Nos v'là acheteu en pliaine saison des Carnavals.
Touos les Jeudis i' y en a iun dans tchiqu'unes des pâraisses.
Jusqu'achteu le temps y a servi et ch'est un ênorme fliotchet d'monde qui s'y rend à chaque occasion. Nou craithai que ch'tte espèce de fête-là aithait de l'attraction raique pour des jeunes gens, mais nous y rencontre des gens de toutes les âges. Le Caouain, qui y assiste assez rédgulièthement, par les ordres du Chef, sans doute, y vait toutes les s'maines des anciens de septante ans à s'entre jouôter avec du confetti tout comme des mousses de sieze ou djaix-huit ans. Ch'est inutile d'êprouver à y résister, que nous est prins d'une manièthe de fièvre et nous s'trouve engouffrés dans l'tourbillion bain souvent malgré sé.
Parmi les spectateurs j'y ai r'mertchi deustrais feis dernièthement, ni pus ni mains que l'bouanhomme Laïesse Ernon, un homme qu'a tréjous passé comme étant sérieux et posé, qui jamais n'a prins part à autchune frivolité, sinon une feis par an quand i' jouait à “Thurza” le jour du thée d'la Chapelle.
Eh bain, craithions bain que v'là un vier scélerat qui, Jeudi au sé, à Ste.-Marie, était à s'traîner l'long du fosse sus la grand'route à contemplier les “exhibits” qu'étaient rangis là pour être jugis. Il en avait sans doute, parfaitement l'drouait, comme les chents autres qu'étaient là ettou, mais le vier portrait ne prenait autchun inthethêt dans les belles motor-bikes, la tchéthue à Mess Maugi, les “Carnival Boys” ou même le superbe traîneau à Percy l'Masuthi, qui gâgni l'Prix d'Honneur.
Nan dja! toutes ces choses-là n'avaient autchune attraction pour li.
Comme un cat qui fait l'touo d'une cage à ouaîsiaux, i' rôdait alentou du “Harem” au sultan, à admither les jolies dames qu'en faisaient partie, et pis quand il 'tait oblige de s'dêcârrer pour permettre ès Juges d'appréchi, i' s'en allait un p'tit pus liain dévorer d'san r'gard les treis ravissantes sirènes qui lus trouvaient dans l'car au bouanhomme Neptune, si bain que j'viyais l'temps que l'vi s'en allait l'enfroutchi avec sa froutchette.
Opprès qu'la procession avait fait sa promenade et s'était disperse le vier Laïesse s'en fut acater une démié-douzaine de poutchies d'confetti qu'i' fouôrri dans les pouchettes de sa grand' câsaque et pis i' s'faufili dans la crowd et en fliantchait une poignie dans la fache à châque hardelle qu'appréchait d'li.
I' continui chu bisnesse-là jusqu'à onze heuthes et d'mie et ch'tait raique quand i' ouï la “band” jouer “God save the King,” et que l'clios c'menchi à viedgi, qu'i' réalisi que p't-être qu'il 'tait temps de s'en r'aller siez-li. Chute séthée-là dès qu'il avait 'té fini d'baithe du thée il avait ramonté à s'changi et quand sa femme li d'mandi ouest qu'i' s'en allait, le vier hypocrite li raîponni qu'i' s'en allait sauter jusque siez Fraînque de Gruchy pour vaie si sa tchéthue 'tait prête car il 'tait grand temps de brîsi san fumi.
“Tu t'en vas continuer à mâter des patates, ma chiéthe,” i' li dit, “je ne s'sai pas pus d'une heuthe hors et je r'veindrai t'aidgi.”
La pouore femme resti à mâter toute la séthée et quand ou s'couochi à djaix heuthes et d'mie, Laïesse n'était pas oquo ervenu.
Il 'tait passé mînièt quand i' r'arrivi et à un mille de siez-li i' halli sa grand' casaque et s'mins à l'êcouer dans la route afin qu'sa femme ne vîsse pas autchune trace de confetti car comme i' disait à li-même, “V'là qui dêcouvrithai l'pot-au-roses.”
Mais comme ou savez tous, mes chiers lecteurs, le confetti à la tchuthieuse manièthe de s'insinuer partout dans vos habits et même quâsiment souos vot'e pé, et quand Laïesse halli ses bottes dans la tchuisine, il en tchi quâsiment une démié poutchie dans l'aithe.
I' ramonti bain douchement à haut pour ne rêvillyi pas la bouanne femme mais quand i' vint à se d's'habillyi il en r'tchi une autre achie sus l'tapis d'la chambre chein qui fit Laïesse se décider de se l'ver d'bouanne heuthe pour ernetti tout chenna devant qu'sa femme se rêvillyisse.
Mais missice 'tait l'vée d'vant li et quand ou s'aperchu d'la messe qu'i'y avais sus san tapis, ou s'mins à châtchi l'bouanhomme et dès qu'i' fut rêvillyi ou li d'mandi ouest qu'il avait 'té ramasser toute chute salopethie-là.
“Oh,” i' li dit, “ch'n'est pas d'ma faute, ma p'tite, Fraînque de Gruchy n'tait pas siez-li, il 'tait hors au Carnaval et j'ai 'té oblige d'aller jusque-là pour le vaie. En r'gardant pour li dans la “crowd” je m'sis trouvé parmi une djaingue de jeunes gens qu'étaient à s'entre jouôter avec chette infernale invention-là et d'vant que j'pusse me baller d'la vaie j'en ai attrapé ma châre.”
La pouôre missice avali chenna comme du lait doux. I' li fit un long recit de la pus grand' partie des belles choses qu'il avait veu, comment qu'les p'tits êfants pathaissaient dans lus difféthents costumes, mais pas un mot i'n'soufflyi entouor les sirènes ni l'harem.
“I'y en a oquo un autre à St.-Pierre Jeudi tchi vaint et sais-tu bain ma chiéthe que l'Président et l'Sécrêtaithe m'ont invité d'y aller!”
“Eh bain,” ou li raîponni, “i' n'y a pas rain qu'empêche, mais chute feis je m'y en vais avec té!”
Caouain
1924
Viyiz étout: