout d'même, n'v'la qui n'est pas des farces à faithe.

* * *

Dans la paraisse au Maistre des Prés, j'ai oui paslé d'une p'tite scène qui s'passi dans l'Parish Hall à l'entouorre d'un tchan, mais couomme j'sais bein que Francis du Boulivot en est fort mârri et qu'il a été vér des grands d'Hill Street, j'aime mus taithe ma becque.

J'crais quassiment qu'nous en entendra pârler d'ichin p'tit d'temps.

Qui vivra verra!

Caouain
Les Chroniques de Jersey 16/9/1922

 

Viyiz étout:

 

Les Pages Jèrriaises